Sakari 12 - NQAARIIT NE ROOG

Xan o Yaal oxe a wat a Yeerusaleem

¹ Ke o Yaal oxe a layna took Isra’el. O Yaal oxe letinna a asamaan, a fiis lanq ke, a ci o kiin oxe o ñoow kaa tee:

² «Xam fi Yeerusaleem a ref o feeƭ ole no fuux le mi na waynooraa qeet ke mbiduuna fop. Yaa Yeerusaleem a widkeel o kurul-keƥ, xan Yudaa itam a daaw teen.

³ A koom, xam fi Yeerusaleem a ref gac meɗu laa ɓoowna qeet ke fop. Den fop xan a mbokatooranin, ndaa oxe na jeemkan o yoɗ xan a gaañoox ƭomu.

⁴ A koom, xam firɓand pis no we mbugna nqire fa Yeerusaleem, gulmand we na ŋaaykaa a den. Xam fuuland pis ke no qeet ke fop, mbind Yudaa o mat, um yetooxin a paax. Mi o Yaal oxe layun.

⁵ A koom, kelfa ke no mbind Yudaa xan a layraa yee: ‹Doole no we ngenna Yeerusaleem oxey no Yaal oxe Hupna fop refna Roog den.›

⁶ A koom koy, xam fi kelfa ke Yudaa a ndef nen gaagaañ fiɗel ndeer o joc, a ndef nen o jam olaa na kaƥaa ndeer a keeg, a ndaaɓaa o saax oo saax qeet ke mbiduuna fop, we ngenna Yeerusaleem o mat a moof me da ndefna, kam teeru fee den.»

⁷ We ngenna Yudaa o Yaal oxe a eetkaa o mucil, ndax xa taan axe Dawid fo we ngenna Yeerusaleem mboogkee yee den ngupu lakas we ngenna Yudaa.

⁸ A koom, xan o Yaal oxe a saytoox we ngenna Yeerusaleem, too oxe moƴna neew doole na den xan a nand nen a Dawid, soo mbind Dawid a ref nen a Roog, nen malaaka fee no Yaal oxe mbaambir den.

A poygax ale kam saax le fop

⁹ O Yaal oxe kaa tee: «A koom, xam saŋik qeet ke na inooxankaa a Yeerusaleem fop.

¹⁰ Maaga, xam fudin took mbind Dawid fo took lakas we ngenna Yeerusaleem fop yiif yirmande fo a qeƭax. Xan a ndaxaaƴooxaam, mi fee da ndibna. Xan a mboygooxin ne o kiin a foygoortaa fa ñak no ƥiy o leng kut onqe ta jegna. Kaam ee xan a mboygooxin tigi ne taaw fa nqonu a foygoorteel.

¹¹ A koom, ƭomatax maak xan a jeg kam Yeerusaleem, nen ƭomatax ne took Hadad-Rimon na yulanq alaa Megido.

¹² Saax le fop na poygax a refkaa, a qaw oo qaw a mboygooxanaa a qoox den: Xa taan axe Dawid a kesoox, rew den a sayoox, xa taan axe Natan a kesoox, rew den a sayoox,

¹³ xa taan axe Lewi a kesoox, rew den a sayoox, xa taan axe Simey a kesoox, rew den a sayoox.

¹⁴ Neene a refitkaa na qaw a lakas ake fop, a qaw oo qaw na ƥak um, rew den a sayoox.»