O leetar ole Pool a bindna GIMU WE NGENNA ROM 8 - NQAARIIT NE ROOG

Ñoowaa na pexey Yiif le Roog

¹ Ndiiki boog, a qaw a leng jegkatee no we mbogna na Kiristaa Yeesu,

² yaam kebil ke no Yiif le Roog na ci’aa we mbogna na Kiristaa Yeesu o ñoow, a mbokta a in na fa nqon fee bakaad a ɓisiidaa.

³ Ke xoxna kebil ke Moyiis yaam o neew doole le no cer ke in, Roog a fadnaan ye ta luliidna o Ƥeem ŋaƈit, ta ɓoxot o ñis um, ndax ta forit bakaad fee. Kaa heblin ta saq cer nandu nen cer no paabakaad. Neene o mat Roog a xawtu bakaad fee no cer no kiin.

⁴ Kaa Roog a fadin keene, ndax o cofel ole kebil ke a simitna a fadnoox na in, in we naangateerna o ñoowaa no ke cer ke in a mbugna, ndaa no ke Yiif le Roog a bugna.

⁵ We na ñoowaa no ke cer ke a mbugna, buge-buge fee no cer ke a topatooxaa, ndaa we na ñoowaa no ke Yiif le Roog a bugna o mat, o bug ole no Yiif le a topatooxaa.

⁶ Topatooxaa ke cer ke a mbugna koy, na fa nqon a ɓisaa, ndaa topatooxaa ke Yiif le Roog a bugna no ñoow fo na jam a ɓisaa.

⁷ We na topatooxaa ke cer ke a mbugna, fañ Roog a ndefu, yaam cer den kaa mbañ o nanan kebil ke Roog, kaa mbaagiran a mbaag sax.

⁸ We na ñoowaa no ke cer den a mbugna mbaagee o mbel a Roog.

⁹ Nuun o mat, nu ndeefee ke cer nuun a mbugna, ndaa ke Yiif le Roog a bugna, yaam kaa Yiif le Roog a gen na nuun. Oxuu jegeerna Yiif le Kiristaa koy, fogee no ten.

¹⁰ Boo Kiristaa a genna na nuun, ke bakaad fee a warnooraa cer nuun fop oo, Yiif le genna na nuun kaa ñoowdandaa a nuun, yaam Roog a ɗeeta a nuun nen jofu.

¹¹ Boo Yiif le Roog fee xontooxnoorna a Yeesu a ndeer no xon we a genna na nuun, ten feene xontooxnoorna a Kiristaa fee a ndeer no xon we, xan a ñoowdand itam cer qooxon ke nuun, a fi’tin Yiif le ten genna na nuun.

¹² Ten taxu boog fog we, i njega wareef, kaa koy refee ke cer in a liiƥaa, ndax i ñoow no ke da mbugna.

¹³ Boo nu ñoowaa no ke cer ke nuun a mbugna xan nu nqon, ndaa boo Yiif le Roog a taxna nu mbar a pesoorooƭ ale no cer ke nuun, xan nu njeg o ñoow.

¹⁴ We Yiif le Roog a ɗoxaa fop, xa ƥiy Roog a ndefu.

¹⁵ Yiif le nu ndaawna ɓekee a nuun muk no mbaƭ, boo a taxkaa nu ndefahin no diid. Yiif leene o mat refu Yiif Tedu le fi’na a nuun xa ƥiy Roog boo i nqoyataa a Roog «Aba, Faap!»

¹⁶ Yiif le Roog fa xoox um sax kaa woornaa a yiif in ee xa ƥiy Roog i ndefu.

¹⁷ Kaa i ndef xa ƥeem, ten taxu i njega a las no lam ne Roog a regna xeet um. Xan i lasrin fa Kiristaa, yaam i naangangaa o coono’aa fo ten, xan i mbog fo ten no ndam um itam.

O ndam onqe na garaa

¹⁸ A wooraxam ee coono ke in ndiiki mbaagkee o liiƥoor muk fo o ndam onqe Roog a feeñilkaa a in.

¹⁹ Ke Roog a sakna fop a taya o nga yaa Roog a feeñilkaa xa ƥeem kam o ndam den.

²⁰ Pindel ke fop kaa yen no kaa jegeerna muj fa leng. Refee koy no kaa felna a den, ndaa Roog sax sax fi’un. Yaqanee koy yaakaar a jega,

²¹ too xan pindel keene fa qoox den a mbatel na yastax ale, ndax da njeg a qoox den no ndam onqe xa ƥiy Roog a ndaawna.

²² Mee ndax i anda yee boo no ñaal ne xaye pindel ke fop na xa iin a ndefu, a ƭomeel boo nen o tew oxaa na gaajooxaa.

²³ Kaam ee, o ƭomel oleene koy dalee took adna fee soom, ndaa took in itam, in weeke ndaawna boo ƈut Yiif Tedu le nen a ƭegeer njigand no ci’it ne Roog. In itam, kaa i ŋuusaa taa kam in, too cungaa yaa Roog a dalinkaa a in nen xa ƥeem, a wat a in boo o sayoom sax dikkatee cer in.

²⁴ I mucle boo ƈut, ndaa boo ndiik kaa i ndef no yaakaar. Kaa koy ke ga’oona boo ƴut refatee yaakaar. An na moofkaa a yaakaaraa ke ta ga’na boo a ƴut?

²⁵ Mee ndax boo i yaakaaraa ke i nga’eerna, kaa i cungtan o muñ.

²⁶ Neene koy Yiif Tedu le kaa garaa, a dimle’iid a in, in we neewna doole. I naangee o andaa sax ne i mbarna o nqeɗit a Roog, ndaa Yiif le fa xoox um kaa xeɗanaa a in fo a yuɗnax alaa waagaandeena o lay.

²⁷ Roog fee na ga’aa kam xeeñ, a anda ke Yiif Tedu le a bugna o xeɗ. Yiif le koy, kaa xeɗanaa we mbogna na Roog, ne Roog a bugtuuna.

²⁸ I anda yee Roog kaa jalaa no ke na xewaa no ñoow no we mbexuuna fo no we ta xoyna no yuuƥ um fop, ndax ta rim o njiriiñ na den.

²⁹ Roog kaa heboox’u o nandand we ta jilna yaaga fo o Ƥeem, ndax o Ƥeem onqeene a ref taaw kam ƥasil maak.

³⁰ We Roog a jil’ina yaaga koy, a xoya a den, soo we ta xoyna, ta jofand a den, we ta jofandna, ta ci a den a las no ndam onqe ten.

O mbeq onqe Roog jegee hap

³¹ Xar i ƥaatkaa o lay no keene koy? Roog a refanangaa a in, an na waagankaa a in tig?

³² Roog feene wuusee o Ƥeem, ndaa a ɓoxotaan yaam in fop. Xar na taxkaa boo ci’kee a in, i njeg fop fo ten?

³³ An saɗu moof a jambaa we Roog a jilna? O leng saɗiran, yaam Roog o mat ɗeetu a den nen jofu.

³⁴ Yaaga boog, an saɗu maal a den? O leng, yaam Kiristaa Yeesu a xona, too kaa hupna keene a xontooxa. Ndiiki, kaa moof na ñamaak Roog, a xeɗanaa a in.

³⁵ Xar waagu boog o saƭtirand a in fo o mbeq onqe Kiristaa? Ndax coono a refkaa boog, ndi o laaw o xaƭa, ndi ñagadil mbaat nqeex mbaat a ƥangid mbaat taamaala mbaat fa nqon?

³⁶ Keene kaa ref nen ke layeena kam a Pind a Tedu ke yee: «Ñaal oo ñaal a jega na in waa na mbareel yaam o sagin of, soo i ƭeeteel nen paal kaa na ƥiseel no warand.»

³⁷ No keene fop koy, in mbaagu meen na pexey doole Kiristaa fee fexna a in.

³⁸ Yaam a wooraxam ee dara waagkee o saƭtirand a in fo o mbeq um, ta ref fa nqon mbaat o ñoow, malaaka mbaat cini ke, ke na xewaa ndiiki mbaat ke na garaa,

³⁹ katil ke took mbaat ke ɗuga lanq mbaat mbindel nuu ta waagna waag o ref, dara teen waagkee o saƭtirand a in fo o mbeq onqe Roog i ndaawitna na Kiristaa Yeesu o Yaal in.