O leetar ole Pool a bindna GIMU WE NGENNA ROM 5 - NQAARIIT NE ROOG

Xa tim axe no cofel ole na pexey o ngim

¹ Yaaga boog, ne i ƭeeteena nen jofu yaam o ngim onqe, i njegata jam fa Roog na pexey o Yaal in Yeesu Kiristaa.

² No ten, i mbaagata o matiid na yirmande fee Roog na pexey o ngim onqe. Yirmande feene refu ngenand in ndiiki, too kaa i mbelakinooxaa, yaam i yaakaaraa yee xan i ndaaw o ndam onqe Roog.

³ Kupu keene sax, kaa i moƴ o mbelakinooxaa kam coono ke, yaam i anda yee coono na rimaa o saƭkel,

⁴ o saƭkel a rimaa o xox ƭeetlax, o xox ƭeetlax a rimaa yaakaar.

⁵ Yaakaar ne o mat saalkee na in muk, yaam Roog kaa yip o mbeq um kam a qeeñ in na pexey Yiif Tedu le ta ci’na a in.

⁶ Kaa hupna keene sax, ye i maadaa fo o neew doole in, Kiristaa a xonana jofaƭaru we na waxtu fee Roog a liiƥ’ina.

⁷ Yooɓee de, ndax o kiin a xonan o cofu sax. Xeƈa a waaga o jeg jambaar faa jaɓna o xonan o kiin o paax,

⁸ ndaa Roog a lalta ne ta fexitna a in boo Kiristaa a xonan a in, ye i maadna o ndefaa baabakaad.

⁹ Ndiiki koy kaa i ƭeeteel nen jofu yaam fo’oy le ten ɓaxeena. Ten taxu i mbaagkaand o ñak o mucil itam no fuux le Roog na pexey um.

¹⁰ Kaa i ndeeƭu fañ Roog, ndaa fa nqon fee no Ƥeem a jofooranda a in fo ten. Njofoor neene taxu a qontax ale no Ƥeem waagkee o ñak o mucil a in.

¹¹ A jega kaa doonooxna no keene itam: Kaa i mbakooxaa na Roog yaam o Yaal in Yeesu Kiristaa fee jofoorandna a in fo ten.

Bakaad fa yirmande

¹² Nu anda yee na pexey o kiin o leng kut, ta ref Aadama, bakaad fee a roktiidu na adna fee, soo bakaad fee a ɓisiid fa nqon. Neene itam, fa nqon fee a yena took o kiin oo kiin, yaam fop a mbakaada.

¹³ Bakaad a reeƭa kam adna fee yaaga Roog cooxafulee a Moyiis kebil ke, ndaa ye kebil ke a ngarafuleerna, Roog ɗeetoogee bakaad fee.

¹⁴ Yaqanee koy no kaa xotitna na Aadama boo na Moyiis, fa nqon fee a maadooxooga took no we mos’eerna o mbakaadit nen a Aadama fee ɗap’ina kebil ne Roog. Aadama feene reeƭu nitaal no xe war’ina o gar.

¹⁵ Den ɗik koy mbodree, yaam yirmande fee Roog a ci’na a in nandee fo tooñ ne Aadama. A woora yee mayu a nqona yaam tooñ no kiin o leng kut oxeene refna Aadama. Kaa koy, yirmande fee Roog fo ke ta ci’na wiin mayu na pexey o kiin o leng kut oxe refna Yeesu Kiristaa ngupu bakaad fee fo ke ta ɓisiidna.

¹⁶ Ci’it Roog neene koy fodree fo tooñ ne o kiin o leng kut oxe a fi’na. Cinj tooñ leng kut neene, hate fee ɓisiidna a qaw ale Roog a gara. Kaa koy, a cinj tooñ mayu, ci’it Roog ne jombna a in a feeñla ɓur in.

¹⁷ Tooñ no leng kut oxaaga taxu fa nqon fee a maadooxaa na pexey o kiin o leng kut oxaaga. Kaa koy, na pexey o leng kut itam, ta ref Yeesu Kiristaa, i ndaawtaa kaa moƴna. I ndaawa yirmande fa maak fo o cofel ole Roog nen ci’it, too xan i ñoow, soo maadoox yaam o leng kut oxeene.

¹⁸ Tooñ no leng kut oxaaga taxu a qaw ale a dal took no wiin we fop. Neene itam, na pexey a pi a cofu leng kut ale no xeene, o cofel ole Roog kaa ci’aa wiin we fop o ñoow.

¹⁹ Nanaƭar no kiin o leng kut oxe taxu wiin mayu a ndefat baabakaad. Neene itam, yaam o kiin o leng kut oxe nananna a Roog, mayu xan a ƭeetel nen jofu.

²⁰ Kebil ke o mat, kaa mbudooxiid, ndax bakaad fee a moƴ o ɓaatoox. Kaa koy, muu bakaad fee a ɓaatoorna, yirmande Roog a moƴ o siw.

²¹ Yaaga boog, ne bakaad a jegit’ina sañ-sañ boo a garit fa nqon, neene itam yirmande fee Roog a jegtu sañ-sañ na pexey o cofel ole, ndax ta ɓis a in no ñoow o fagkeer olaa na pexey Yeesu Kiristaa o Yaal in.