Xa peƭit axe 11 - NQAARIIT NE ROOG

¹ O Yaal oxe kaa sib balaas fa mbaaxeer, a poox a bodu ke mat a mbelin.

² Boo a magnandax a jegna, gaci na doonooxaa, a neewandax ale mat a yoontaa o jeg-yiif.

³ O woor na ɗoxaa o kiin o cofu xe, o wooraƭar o mat a saŋkaa hoohod we.

⁴ Na bes fee no fuux le Roog halal fee ɗaxkee tus, o cofel ole mat kaa wataa na fa nqon.

⁵ O woor ole no kiin o cofu xe kaa fodrandaa a ƭat um, o soxodu xe mat kañaan um na maafan.

⁶ O woor ole no jofu we kaa wataa a den, hoohod we mat mbuge den a maafnooraa a den no mbog.

⁷ O soxodu xe a xonangaa, yaakaar um a naag tak, a koolax ale ta gaɗ’ina na halal fee a mooc.

⁸ O cofu xe kaa wateel na naqad, o soxodu xe a rondandin teen.

⁹ Oxe a ƭat um a yongeerna na Roog kaa luubaa o ñoow no kend um fo fa lay um, jofu we mat a mbateel teen na pexey o and den.

¹⁰ Jofu we a sawarangaa, teeru fee kaa refaa no ɗaay, soo boo soxodu we a saŋkooxaa, xa ƈeel a njibneel.

¹¹ Barke fee no jofu we kaa yoɗaa teeru fee, xa ton no soxodu we mat a maafan.

¹² Oxe na ɓiiñaa o kend um kaa ñak-xoox, oxe jegna yiif o mat a tiimaa.

¹³ Oxe na ñu’aa retaa kaa huytaa kunpa ke, oxe jegna yiif damooxu mat kaa geekaa a den.

¹⁴ Boo xeet a ɗoxaandeena, kaa yenaa, a jegangaa aa-as mayu mat xan a jof mbaambir.

¹⁵ Xan sabab a song o log no xe na gadooxaa o lad no xaa ta andeerna, oxe na wootooxaa o regit o rabdanin o lakas o mat a refaa no woor.

¹⁶ O tew o paax kaa laaseel, o koor oxe saqna doole a jegaa halal.

¹⁷ O kiin oxe na fi’aa paax xoox um a fi’anan, oxe na fi’aa a ƭom-yedar o mat cer um sax sax a ñagadilaa.

¹⁸ Mbef no soxodu xe kaa kasaara’ooxaa, oxe na duufaa o cofel o mat a xottaa teen ndabid mbagkeer.

¹⁹ O cofel kaa ɓisaa no ñoow ole, oxe na reefanaa paaxeer o mat fa nqon a ƴufanaa.

²⁰ O Yaal oxe kaa sib we njegna xeeñ naanaxir, we a ƭat den a njofna mat a mbelin.

²¹ A woora kañ ee o soxodu xe ñakkaand o xaw, o fog ole no jofu we mat xan a muc teen.

²² O tew o mosu xaa raƥna yiif kaa nand nen o heɗ wurus no ñis ruul.

²³ Ke jofu we a nqememaa paax soom a rimaa, ke soxodu we a mbugna mat a oraa mbañir.

²⁴ Oxe na ci’taa no fud o letu kaa moƴaa mayiƭ, oxe o ɓay um a ɗegna mat a moƴ o roolaa.

²⁵ Oxe na fi’aa paax xan a gen no neq, oxe na sooraa a soorel ten fa xoox um.

²⁶ Xeet fee kaa salooxaa oxe daaxna ndap um, a cungaa njigand ne ɓaatoox, oxe na jikooxan o mat kaa gidmeel.

²⁷ Roog kaa yirmaa oxe na fi’aa paax, oxe na fi’aa paaxeer o mat paaxeer na sagooxan.

²⁸ Oxe gaɗna o ñoow um na halal um xan a jiƭtoox, jofu we mat xan a neq nen ndaxar neepu.

²⁹ Oxe topatooxeerna mbind um, nqeñ ƥor na refkaa a las um, too fanxoy fee o paɗ no cegu yiif oxe a refkaa.

³⁰ O rim no cofu xe kaa ref ndaxar o ñoow, a ƭom-yedar ale mat a jangaa o ñis.

³¹ O cofu xe kaa daawaa saɗig um took lanq ke, yaaga boog, nam o soxodu xe fo o paabakaad oxe a ndaawitkeeru a las den mene?