Sofoni 1 - NQAARIIT NE ROOG

¹ Keeke refu fa lay fee o Yaal oxe a daawinna a Sofoni na jamaane faa Yosiya fee o ƥiy Amon a refaa o maad Yudaa. Sofoni, o ƥiy Kuusi a reeƭu, Kuusi a ref o ƥiy Gedaliya, Gedaliya a ref o ƥiy Amariya, soo Amariya a ref o ƥiy Hiskiya.

Bes fee na hate fee no Yaal oxe a matiida

² O Yaal oxe kaa tee: «Xam watin fop ke refna took lanq ke.

³ Xam moocand wiin we fo muumeen ke, tiiƭ ke fo liƥ ke, luƈit soxodu we. Kaam ee xam moocand wiin we took lanq ke. Mi o Yaal oxe layun.

⁴ Xan o ɓay es a dal took Yudaa, ten fo we ngenna Yeerusaleem fop. Xam moocand no mbiñ onqeene ke yoqna na paɗax ale Baal, ñuf a kon ake no saasadax we ten fo ake no lakas we na mbaɗooxan.

⁵ Xam moocand we na ngungaa na xa tung-took axe mbaambir njeeƈ ne fo o nqool onqe fo xa qoor axe, we na ngungaa, a ndaaɓoortaxam, mi o Yaal oxe, ndaa yaqanee da ndaaɓoortaa a Milkom,

⁶ we mbesaxama a cinj fo we mbaaƭeeraxama, laamtiraam, mi o Yaal oxe.»

⁷ Naangyo cuxus mbaambir no Yaal oxe na refkaa boo faw, yaam bes fee no Yaal oxe a matiida. A jaganda sadax, a tedland we ta xurna.

⁸ O Yaal oxe kaa tee: «Na bes fee na sadax fee mi, mi o Yaal oxe, xam xaw kelfa ke fo xa ƥiy axe no maad oxe fo fop we na ndokooxaa tikoorik kaa andaandeena meen.

⁹ A koom, xam xaw fop we na ƈakandooxaa peg ne, we na mayƭandtaa pind no yaal den kalal caɓe fo kaa njegteena na ƭat a qeleer.

¹⁰ A koom, xan xa paɗax a njib no Ndokand ne no liƥ ke, a ƭomatax a nannoox na dik fa nqas fee na teeru fee soo fangax jegu doole a inoortiid na ñaang ake. Mi o Yaal oxe layun.

¹¹ Iinyo, nuun we ngenna na dik fee na xoyeel o faƥ ole, yaam jula we fop xan a saŋkel, jiijikax we a moocandel.

¹² Na jamaane faaga, xam joktoox a Yeerusaleem fo o jam, too xam xaw goor we yaadooxna nen biiñ fa mbendu faa diƈooxna no nqiim um, soo a layaa taa kam den ee: ‹O Yaal oxe naagee fi’aa paax mbaat paaxeer.›

¹³ Kalal ke den xan a njaɓel pind den a ngefel. A maxangaa pind sax oo, ngenkee a den, too a njimbangaa a ƭing taxar biiñ, yerkee biiñ fee.»

Bes fee no Yaal oxe

¹⁴ Bes fa maak fee no Yaal oxe a matiida. A matiida, too oxe fadiidaa no ñofu. Bes fee no Yaal oxe xe fangooxaa, soo a salma-koor ake sax a njibin xa paɗax.

¹⁵ Bes faaga kaa ref bes fuux, bes naqad fo o jaq, bes a payit fo yaq, bes o niɓaan fo ɓaal-ee-ɓaal, bes a eel fo a kuy,

¹⁶ bes faa a tuluɓ ake fo xa buuq xire a njibankaa teeru cegu saŋe ke fo taax-took koƭu took ke.

¹⁷ O Yaal oxe kaa tee: «Xam ɓek wiin we na naqad, soo da ñaaƴtaa nen fuul, yaam kaa mbakaad na mi, mi o Yaal oxe. Fo’oy den xan a ɓaxtel nen fo ut, xa tal den a luuñaa nen ndoƭ.»

¹⁸ Xaaliis den mbaat wurus den mbaagkee mucil a den, na bes fee no fuux le no Yaal oxe. Xan fiɗel le no naal ne ten a raaɓ adna fa muum, a saŋik a den ndak fo ndak.