Xa peƭit axe 18 - NQAARIIT NE ROOG

¹ Oxe na sayooxaa kaa feluuna doŋ a waaƭaa, a fuuxanaa fop we na asan.

² Fanxoy fee naagee waaƭaa o and ke lakas we a layna, ndaa yaqanee ta ratataa juumaa a qalaat um.

³ O soxodu xe kaa qicaa took um o xeefel, a pi a cednooxu a gartaa o niwaƭarel.

⁴ Fa lay no kiin a waaga ref a cur o jeg-yiif, a xooɗit nen a juwaam fee, a ɓuuɓit nen a ƈufnand alaa balna.

⁵ Farit oxe tooñna, gadin o cofu xe tooñ yaa fa hate, faaxee.

⁶ Fa lay fanxoy fee kaa gartaa qasir, o don um a oraa o xawel um.

⁷ O don fanxoy fee na taxan o saŋkoox, fa lay um a ref mbog no ten.

⁸ Fa lay fa yaayaq ƭool kaa xoƴig, a rokaa boo kam laaw ke.

⁹ Oxe na yapatilaa calel um kaa ref nen oxe na yaqaa.

¹⁰ Gon le no Yaal oxe kaa ref taax-took saƭku koŋ. O cofu xe kaa jaɓnooxaa teen soo a ref no woor.

¹¹ O jeg ole no yaal halal oxe refu teeru fa njegu saŋe um, ta foog ee a ƭing a saƭku koŋ oo no ten.

¹² A magnandax na gartaa o njakad, a neewandax o mat a adooxanaa o ndam.

¹³ Oxe na doonaa too nan-gilooxee boo a and, nen a fanxoy a ɗeeteel soo a dooneel gaci.

¹⁴ A koorgoorlax no kiin na damtan no jir um, ndaa a gooyangaa, an na inatinkan?

¹⁵ Oxe jegna yiif kaa waaƭaa o and, nof no ƈiƴ oxe a saakan.

¹⁶ Neexil kaa wetanaa o yaal um a ƭat, a ɓisin me no wiin maak we.

¹⁷ Oxe na eetaa lay yaa fo layoor kaa foogteel o yaal ndigil, boo yaa oxe ta layooraa a sutkan teen.

¹⁸ Mbanjang ne na xafaa nqasir, a ɗegaa hate a ndeer yaal toole ke sax.

¹⁹ O pog o tooñe moƴu ɗom o riimnel ee o rok kam teeru fa njegu saŋe, o xasir fo ten a moƴ o ɗom o xafel ee o wet a kinglir no mbind no maad.

²⁰ Oxuu refna xan a buq o gaf ole na fa lay um, a naag tem no ke o don um a yaƥatna.

²¹ Ɗelem saqu o ñoow fo fa nqon. Oxe fexna layaa xan a buq o gaf ole na fa lay um.

²² Oxuu jegna o tew, a jeg o ɗaay. Yirmande faa ta daawitna no Yaal oxe yoo.

²³ O ndool onqe kaa ɓuuɓ fa lay, o yaal halal oxe mat o doonanqol um a ñexet.

²⁴ A jega we na mbi’ooxaa qaariit too ndefiran, xaariit o ñis o leng o mat moƴu mbog faap fa yaay.