O leetar ole Pool a bindna GIMU WE NGENNA ROM 4 - NQAARIIT NE ROOG

O cofel ole na pexey o ngim onqe

¹ Xar i laykaa boog na Abraham fee o taan in? Xar a daawu nen o kiin?

² A soƥangaa yee Roog kaa jofand a Abraham na pexey a pi um, yaaga Abraham a waag’a o fakoox. Kaa koy, waagiran mbaambir Roog,

³ ne a Pind a Tedu ke a laytuuna yee: «Abraham a gim’a na Roog, too ten taxu Roog a ɗeet’aan nen o cofu.»

⁴ Yaaga koy, oxe na jalaa, ndabid um ɗeetaand nen ci’it, ndaa kaa ɗeetel nen wareef.

⁵ A guutatira koy fo xe jaleerna ndax Roog a rabdin, ndaa a gim na Roog fee na jofandaa o cofaƭaru xe. Oxeene koy, kaa ɗeeteel nen o cofu yaam o ngim um.

⁶ Neene itam Dawid a laya yee oxe Roog a ɗeetna nen o cofu, too refee yaam ne ta fi’aa a pi a paax, a ɗaaya.

⁷ Kaa tee: «We Roog a waasanna njofaƭar den, a uup pakaad den, a ƭaaya.

⁸ Ndaw o ɗaay no xe o Yaal oxe a ɗeeteerna bakaad um.»

⁹ Ndax o ɗaay oleene, we nqucooxna soom a refanu? Ndax refanee we nqucooxeerna itam? Mee ndax i laya boo ƈut ee Roog a ɗeeta a Abraham nen o cofu, yaam ne ta gimna?

¹⁰ A mban Abraham a ɗeete nen o cofu? Ndax a soƥ’a ta xucoox boo a ƴut, ndi yaaga xucooxafulee? O haat a soƥ’un kañ.

¹¹ Cinj ye ta gimna boo a ƴut, a daawa nquc ne nen o ñaas. Kaa reeƭu o anddiloor no cofel ole ta daawit’ina na pexey o ngim um yaaga xucooxafulee. Abraham reeƭatu o taan no we nqucooxeerna fop, too a ngim na Roog, ndax da ƭeetel nen jofu.

¹² Abraham refu itam o taan no xucooxu we ndayeerna no nquc soom, ndaa a ñaaƴaa na ƭooqlaand ale no ngim onqe o taan in Abraham a jeg’ina yaaga xucooxafulee.

Ndegit ne Roog daawteena na pexey o ngim

¹³ Yaaga boog, refee yee yaam ne Abraham a reefna kebil ke taxu Roog a regin lam ne na adna fee, ten fo xa taan um. Roog kaa reg’un o ten yaam o cofel ole na pexey o ngim um.

¹⁴ A soƥangaa yee o kiin kaa daawaa lam ne yaam ne ta reefaa kebil ke, yaaga o ngim onqe kasaara yoo, too a tegit ale Roog a ñufe.

¹⁵ Kebil ke na ndimaa fuux le Roog, too muu kebil a njegeerna, a ƭap kebil jegee maaga itam.

¹⁶ Ten taxu Roog a rega a Abraham lam ne yaam o ngim um. Keene koy, ci’it yirmande Roog oo, ndax a tegit ale a woor xa taan um fop. Refanee we na ndeefaa kebil ke soom, ndaa kaa ret boo no we njegna o ngim onqe Abraham a jeg’ina. Ten refu o taan in

¹⁷ ne a Pind a Tedu ke a laytuuna yee: «Xam fi o ref o taan no qeet mayu.» O taan in a refu mbaambir Roog fee ta gimna. Roog feene kaa ci’aa xon we, da ñoow, soo a heblaa kaa moseerna o jeg, ta feeñ.

¹⁸ Abraham a gima na Roog, a yaakaaraa maa yaakaar a jegeerna sax. Ten taxu, a ref’ata o taan no qeet mayu, ne Roog a laytuuna o ten ee: «Neene o mat xa taan of a mbodkaa.»

¹⁹ Abraham mosee o neew o ngim muk, ye ta ga’na yee cer um, fa nqon rek a yoqɗatu, yaam ne ta jeg’ina farna fo xa kiid teemeed, too Saara fee o teem a faafat fa ndim, yaam ten itam oo a mat’a fa nqon.

²⁰ Gimaƭar’ee too mosee o ñak o hooloox ndegit ne Roog, ndaa o ngim um kaa dif’in ta ɓoxot a Roog o ndam.

²¹ A woor’aan ee Roog a jega katil naa ta fadnitna ke ta regitna.

²² O ngim onqeene taxu Roog a ɗeetin nen o cofu.

²³ Refee yee Abraham soom jegu a Pind ake layna yee: «Roog a ɗeetaan nen o cofu»,

²⁴ ndaa in itam, teen i mbogu. Neene, in itam, i ƭeete nen jofu yaam ne i ngimna no xe xontooxnoorna a Yeesu fee o Yaal in a ndeer no xon we.

²⁵ Kaa Roog a ɓoxotin na fa nqon yaam tooñ in, soo a xontooxnoorin, ndax ta jofand a in.