Xa peƭit axe 25 - NQAARIIT NE ROOG

¹ Xa peƭit xa lakas axaa ngatahinna na Salomo owey, goor we Hiskiya fee o maad Yudaa a mbokatrandna.

Xa peƭit xa pogreer

² O ndam onqe Roog refu yee ta ɗasnaa tig leng ke, o ndam no maad we mat a ref ee da ƥaalaa tig leng ke.

³ Ne asamaan fee a goƭitna took fo ne lanq ke a nqooɗitna fo a qalaat ake no maad we mbaagaand o ƥaal.

⁴ Boo xaaliis a xoolandeena no ndoƭ ke ten, o qaaxaw oxe a waaga jal teen a tokol.

⁵ Watni o soxodu xe paam o maad oxe, too xan maat um a saƭik yaam o cofel.

⁶ Ba o magnandoox mbaambir no maad oxe, too ba o moof na seek ale no we ngartoonga took,

⁷ yaam o layel ee: «Ŋaayiidi mene!» moƴu yee o fudnel mbaambir kelfa fee. O ga’angaa tig,

⁸ ba o ñof o hoƥattikin, yaam o kend of a maaɓnangaang, andiim xar o fi’kaa.

⁹ Xoxti a xoox of mbaambir no kend of, ndaa ba o caar o mbeeƭ no lakas,

¹⁰ yaam ndik o kiin a nanin soo a gaci’noorong, gon of a ɓalig boo xoo.

¹¹ Fa lay fee layeena na waxtu um kaa nand nen xa yooga wurus axaa mosandteena xaaliis.

¹² A maƭax no cegu yiif akaa ndokna no nof naanan kaa nand nen o heɗ wurus fo kumooxel wurus fa nqoolu.

¹³ Nen a ƥuuɓaan foofi galaas yaa fo a saxad, neene o tuleer o kore’u a nandu no xe luluuna. Kaa ɓutandaa kam no yaal mbind um.

¹⁴ Oxe na ga’atinooraa ci’it too cooxitkee a den, kaa nand nen o ufang.

¹⁵ Na pexey o muñ waagaa o ɗooqloox o kelwaar, too fa lay fa ƥuuɓu a waaga ɓol cer.

¹⁶ O jegangaa suum, ñaami teen podu, yaam ndik ta watong soo o wasliidin.

¹⁷ Naagi gijaa no mbind no kend of, yaam ndik ta fasnooxong soo a sibong.

¹⁸ Oxe na seede’anaa o kend um na xa maaƥ kaa waraa nen o guul mbaat laƥ mbaat a kas a beelu.

¹⁹ Hooloox o kiin o kore’aƭaru yaa fa naqad kaa nand nen yaa o ƴaxtaa ñiiñ laa na yo’nooxaa mbaat o geenoor a caf alaa na sendaa.

²⁰ Xaananaa oxe xeeñ um a naqadilooxna kaa nand nen o wolaa ndoki um yaa fo a cogoñ mbaat o juuraa bineegar no uut um.

²¹ O pañ of a xeexange, cooxeen ta ñaam, a hoɗomange, cooxeen ta yer,

²² yaam kaa nandkaa nen a kaagaañ a sumu jip o fokataa took xoox um, too xan o Yaal oxe a saɗgong.

²³ A ƥay foofi kaa ɓisiidaa a teƥ, ɗelem ñuuñu le a gartaa a tagid a kiɓooxu.

²⁴ Gen na paƭam-ndap moƴu gen fo o tew o ƭaaɗangtax.

²⁵ Ne foofi fo ɓuuɓu a nandna no kiin o qiju, neene o nan o felu laa inoorna no saax goƭu a nandu.

²⁶ O cofu xaa jaɓna o soxodu a ɗooqlooxin kaa nand nen a cur alaa poofi ke a njaxaseena, nen a ngas a nootooxu.

²⁷ O ñaam suum mayu faaxee, ne’atiim o bug o niwel bo ta hup.

²⁸ Teeru fa njegee saŋe faa naagna hundang fo o kiin oxe waageerna harin a xoox um mbodu.