Sakari 5 - NQAARIIT NE ROOG

Mbeeñil ɓetuu fa lengandeer ne: O laxas safe le na yetaa

¹ Yoɗahinaam a kid es, too ga’aam kam mbeeñil o laxas safe laa na yetaa.

² Malaaka fee a laamtaxam ee: «Xar o ga’aa?» Doonaanum ee: «Ke um ga’aa de o laxas safe laa na yetaa yoo, o cigdel um a fi xa noonoong qarɓeen ƭik, soo o yaajel um a fi xa noonoong xarɓaxay.»

³ Maaga, a layaxam ee: «Ten refu a salax ale na dalkaa took lanq ke fop, yaam kaa bindel teen ee o kuuɗ oxuu refna xan a sutel mene, too oxuu na daaɓooxaa na xa maaƥ xan a inel meen.

⁴ Xam woktin, ndax ta rok no mbind no kuuɗ oxe fo no mbind no xe na daaɓoortaa gon es na xa maaƥ, a gen teen soo a yaqin pic boo na qanq ake ten fo a ƥil ake ten. Mi o Yaal oxe Hupna fop layun.»

Mbeeñil ɓetuu ƭikandeer ne: O tew oxe kam a cenjel ale

⁵ Malaaka fee layoogna fa mi a ɓeriida soo a layaam ee: «Yoɗangi a kid of, ɗeet ke na inoortiidaa maana.»

⁶ Laamtaanum ee: «Xar oo yee?» A doonaxam ee: «A cenjel oo.» A ɓaata teen ee: «Kaa yip tooñ ke no lanq ke fop.»

⁷ Ɓaatnee dara o afnir beteex ole afnit’eena a cenjel ale a aptoox, soo um ga o tew oxaa moof’ina kam fee.

⁸ Malaaka fee a layaxam ee: «Ten refu coxod ne.» A jooratinaan kam a cenjel ale soo a rip o afnir beteex ole took fee.

⁹ Yoɗaam a kid es soo ga rew ɗik waa na yetiidaa. Kaa saq’u a nafir akaa nandtoogna a nafir a caroox, nqeñ ne a adin a den. A ngifa a cenjel ale, a yetaa fo ten ndeer asamaan fo lanq.

¹⁰ Laamtaam a malaaka fee layoogna fa mi yee: «Mam a ƥisaa a cenjel ale?»

¹¹ A doonaxam ee: «Kaa maxankan mbind no saax laa Sine’aar. A ƴutangaa, xan a diƈel maaga no tiƈoor um.»