Xa peƭit axe 12 - NQAARIIT NE ROOG

¹ Oxe jaɓna fa yar fee kaa fex o and ole, oxe fañna xa soqanqol axe mat a ɓodax.

² O kiin oxe faaxna felu o Yaal oxe, oxe mayna fo naanaxir o mat kaa gadneel tooñ.

³ Kañaan saƭkinee a keen no kiin, a paƴ ake no jofu we mat yo’nooxkee muk.

⁴ O tew o paax kaa ref o ndip no kor um, oxe na gaci’nooran o mat a ref nen jir laa na ŋeesaa cer um.

⁵ A qalaat ake no jofu we no paax doŋ a njagnu, yuuƥ ke no soxodu we mat a ndef naanaxir ƥor.

⁶ Fa lay no soxodu we kaa ref mbog mbaawar, xa ton no jofu we mat a muclaa na fa nqon.

⁷ Soxodu we a njiƭtange, dara yoqkatee na den, mbind ne no jofu we mat a geenooxaa naŋ.

⁸ O cegu yiif oxe kaa kañeel, oxe raƥna yiif o mat a xeefeel.

⁹ May surga too jegiro kaa ñaamoona, xeefel fa surga fa leng too jeg kaa ñaamoona moƴun.

¹⁰ O cofu xe a anda ke cegel um a soxla’na sax, kam fee no soxodu xe mat a kaƥaa.

¹¹ Oxuu xooxna o qol um a jeg ñaamel teyu, oxe na ƴufanaa xa koɓong o mat kaa ñak-xoox.

¹² Ke o soxodu xe a yaawaa na maafkan no mbog ne ɗaapaneena wiin faaxeer we, o cofu xe mat a ref ndaxar ndiirim.

¹³ O soxodu xe kaa yenaa no mbog ne na xa maaƥ axe ten sax sax, o cofu xe mat kaa sutooxaa na naqad fuu refna.

¹⁴ O kiin fa lay um a gidmiteel, a rabdel calel um.

¹⁵ Fanxoy fee kaa xalaataa yee a pesoorooƭ um a jofa, oxe jegna yiif o mat a nan-gilooxaa xa as axe.

¹⁶ Fanxoy fee a fuuxangaa, kaa laltan ndak fo ndak, oxe na muñaa a ben ake mat kaa jeg yiif.

¹⁷ Oxe na layaa ndigil kaa jootnaa o cofel, o seede maamaaɓ oxe mat a lawandaa naanaxir.

¹⁸ Oxe na ratataa juumaa, fa lay um kaa gaañaa nen laƥ, fa lay fee no jegu yiif we mat a ɓisiidaa o wod-fo-ɓaal.

¹⁹ Fa lay fa ndigil kaa ñoowaa kili, ɗelem maamaaɓ le mat a xuuɗaƭar.

²⁰ We na yuuɓaa paaxeer kaa naxaa a qoox den, o ɗaay ole mat a refan we na cooxtaa xa as xa paax.

²¹ Paaxeer leng dalkee o cofu xe, soxodu we mat a ngen no torox.

²² O Yaal oxe kaa sib ɗelem naanaxir, oxe na fi’aa ke ta layna mat a felin.

²³ Oxe jegna yiif naagee layaa ke ta andna fop, fanxoy fee mat fa lay um na laltaa o ƥodaxel um.

²⁴ Duuña fee xan a maadoox, feeñaak fee mat o paɗ no gend um rek a refaa.

²⁵ O njaaxɗataand kam xeeñ no kiin kaa gooyandan, ndaa fa lay fa mbaax kaa ɗaaynooran.

²⁶ O cofu xe kaa lalaa xaariit um a ƭat a paax, a ƭat ale no soxodu we mat a mo’nooraa.

²⁷ Feeñaak fee jegkee mbuufuɗag naa ta juɗna, nduuña mat a ref halal fa njegu njiriiñ no kiin.

²⁸ O ñoow ole kaa ref na ƭat ale no cofel ole, ndaa a jega a ƭat a lakas alaa na ɓisaa na fa nqon.