O leetar ole Pool a bindna GIMU WE NGENNA ROM 2 - NQAARIIT NE ROOG

Hate fee Roog

¹ Wo o mat oo daɗkiro, fo xe refoona ref oo, wo fee na jambaa lakas we. Ne o jambtaa lakas we, neene o ŋaaynitaa a ƭat took xoox of, yaam kaa o jambaa lakas we, too fi’aa nen a den.

² I anda toox de yee Roog a jofa na hate um took no we na mbi’aa nandu neene.

³ Wo o mat, wo fee na jambaa we na mbi’aa keene, too fi’aa nen a den, foogaa moos ee xan o daɗ hate fee Roog?

⁴ Ndax kaa o xeef o paaxel o maak ole Roog fo o muñ ole ten fo o laabiir um? Andiro koy ee o paaxel ole Roog kaa warong o riñ no fes pakaad of a cinj?

⁵ Kaa koy, ne bugeeroona o fes pakaad of a cinj yaam o saƭik xeeñ of, kaa o waajanaa a xoox of a qaw ale na moƴkaa o ɗom, yaa bes fee na hate fa njofu fee Roog fo fuux le ten a mbadiidkaa.

⁶ A koom, oxuu refna xan a rabdel calel um.

⁷ We ngenna no mbi’aa paax, soo a mbaaƭaa o ndam fo o niwel fo o ñoow o jegee hap, xan Roog a ci a den o ñoow o fagkeer ole.

⁸ Xan fuux le Roog fo a qaw ale ten a ndal took no we na mbaaƭaa o njiriiñ a qoox den soom, a nanaƭaran ndigil ne, soo a njaɓan njofaƭar ne.

⁹ Xan coono fo o njakad a ndal took o mbindeef onquu na fi’aa paaxeer, a eetit no Yaawuur we, soo we ndefeerna Yaawuur a ndoonoox.

¹⁰ We na mbi’aa paax fop o mat, xan Roog a ci a den o ndam fo o niwel fa jam, a eetit no Yaawuur we, cinj kaaga no we ndefeerna Yaawuur,

¹¹ yaam mbaambir Roog jegee camit leng no wiin we.

¹² We mbakaadna fop, too andee kebil ke Roog, xan a saŋkoox, too refkee yaam kebil keene. We andna kebil ke koy, soo a mbakaadaa, xan a ngate’tel kebil ke.

¹³ Refee yee we na nan-gilooxaa kebil ke Roog na ƭeetkeel nen jofu mbaambir um, ndaa we na ndeefaa kebil ke na njofandkeel.

¹⁴ Boo we ndefeerna Yaawuur andeerna kebil ke Roog, a ndeefaa ke kebil ke a simitna, a nanda nen kaa ndef kebil na qoox den, ke da njegeerna njeg kebil ke Roog fop oo.

¹⁵ A lalta yee ke kebil ke a simitna a binde kam a qeeñ den, yaam a yiif den a naanga o njambaa a den, soo leek-leek da mbarit a den.

¹⁶ Neene a refitkaa na bes fee Roog a hate’kaa na pexey Kiristaa Yeesu a pi a ƭasne ke no wiin we. Keene refu ke Yegil mbaax ne doxneema a layna.

Yaawuur we fo kebil ke

¹⁷ Kaa o ne’ooxaa o Yaawuur, wo fee saaƭooxna no kebil ke Roog, soo fakoortaa a Roog of,

¹⁸ andaa o bug um, wo fee jangitna no kebil ke, boo waag o jaqit ke faaxna.

¹⁹ Kaa o doon a xoox of o ƭooɗox no fuul, ref a qoolaand no we ndefna kam o niɓaan ole,

²⁰ ref o caajangin no we ñakna a qoox, ref o yaayar na xa teɓandoong. Yaam ne jegoona kebil ke, kaa o hooloox ee daawaa o and ole fo ndigil ne.

²¹ Yaaga boog, wo fee na jangnaa lakas we, xar taxu jangniro a xoox of? Xar taxu o waare’aa yee: «Guuɗkiro!» soo guuɗaa?

²² Kaa o layaa yee: «Seeqkiro!» soo seeqaa! Kaa o sib pangool ke, soo ƴufginooraa a den!

²³ Kaa o fakooxaa yaam ee jegaa kebil ke Roog, soo tooñaa a Roog yaam naagiro o fi’aa ke kebil ke ten a simitna.

²⁴ Ten taxu a Pind a Tedu ke a laya yee: «Nuun taxu we ndefeerna Yaawuur a mbenaa gon le Roog.»

²⁵ A woora o mat ee nquc of a jega o njiriiñ yaa o reefaa kebil ke Roog, ndaa boo ɗapoona a den, nquc of kaa nand fo nqucooxaƭar.

²⁶ A soƥangaa koy ee o haat ole kaa reefaa ke kebil ke a simitna, ndax Roog ɗeetkiran nen o qucooxu, ke ta refna o haat fop oo?

²⁷ Oxe xucooxeerna no cer um, too a fadnaa kebil ke, ndax jambkirang, wo fee xucooxna no cer of, jeg safe le no kebil ke boo ƴut, soo ɗapaa kebil ke ten?

²⁸ O Yaawuur tigi refee oxe nandna fo ten, nquc tigi itam refee ke waageena o ga no cer ke.

²⁹ O Yaawuur tigi refu oxe refuuna kam um, a xucoox no xeeñ. Nquc neene koy, inooree no ke bindeena kam kebil ke, ndaa kaa refit na pexey Yiif le Roog. Yaawuur tigi neene koy, o ndam um naagee o hataa no wiin we ndaa na Roog.