Xa peƭit axe 1 - NQAARIIT NE ROOG

¹ Xa peƭit axe Salomo fee o ƥiy Dawid, o maad Isra’el.

O njiriiñ onqe no safe lene

² Xa peƭit axene kaa mbindel, ndax da njangin o kiin oxe o and fo o yarax, a aqatin, ndax ta anddirand xa ƭelem axe layteena o jeg-yiif,

³ ndax ta and ne ta warna o ñoowit no cofel, no woor fo na ƭat.

⁴ Xan a ci we ndaƥna a yiif a kortax, a ci teɓandoong ke o and fo a bootax.

⁵ Xan a nqooɗin o and ole no cegu yiif oxe, a njootin o ƈiƴu xe no ñoow um.

⁶ Kaa da andnooraa ke xa peƭit axe fo a kim a naxax ake a mbofna, ke fa lay fee no yaal-o-and we fo a nax-o-gut ake den a tekitna.

⁷ O and no saɗar o Yaal oxe a eettaa. Fanxoy soom na xeefaa o jeg-yiif fo a cang.

A bootax no wiin fo’oy we

⁸ O ƥees, xaƴi yiif of na fa yar fee daawtoona na faap of too ba o yapatil aqatin ne ya of a aqatinang.

⁹ Xan da nand nen o ndip o mosu took xoox of, nen ceq no cok of.

¹⁰ O ƥees, boo fiifi paaxeer a mbugoonga o ƭooqloox, ba o jaɓ.

¹¹ A mbaagaang o lay ee: «Gari yoon fa in, i ƥeng o kiin, mbarin, ƭaapan a jaambuur mbog no kaa o leng a andeerna.

¹² Fat i ndam a den da ñoowaa, ƥis a den jaaniif, ƥekandoor a den kam gamb le na saŋkax ale.

¹³ Xan i njeg kalal cegu njiriiñ kuu ndefna, mayƭand pind in fo cangale ke.

¹⁴ Xan o daaw a las of nen a in, yaam in fop na mbogkaa nafa leng kut ne.»

¹⁵ O ƥees, ba o yoon fa den! Ɗagooxi a ƭat den,

¹⁶ yaam xa caf den paaxeer rek a ƈufanaa, da ñofandooxanaa a ƥax fo’oy.

¹⁷ Deɓaa mbaal na kid no yaal a nafir jegee o njiriiñ.

¹⁸ Kaa koy, a qoox den o mat a sipanaa pog, a ƭaapaa kaa na warkaa a den.

¹⁹ Kene refu a las no we na nguuɗaa: Nguuƭ na warkaa a den.

O xoy ole no jeg-yiif ole

²⁰ O jeg-yiif ole kaa falalooxaa no ped ke, o ñuxur um a jibaa no paayo ke.

²¹ Kaa xoytaa me combol le a mayna, a jangtooxaa no tokand ke na teeru fee yee:

²² «Nuun we ndaƥna a yiif, kaa nu ndefkaa no raƥ yiif boo a mban? Nuun xaaxaadnax we, kaa nu mbugko nqaadnooxaa boo a mban? Nuun panxoy ke, kaa nu mbugko sibaa o and ole boo a mban?

²³ Nomtooxiidyo me mi, um soq a nuun! Yaaga xam picit yiif es na nuun, andnoor a nuun fa lay es.

²⁴ Kaa koy, kaam xoy a nuun, nu nqox, um letin xa ƥay es, ndaa fidee o leng na nuun.

²⁵ Kaa nu ndeɓ xa as es fop too nu mbugee um soq a nuun.

²⁶ Ten taxu xam jal a nuun, yaa nu ndefkaa na naqad, xaadnoox a nuun, yaa ke na firɓandkaa a nuun a garna,

²⁷ diid a dam a nuun nen a und, sabab a sagoox a nuun nen a saaqul, naqad fo o jaq a yen took nuun.

²⁸ Maaga, xan nu nqoyaam, ndaa jaaɓkiim, nu mbaaƭaam, ndaa nu nga’kiraam,

²⁹ yaam kaa nu sib o and ole, too nu njilee o saɗar o Yaal oxe,

³⁰ ndeɓ xa as axe mi, nqeef o soqanqol es.

³¹ Xan nu mbuq o gaf ole na pesoorooƭ nuun, naang tem fa luq-luq nuun.

³² O fañ o jeg-yiif ole na warkaa oxe raƥna yiif, o ñak a qalaat a saŋik a fanxoy fee.

³³ Kaa koy, oxuu nan-gilooxaxama xan a gen no woor, a ñoowaa no yaadax too diidkee paaxeer leng.»