Sakari 13 - NQAARIIT NE ROOG

¹ «A koom xan a cur foofi laa na ɓogdaa bakaad fo nqoolaƭar a suqtanel mbind Dawid fo we ngenna Yeerusaleem.»

Xan Roog a in meen pangool ke fo duleer maamaaɓ we

² O Yaal oxe Hupna fop kaa tee: «A koom xam suud no saax le pangool ke, sañ a den na yiif no wiin we boo xoo, in meen duleer maamaaɓ we fo a yiif ake nqoxna no nqoolaƭar.

³ Boo o kiin a inooxna, a yegnitaa padafuleer, xan faap um fa ya um we ndimuuna a layin ee: ‹Wo kañ kaa o lafooxel, yaam kaa o geenoox maaɓtaa gon le no Yaal oxe!› Xan faap um fa ya um a mbarin, yaam o coojo’it Roog oxe ta fi’ooxaa.

⁴ A koom duleer we xan a sed o yegnitik padafuleer mbaat da mbetandoox peeñil den, too ndokooxkatee ndoki ƭool, ndax da naxtin o kiin.

⁵ Oxuu refna na den xan a lay ee: ‹Refiim o tuleer, o qooxoox refum, too naa moofum a qooq andum a and.›

⁶ Oxuu laamteena na den ee: ‹A aak ake no ngang of koy, xar fi’ong o ten?› xan a doon ee: ‹No mbind qaariit es a ndaltaxam.› »

O kaynaak oxe xan a warel, paal ke a pictoor

⁷ «Wo laƥ ne, yoɗooxani o kaynaak es, jagin no xe moƴaxama mat! Wari o kaynaak oxe, paal ke a pictoor, too xan o ɓay es a dal took fo mbote ne sax. Mi o Yaal oxe Hupna fop layun.

⁸ Maaga, a seek a ƭak no we ngenna no saax lene xan a mbarel, boo ta yoq a seek a leng koŋ. Mi o Yaal oxe layun.

⁹ Aleene seek koy, xam ɓekin na fiɗel, jawtin ne xaaliis a jawteel, xoolandin ne wurus a xoolandteel. A koom, xan a ƈufginoor gon es, um jaaɓ a den, lay a den ee: ‹Nuun ndefu xeet es!› Xan a ndoonaam ee: ‹Wo o Yaal oxe, wo refu Roog in.› »