Sofoni 2 - NQAARIIT NE ROOG

O tuleer oxe a simta a ticax

¹ Nuun xeet fee naangeerna sedaa, ƭeetaqinyo a qoox nuun, ƥek a yiif nuun na adna,

² boo a posax ale no Yaal oxe a helko fo fadnooxaa, soo nu maƥel nen ñaax laa nqeñ a adinna, boo fuux ɗomu le no Yaal oxe a helko fo yenaa took nuun, boo bes fee no fuux le no Yaal oxe a helko fo dalaa took nuun.

³ Mbaaƭyo o Yaal oxe, nuun neewandooxu we no saax le fop, nuun we na ndeefaa kebil ke ten. Mbaaƭyo o cofel, ngen na neewandax, yaaga xeƈa xan nu mbuusel, yaa fuux le no Yaal oxe a biltooxkaa.

XAN O YAAL OXE A XAW QEET KE MBIDNA A ISRA’EL 1. Fiifilista we no mudand

⁴ Xan teeru fee Gaasa a waasel pelek, Askalon a refat o mbiñ o mbootu, we ngenna Asdod a ndaxel njoloor o mbuc, we Ekron a sutel teeru den.

⁵ Sabab took no we ngenna paam o maag ole, took xeet fee no Keekeret we! Keeke o Yaal oxe a layu took nuun: «Wo Kanaan, saax le no Fiifilista we, xam yaqong pic boo genkataandee.

⁶ A ƥeeraamb ale no maag ole xan a refat o suufand, o gayand no gaynaak we fo ngetand a ked ake.»

⁷ A ƥeeraamb akeene xan a ndefan we yoqna no mbind Yudaa. Meene a mbugko ngayaa, soo no yeng ole, da mbondook kam pind ke Askalon. O Yaal oxe Roog den xan a topatoox a den, a supit o roxanqol ole den.

2. Mowaab fa Amon no batand

⁸ «Nanaam a kaañ ake Mowaab fo a ben ake no Aa-amon we, ye da mbenna xeet es soo a inooxanin, ndax da ƥaatoor o fiisel den.

⁹ Ten taxu mi o Yaal oxe Hupna fop, ref Roog fee Isra’el kaam ee: Ne ta wooritna yee mexe ñoowaa, neene a woortu yee xan Mowaab a nand fa Sodoom, soo saax le no Aa-amon we a nand fa Gomoor, a ndefat o mbiñ onqaa saxna o ndoxom, o tan fo jem, o mbiñ o mbootu boo kili. We na muckaa na xeet es xan a njangal a den, yoqatin we na xeet es a njegat saax den.»

¹⁰ Keene xan a dal a den yaam a magnandax den, yaam kaa mben soo a ŋañ xeet fee no Yaal oxe Hupna fop.

¹¹ Xan o Yaal oxe a saɗarnoox na den, yaam xan a moocand roog ke no lanq ke fop, too a pimb ake moƴna o liitoox sax xan a ngung mbaambir um me da ndefkaa ndef.

3. Kuukuus we no ɓemb-roog o ñamaak fo Aa-asuur we no ɓemb-roog o janoon

¹² «Nuun Kuukuus we itam, xam warnoor a nuun na xire.»

¹³ Xan o ɓay no Yaal oxe a dal took we no ɓemb-roog o janoon, a yaq a Asuur, a fi a Niniif o mbiñ o mbootu, lanq beeru koroŋ nen a koƥ-a-ƥor.

¹⁴ Xan xa siir axe a kooraa teen, o xos muumeen oluu refna, a paɓaan fo a sambaaƭ a mbe’aa took a toodook ake ten. Xan xa ñuxur den a nannoor na xa palangteer axe, a tooq ale a dong no peg ne, yaam fañ den xan a mbatin ke fi’teena a teex ndaxar seedar fop.

¹⁵ Keene na dalkaa teeru fa ƭaayu fee reeƭna no woor, a layaa taa no yiif um ee: «Mi doŋ refu meen!» Nam a yaqte neeke, boo a refat o koorand no muumeen ke? Fop we na ndeefkaa paam um xan a mbuuƴaa, a mbulaa a qoox.