Sakari 11 - NQAARIIT NE ROOG

Njom ne no yaal toole ke

¹ Wo Libaŋ, weti begax ke wo, ndax fiɗel a waag o raaɓ taxar seedar ke wo!

² Nuun pilaawo ke, mboygooxyo, yaam taxar seedar ke a luƈtooxa, taxar mosu keene a yaqe! Nuun kariñ ke Basan, mboygooxyo, yaam suungaan le naag’ina firiis a gaakooxa!

³ Nan-gilooxyo xa iin axe no gaynaak we, yaam xa kayand den a nduudne. Nan-gilooxyo bumb le no cogoy canglax ke, yaam ngenand den no joc ole Yordaan a fiita.

Gaynaak ɗik we

⁴ O Yaal oxe Roog es a layaxam ee: «Gayki paal ke na mbaajeel o ƥis no warand,

⁵ paal keene jiijik den a mbaraa too mbi’iran ta ref tig, we na njikooxaa a den a layaa yee: ‹Roog ndok! I njegata xaaliis!›, too gaynaak den itam njegee na den yirmande fa leng.

⁶ Mi yoo yirimkatiim we ngenna na adna fee. Xam hoƥatrand a den, o kiin a gomrik fo o kend um, da yen no ɓay no maad we na toroxandaa a den. Maad weene xan a ngef adna fa muum, too a koom mucilkiim o leng na xa ƥay den. Mi o Yaal oxe layun.»

⁷ Gaykaam boog paal ke no teefaŋke ke mbaajoogeena o ƥis no warand, pokoox xa loq xa ƭaq axaa ne’uuma, oleeke «Yirmande», olaana «Ngiɓoor», gaytik a den paal ke.

⁸ Kaa koy, no nqool o leng kut sambraam fo gaynaak daduk we. Cinj kaaga, waag’atiim o muñan paal ke itam, too den oo mbug’atiraam o nga.

⁹ Maaga, layaam paal ke yee: «Gaykatiim a nuun! Fat oxe na xonkaa a xon, oxe na mo’kaa a mo’ik, soo we na yoqkaa a mbarrik!»

¹⁰ Xotaam o loq es ole ne’uuma «Yirmande», naagin calit, laaf ngiɓoor ne o Yaal oxe a dalin’ina fo qeet ke fop.

¹¹ A koom ngiɓoor ne a ɗegu. Teefaŋke ke ngoroogaxama a and’ata yee o Yaal oxe hebil’axam ke fi’ooguuma.

¹² Maaga, layaam a den ee: «Ndabdaamoo, nu ƭeetangaa boo and ee paax fi’um. A refangee paax koy, ba nu ndoon dara no ɓay es.» Naaga mbi’u, a eedanaam xa monjong qarɓeen tadik xaaliis fa nqoolu.

¹³ Cinj kaaga, o Yaal oxe a layaxam ee: «O njigand onqeene da nqaymi’na na mi, deɓeen o qaaxaw oxe kam Mbind ne mi.» Maaga, jangaam xa monjong qarɓeen tadik axe, deɓ a den o qaaxaw oxe kam Mbind Roog naa.

¹⁴ Cinj kaaga, xotaam o loq es ole ne’uuma «Ngiɓoor», naagin calit, ɗeg ngiɓoor ne a ndeer Yudaa fa Isra’el.

¹⁵ O Yaal oxe a layaxam ee: «Xotahini ƥonax no kaynaak, ndaa ndiiki koy xan o fesoor nen o kaynaak o caree tus.

¹⁶ O nanangaan, xam sutan saax le o kaynaak oxaa a ƭat um a yongkeerna no paal ke mo’na, waaƭkee we yoqandna, waadinkee we ngaañooxna, topatooxkee we tig a damafuleerna, ndax a ƴaxaa we ngiñna boo a seeñ xa poxos den.»

¹⁷ Sabab took no kaynaak o caree tus oxe na fesaa paal um a cinj! Yaasam laƥ a god a naax um soo a yul a ngid um a ñamaak! Kaam ee yaasam a naax um a yeroox, a ngid um a ñamaak a cus!