Tiit 1 - NQAARIIT NE ROOG

Pool oxe simnaa a Tiit

¹ Mi Pool fee o paɗ Roog fo apootar Yeesu Kiristaa na bindang o leetar oleeke. Yeesu Kiristaa kaa lulaam, ndax um andnoor we Roog a jilna o ngim onqe, da and ndigil ne refna no reef a Roog,

² a njeg yaakaar ne no ñoow o fagkeer ole regteena yaaga jamaane jegafulee. Roog fee naageerna o maaɓaa regtun.

³ Ye hap fee a fadna, Roog o Muumucil in a feeñla fa lay um no Yegil mbaax ne ta doxnaxama soo a heblaam ndax um waare’in.

⁴ Wo Tiit, wo um bindaa o leetar oleeke, wo fee o ƥees ŋaƈit no ngim onqe. Yaasam Roog Faap fee fa Kiristaa Yeesu o Muumucil in a ci’ong yirmande fa jam!

Tiit oxe jalaa Keret

⁵ Waas’aaxoong Keret, ndax o fadand ke jagandoogeena. Ne regdinoorit’­oonga o ten, na teeru fuu refna, dodi maaga maak gimu, da adooxan mbokatax ne.

⁶ Fat o fi’in yaa ga’oona o koor o cegee ƥanjel, oxaa damna no teem o leng soom, xa ƥeem a ndef gimu, too ba o leng na den a andtel o late mbaat o yarwaƭar.

⁷ Kaa o aa-adax a war o ñak ƥanjel, nen oxe Roog a hoolooxna boo a doxnan. Baa ref oxaa ndigil um soom a giñna mbaat ta mat xeeñ. Waree o ref itam oxaa a yer a adinna mbaat ta may balu-balu, xaaliis a waagin o ɓek no andand.

⁸ Kaa war o ref oxaa na genaraa we na ngaraa no mbind um, a fex ke faaxna, a fod, a jof na pi um, a ted, a ɓuuɓ.

⁹ A wara o ref oxaa na reeftaa fa lay fa mbooru fee Roog ne ta jangniteena, ndax ta waag o umbit o ngim no lakas we a cangin a ñoow ale, a maafaa fa lay no we na ƥanjaa a cangin aleene.

¹⁰ A jega koy mayu waa nanaƭarna too a naxtaa wiin lakas we fa lay fa njegee xoox. Wiin weene koy, owe moƴa o mayit no Yaawuur we ngimatna.

¹¹ Weene koy, waraa o lal a den a ƭat, da naang cuxus. Kaa ndef taatas ƥasil, halal a tax da ndok na gaci boo a njangnataa kaa waraandeena o jangin.

¹² O leng na den, refna ref oxe da mbi’’ina o tuleer kaa lay ee: «We ngenna Keret fop kaa maaɓaa, a ndef muumeen soxodu, a ngalaf, too a tayil.»

¹³ A ƭelem akeene ndigil kak oo. Ten taxu xasani a den fa doole, da mbaag o njegik o ngim o nqoolu.

¹⁴ Fat da mbaas cegeer ke na mbetandooxeel no mbaax onqe no Yaawuur we, a mbañat o ndeefaa ke wiin we mbesna ndigil ne a cinj a ngeblaa a den.

¹⁵ We nqoolna, kaa fop a xool na den. We andoona koy ee kaa ndef no ndoƭ, too a ngimaƭar, dara xoolee na den.

¹⁶ Kaa ne’ooxaa andu a Roog, too yaaga fop oo a pi den a ñufaa gon Roog. Wiin faaxaƭaru a ndefu, a nanaƭar, a pi a paax a xox a den sup.