Xa peƭit axe 2 - NQAARIIT NE ROOG

O jeg-yiif ole kaa guutatirandaa fo paaxeer

¹ O ƥees, dami ke um layang, fañ o weec xa as es!

² Rungi nof of no jeg-yiif ole, ɓakand xeeñ of no ƴiƴ ole!

³ Kaam ee ƴufginooxi o jeg-yiif ole, dimle’noox o ƴiƴ ole!

⁴ Waaƭteen ne xaaliis a waaƭteel, naaɓtin ne halal a naaɓteel!

⁵ Yaaga xan o andat o saɗar o Yaal oxe, aqatoox o and a Roog.

⁶ O Yaal oxe na ci’taa o jeg-yiif, o and fo o ƴiƴ a ngataa no ten.

⁷ Kaa yaxandooxanaa jofu we baneex tigi, a ref pegoor no wiin wooru we.

⁸ Kaa saytooxaa we na mbi’aa cagu, a yetooxaa we ndamooxna no ten.

⁹ Maaga, xan o and o cofel, a ƭat fo o woor, a ƭat ake na ƥisaa na baneex fop daal.

¹⁰ O jeg-yiif ole xan a rok no xeeñ of, o and ole a ɗaaynoorong.

¹¹ Xan a kortax ale a gayang, o ƴiƴ ole a yetooxang.

¹² Xan a nguutatirandong fo a ƭat a paaxeer, no we na laytaa naanaxir ƥor,

¹³ no we mbaasna a qal o cofel, a ñaaƴaa na ƭat a niɓaanu ke,

¹⁴ no we o mbelakinax den a refna o fi paaxeer, o ɗaay den a ref o naxaa doŋ,

¹⁵ no we saqna a pesoorooƭ a cofeer, a ndeefaa a ƭat a cageer.

¹⁶ O jeg-yiif ole xan a tax o xox pog ke no tew o seeseeq oxe, na jeemang o naxit xa ƭelem xa ƥuuɓu,

¹⁷ damooxaƭarna no kor um oxe ta dolnirna no ndeƥandoong, a weec ngiɓoor um fa Roog.

¹⁸ Oxuu rokna no mbind um, a jagna na fa nqon fee, a xot a ƭat ale na ɓisaa maa no xon waa.

¹⁹ O leng no we na ndetaa me ten nomtooxiidkee, too ga’katee a ƭat ale no ñoow ole.

²⁰ Xoti boog a ƭat no wiin faax we, reef o jaf no jofu we,

²¹ yaam wiin wooru we xan a ngen took lanq ke, wiin a ƭat we a yoq meen.

²² Soxodu we o mat xan a suudel no lanq ke, gore’aƭaru we a mbuurel teen.