Tiit 3 - NQAARIIT NE ROOG

Fat a njofnoox na pi a paax

¹ Wetandi gimu we, da nanan maat ne fo ke da ngebleel, a njaɓan a den, a njofnoox na pi a paax.

² Baa da mben o leng. Fat a ndef wiin jam, a mbod, a ƥuuɓ no fop.

³ In itam, wiin ñaku a qoox i ndeeƭu yaaga. Kaa i nanaƭar’u, mo, ndef faɗ a yuxum in fo no kuu na ci’aa a in baneex. Kaa i ñoowoogu no coxod, siisaa, ndef waa njareena o sib, sibraa.

⁴ Kaa koy, ye o paaxel ole Roog o Muumucil in fo o mbeq onqe ta fexna wiin we a mbeeñna,

⁵ a mucla a in, refee koy ee yaam i mbi a pi a cofu kaa njaruuna, ndaa kaa mucil a in na yirmande um na pexey a ƥogax ale no rimel o xas ole fo Yiif Tedu le, a fi’in ndax i njeg o ñoowooƭ o xas.

⁶ Kaa yip Yiif Tedu le took in bo ta dey sik na pexey Yeesu Kiristaa fee o Muumucil in,

⁷ ndax ne i njofandteena yirmande um, i mbaag o lam o ñoow o fagkeer ole i yaakaaraa.

⁸ Fa lay feene fa lay fa mbooru yoo. Bugaam o jangin keene, ndax we ngimna na Roog a njofnoox na pi a paax. Keene o mat refu ke faaxna, too a jeg o njiriiñ no wiin we.

⁹ Kaa koy, wootooxi ñimatir ƭooɗofir ke, fañ o ñimatireel o njaangooƈ, fañ o xasreel. Ba o xasir fo o kiin muk yaam kebil ke Moyiis. Keene fop kaa ref kaa jegeerna o njiriiñ, a ñak fayda.

¹⁰ A jegangaa oxaa na xaajaa gimu we, maƭooxeen boo ngap a caf a ƭak, a waasangee ke ta fi’aa, fat o riƈatooxin,

¹¹ and ee o kiin um kaa mo. Ten fa xoox um sax a naagaan o andaa, soo a diy o moƴ o mudaa na bakaad.

Pool oxe regdinooxaa tig mayu

¹² Boo luliiduuma a Artimas mbaat a Tisik me wo, fat o ñofaam o soƥiid Nikopolis, yaam maaga narum o ƴiid.

¹³ Boo Senaas fee refna o caajangin o maak no kebil ke a ñaaƴkaa mbaat Apolos, fat o coox a den ke da soxla’na.

¹⁴ Wiin in itam a mbara o aqatoox a pi a paax, a njalaa, ndax da ƭaxaa soxla fuu refna. Keene refu a pi a qatkeer.

¹⁵ We ndefna fa mi fop, owe simnang. Simnani a in fog in no ngim onqe. Yaasam yirmande a ref fa nuun, nuun fop!