Saak 1 - NQAARIIT NE ROOG

Simin ne

¹ Mi Saak, o paɗ Roog fo o paɗ no Yaal oxe Yeesu Kiristaa refum. Mexe simnaa a nuun, nuun ƥasil ne Roog pictooxna kam adna fee fop.

Roog a naaga o ci’aa yiif we yaakaaruuna

² Fog es, nu yenangaa no ƭeetlax mayu, mbelakinooxyo a paax,

³ yaam nu anda yee ƭeetlax keene a natooxangaa o ngim nuun boo a ƈut, kaa nu moƴkaa o saƭik.

⁴ O saƭkel oleene koy, a hela o feeñ bo ta dey no ñoow nuun, ndax nu ñak sik, soo ndey. Yaaga nu ñakkee dara.

⁵ O kiin na nuun a jegangee yiif deyu, fat a xeɗin a Roog, too xan a ci’in o ten. A woora yee Roog a naaga o ci’taa fop bo ta dey, too ŋañkee oxe xeɗuuna.

⁶ O kiin a xeɗangaa a Roog tig, fat a fañ o jeg a yiif-a-ƭak. A wara o gim ndigil ee xan Roog a ci’in o ten, yaam oxe jegna a yiif-a-ƭak kaa nand fo a yag-ee-yag akaa nqeñ ne riñaa o mbiñ fo o mbiñ.

⁷ Baa o kiin um a foog ee xan a daawit tig no Yaal oxe.

⁸ Kaa ref o kiin o kid-a-ƭaku, a ceek-ceeknaa no kuu refna.

Rool we fo yaal kalal ke

⁹ Fat oxuu refna o ndool na nuun a fakoox, yaam ne Roog a yoɗuuna,

¹⁰ o yaal halal a fakoox itam, yaam ne Roog a fudnuuna, a andnoorin ee xan a xon, ne mbiɗ a suptoortaa ñofu.

¹¹ Njeeƈ ne a sumangaa, kaa doxaa piɗ ke, a naf ake a ƥooroox, piɗ ke a sam, o mosel den a mo. Neene o yaal halal oxe a sooƴitkaa kam kos-kos um.

No ke jofna no ƭeetlax ke na ndalaa a in

¹² Oxe saƭikna, yaa ta ɗeetlooxeena, a ɗaaya. Ƭeetlax keene a mbaafangaa, xan a su’nel o ñoow ole Roog a regna we mbexuuna, ta ref o ndip um.

¹³ O kiin a fogange no fi paaxeer, baa lay ee Roog xiiraxam teen, yaam dara waagee o xiir a Roog no fi paaxeer, too sax xiirkee o leng no fi paaxeer.

¹⁴ Kaa koy, a yuxum a paaxeer ake ndefna no xeeñ taxu o kiin a fi’aa paaxeer.

¹⁵ Paaxeer ke ta yuxmaa na ndimaa bakaad, bakaad a maakangaa, a rim fa nqon.

¹⁶ Fog es we fexuuma, ba o leng a nax a nuun.

¹⁷ Paax mbaat ci’it mbadu nuu refna, took a ngatu, na Faap fee sakna njeeƈ ne fo o nqool onqe fa xa qoor axe. No ten, a suptax a leng naagee o jegaa, too a qoolaand um suptooxkee o niɓaan.

¹⁸ Kaa felin ta rimnoorit a in fa lay fee no ndigil ne, ndax i ndef taaw ndeer pindel um fop.

Fat wiin we a nan-giloox, a ndeef ke da nanaa

¹⁹ Fog es, fat nu nqaƴ a yiif nuun a paax no ke um layiidaa: O kiin a wara o ñof o nan-giloox, ndaa waree o ñof o lay mbaat ta ñof o fuux,

²⁰ yaam oxe fuuxna, waagee o fi cofu na kid Roog.

²¹ Ten taxu, mbaasyo paaxeer ke ndefna kam a qeeñ nuun fop, mbootoox bakaad. Fat nu neewandoox paam Roog, ndax nu njaɓ fa lay fee duufeena na qeeñ nuun. Fa lay feene waagu o mucil xa laaw nuun.

²² Ba nu nan-gilooxaa fa lay fee soom, mbañin o ndeef, yaam no kaaga, kaa nu naxaa a qoox nuun.

²³ O kiin a naagangaa o nanaa fa lay fee soom, too reefkiran, kaa nand fo xe ɗeetooxna no ɗeendoor,

²⁴ a ga ne mukit um a roɗgitna, soo a ret, a dalfoox o weec ne ta nandna.

²⁵ Oxuu doonna a kid um no kebil ndeyu ne Roog na wataa wiin we, a saƭik teen, a gayan, a fañ o weec ke ta nanna, xan Roog a barke’in yaam ke ta fi’na.

²⁶ O foogangaa yee kaa o reefaa a Roog, too waagiro o dam ɗelem of, kaa o naxaa a xoox of. Kaa o layaa yee kaa o reefaa a Roog, ndaa a teef a Roog of ɗaxirang dara.

²⁷ Roog Faap fee kaa lay ee o reefin ndigil refu: O topatooxaa xa baan axe fo ñaaw we ndefna na coono, wootoox a xoox of itam, ndik paaxeer ke na adna fee a naxong, a mbi’noorong paaxeer.