O leetar ole Pool a bindna GIMU WE NGENNA ROM 6 - NQAARIIT NE ROOG

Yirmande fee kaa wataa in no mbaƭ ne na bakaad fee

¹ Xar i laykaa koy? Ndax kaa i maadkaa o ñoowaa kam bakaad, ndax yirmande fee Roog a ɓaatoox?

² Boo muk! Yaam ne i nqonna, i ƭegoora o kay fa bakaad. Nam i mbaagu o ndakoox o ñoowatinik kam bakaad koy?

³ Kaa nu andee yee na pexey batiise fee, na fa nqon Kiristaa Yeesu i mbogu, in fop we mbatiise’eena, ndax i mbog no ten.

⁴ Kam batiise fee kaa i nqon fo ten, soo ngasel fo ten. Keene kaa jeg, ndax ne Faap fee a xontooxnooritna a Kiristaa a ndeer no xon we na pexey doole fee ten jegna o ndam, neene i ñoowatinitkaa kam o ñoowooƭ o xas, in itam.

⁵ A soƥangaa yee kaa i mbogat njer leng kut fa Kiristaa, yaa i nqonna nen o ten, yaaga xan i mbog fo ten itam na qontax ale.

⁶ Fat i and a paax ee o kiin o kiid oxe i ndeeƭna yaaga, a rengandoor’e na kurwaa fa Kiristaa, ndax ngiin mbaabakaad neene a sooƴ. Yaaga koy, i ndefkatee faɗ bakaad boo muk,

⁷ yaam oxe xonna, kaa watel na bakaad.

⁸ A soƥangaa yee kaa i nqonandoor fa Kiristaa, i ngima yee xan i ñoowandooratin fo ten itam.

⁹ I anda yee Kiristaa fee xontooxna a ndeer no xon we, xonatinkatee boo muk. Fa nqon fee jegatee no ten sañ-sañ fa leng.

¹⁰ Kaa xon’u, too fa nqon um a tax’a ta ɗegoor o kay fa bakaad jaf leng kut. Ndiiki koy, oxe ñoowaa, too Roog a ñoowanaa.

¹¹ Neene itam njaɓooxyo nuun fa qoox nuun ee nu nqona tigi boo a taxa nu ƭegoor o kay fa bakaad. Njaɓooxyo itam ee Roog nu ñoowanaa ye nu mbogna na Kiristaa Yeesu.

¹² Yaaga boog, baa bakaad fee a maadooxat muk kam cer qooxon ke nuun, too ba nu ndeefat ke da yaawaa.

¹³ Ba nu ƥoxot ke mbogna no cer nuun, ndax da njalan bakaad, nen calir kaa na ndimaa njofaƭar. Kaa koy, ndeɓooxyo nuun fa qoox nuun na Roog, nen waa suqtiteena na fa nqon, too a ñoowaa. Ƥoxotyo a Roog itam ke mbogna no cer nuun, da ndefik calir kaa na ndimaa o cofel.

¹⁴ Neene boog, bakaad fee jegkatee na nuun sañ-sañ fa leng, yaam nu ndagooxatee kebil ke, ndaa yirmande fee Roog o mat nu ndagooxaa.

Faɗ we Roog no cofel ole

¹⁵ Nam koy? Xeƈa i mbugko mbakaa­dataa, yaam ne i ndagooxateerna kebil ke, a cinj ye i ndefatna dag na yirmande fee Roog. Boo muk!

¹⁶ Kaa nu andee yee boo nu ƥoxotooxna no kiin, ndax nu nananan, o paɗ no xeene nu nananaa nu ndefatu. A soƥangaa koy ee faɗ bakaad nu ndefu, xan a ɓis a nuun na fa nqon, ta ref ee faɗ no nanan a Roog nu ndefu, xan a ɓis a nuun no cofel.

¹⁷ Kaa koy, fat Roog a ɓoxotel o ngidim! Nuun we ndeeƭna faɗ bakaad, ndiiki nu nanana fo xeeñ letu lalgand ne refna kam a cangin ale nu ndaawneena.

¹⁸ Nu mbate no mbaƭ ne na bakaad fee, soo ndefat faɗ no cofel ole.

¹⁹ Kaam yooɓandataa fa lay es yaam ne o and nuun a jaakeerna. Yaaga, kaa nu ƥoxotoox’u fo cer nuun fop nen faɗ waa na njalanaa qoolaƭaru fo paaxeer, boo nu siiknoor fa Roog. Neene itam, fat nu ƥoxotoox fo cer nuun fop nen faɗ waa na njalanaa o cofel ole, ndax o ñoowooƭ nuun a ted.

²⁰ Ye nu ndeeƭna faɗ bakaad, nu seqoor’ee fa Roog dara no cofel um.

²¹ Xar keene a rimu na nuun boog? Dara, a refangeerna gaci, yaam muj no keene fop fa nqon soom oo.

²² Ndiiki koy nu sute na bakaad, soo ndefat faɗ Roog. O rim nuun a refata o ñoowooƭ o tedu, soo muj nuun a refat o ñoow o fagkeer ole.

²³ Ke bakaad a rabdaa refu fa nqon, ndaa ci’it mbadu ne Roog refu o ñoow o fagkeer ole na Kiristaa Yeesu o Yaal in.