Sofoni 3 - NQAARIIT NE ROOG

Yeerusaleem nan-gilooxee o xoy ole Roog

¹ Sabab took teeru fa mbaafañ fa nqoolaƭaru fee, teeru fee naagna gañ fo ñaañagadil!

² Nan-gilooxee o ñuxur o leng, a ƭat um yongee no soqanqol, doonee a koolax um no Yaal oxe, matiidee a Roog um.

³ Kelfa ke ten kaa ndef cogoy kaa na mbumbaa, haahate we ten a ndef a teeteem o yeng akaa ngeekankeerna o feet tus.

⁴ Duleer we ten andee ke warna a den, a ndef goor hoohod, saasadax we ten a nqoolaƭarand ke kesaneena a Roog soo a ƭap kebil um.

⁵ Yaag oo toox de, o Yaal oxe xey kam teeru fee den, a jof bo too fi’kee njofaƭar leng. Nqes nuu refna kaa ɗegaa hate um, too mosiran o ñak o fi. Yaqanee koy o soxodu xe naagee sedaa.

⁶ O Yaal oxe kaa tee: «Moocandaam qeet, taax-took den a yaqel. Wootnaam ped ke den, boo njegatee oxaa reefna a den. Teeru ke den kaa ndaadnel, njegatee o kiin o leng, ngenataand.

⁷ Kaam layoogu taa kam es ee: ‹Ndiiki koy, Yeerusaleem xan a saɗaraam, a ƭat um a yong na xa soqanqol es. Yaaga ngenand um yaqkaand, too fadinkiim ke hebooxananuuma fop.› Kaa koy, kaa ñof o njimboox na pi a paaxeer a ƥor.

⁸ Ten taxu cungaamoo, cungyo bes fee um inooxkaa, ndax um jamb a nuun, yaam hebooxaam o fokat qeet, fosoox o korol maat ke, ndax fuux es a biltooxan a den, fuux ɗomu le mi fop. Saax le fop xan a raaɓtel fiɗel le no naal ne mi. Mi o Yaal oxe layun.»

Xan Roog a supit qeet ke

⁹ «Maaga, xam xooland muuceek ke no qeet ke, ndax den fop, da ƈufginooraa gon es, mi o Yaal oxe, a yoonandoor, a ndagooxaam.

¹⁰ We na mbaɗooxaxam, a pasaroox muu refna, xan a ƥoxotiidaam sadax, a inoortiid kaltaa xa quluɓ axe Kuus sax.»

Yoqatin we Isra’el

¹¹ «Wo Yeerusaleem, a koom jegkatiro gaci na pi of ake tooñtaxamoona fop. Xam watin na wo we a magnandax a ɗaaynooraa, too ga’atinooxkatiro muk took o joong o tedu le mi.

¹² Xam xaƴ me wo xeet fa neewandooxu fa ñaku doole, faa na bugko jaɓnooraa gon es, mi o Yaal oxe.

¹³ We na yoqkaa na Isra’el mbi’katee njofaƭar leng, maaɓkatee, too naanaxir hatkatee na xa ton den. Xan a suufaa, a kooraa, too o leng jom’andkee a den.»

Yeerusaleem xan a nomtel ne ta reeƭna

¹⁴ Wo Siyoŋ o ndoog onqe, jibni xa soroxole, wo Isra’el, ƴeeli, wo Yeerusaleem o ndoog onqe, felakinooxi no xeeñ of fop!

¹⁵ O Yaal oxe a watna a qaw ale war’ina o dal a nuun, o pañ nuun, ta goƭandin. O maad oxe Isra’el refna o Yaal oxe xey a ndeer nuun. Nu njegatee taamaala faa nu ngelna o saɗar.

¹⁶ A koom, xan Yeerusaleem a layel ee: «Wo Siyoŋ, ba o saɗar dara! Ba xa ƥay of a leeƈoox!

¹⁷ O Yaal oxe Roog of oxey fa wo, a ref nen a salma-koor alaa na muclaa. Xan o ref o ɗaay um ole moƴna magin. No mbeq um xan a fi’ong qas, o ɗaay um na wo a hitatir.»

¹⁸ O Yaal oxe kaa tee: «Xam fokatiid we ndefna na naqad, too a ngoƭ toofeen ke, a sutoor na wo, wo Yeerusaleem, too gaci a dam a den.

¹⁹ Na jamaane faaga, xam xaw ñaañagadil we wo fop. Xam mucil we na laƴaa, fokat we ndax’eena, fi da simateel, a njeg gon kam a saax ake da njeg’ina gaci fop.

²⁰ Na jamaane faaga, xam fokat a nuun, nomtiid a nuun, fi nu njeg gon, simateel a ndeer qeet ke no lanq ke fop, yaa um supitkaa o roxanqol ole nuun na kid nuun. Mi o Yaal oxe layun.»