Xa peƭit axe 10 - NQAARIIT NE ROOG

Mbokatrand na xa peƭit axe no kaa farna no ñoowooƭ ole

¹ Xa peƭit axe ngatna na Salomo yoo. O ƥiy o njegu yiif kaa ɗaaynooraa a faap um, o ƥiy o ƥodaxu mat a naqadilaa a ya um.

² Kalal ke leweerna ƭaxee tus, o cofel ole mat kaa wataa na fa nqon.

³ O Yaal oxe xaƴkee o cofu xe ta xeexel, soxodu we mat kaa xañtaa a den ke da yuxmaa.

⁴ Xa ƥay axe njalkeerna kaa ndoolnooraa, xa ƥay axe nduuña’na mat a njegnooraa halal.

⁵ Oxe na fokataa yaa fa seek kaa ƴiƴ, oxe na ɗaanaa yaa fo a saxad o mat a gen na gaci.

⁶ Barke fa ƥor na fudooxaa took no cofu xe, soxodu we mat a ƭasnaa a pi a yednu kam fa lay den.

⁷ O cofu xe weeckaand boo muk, a kon no soxodu we mat kaa ñufaa ɗuƭ.

⁸ Oxe jegna yiif a jaɓa o asel, oxe na layaa ƥooɓodaxir o mat a ƴufanaa a saŋkax um.

⁹ Oxe na fi’aa qoolu kaa ñaaƴaa fo o woor, oxe genna na luq-luq o mat xan a mos o weej.

¹⁰ Oxe na waraa a ngid kaa oraa naqad, oxe na layaa ƥooɓodaxir a ƴufanaa a saŋkax um.

¹¹ O don no cofu xe kaa ref a cur o ñoow, soxodu we mat kaa ƭasnaa a pi a yednu kam fa lay den.

¹² Mbañir kaa oraa nqasir, o mbeq o mat a muuraa tooñ ke fop.

¹³ Ɗelem no ƈiƴ oxe o jeg-yiif a laytaa, xa yar axe mat a ndefan ndiiñ no panxoy ke.

¹⁴ Jegu yiif we naangee layaa ke da andna fop, fanxoy fee mat oxaa yaƥataa o don um rek, sabab a jeg.

¹⁵ O jeg ole no yaal halal oxe refu teeru fa njegu saŋe um, ndool ne no ñaatu xe a ref a saŋkax um.

¹⁶ Calel no cofu xe kaa ndimaa o ñoow, ke o soxodu xe a rabdeel o mat, a fi’nooran paaxeer.

¹⁷ Oxe fa yar fee a haalna oxey na ƭat ale no ñoow ole, oxe na yapatilaa xa soqanqol axe o mat a mo’aa mir.

¹⁸ Oxe na fofaa o njaaku kam o maamaaɓ oo, oxe na yaqaa ƭool no lakas a fanxoy.

¹⁹ Oxe o don um a yuuraa ñakkee o bakaad, oxe na harnaa ɗelem um o mat o kiin o ƈiƴu yoo.

²⁰ Fa lay no jofu we kaa ref xaaliis fa nqoolu qac, a qalaat no soxodu we mat njegee o njiriiñ.

²¹ Fa lay no cofu xe kaa jootnaa wiin mayu, panxoy ke mat a nqonaa yaam o ñak-xoox.

²² O Yaal oxe a barke’angaang, o jeg halal, a koorgoorlax of waagee o ɓaat teen tig.

²³ O fi paaxeer na ɗaaynooraa a fanxoy fee, o ƈiƴ oxe mat o and ole a felakinan.

²⁴ Ke o soxodu xe a saɗaraa na dalan, jofu we mat a ci’eel ke da nqememaa.

²⁵ A und ale oxaay waanaa o soxodu xe a mooc, o cofu xe mat a per ake ten kaa ndef boo faw.

²⁶ Ne bineegar a wartaa a ñiiñ fo ne fo suun a loolnitaa a kid, neene o peeñaaku xe a nandu no xe luluuna.

²⁷ O saɗar o Yaal oxe kaa ɓaataa xa yeng, a pe no soxodu we mat a nquufeel.

²⁸ Jofu we xan a ndaaw fo o ɗaay ke da cungaa, yaakaar ne no soxodu we mat a tas.

²⁹ O Yaal oxe kaa ref saŋe no cofu xe, we na mbi’aa paaxeer o mat ta yaqaa a den.

³⁰ O cofu xe sendkee muk, soxodu we mat a ineel no lanq ke.

³¹ O don no cofu xe kaa sutaa o jeg-yiif, ɗelem naanaxir le mat a ɓoleel.

³² O cofu xe kaa layaa mosu, soxodu we mat a layaa pariƴ ƥor.