O leetar ole Pool a bindna GIMU WE NGENNA ROM 16 - NQAARIIT NE ROOG

Simin ne Pool

¹ Mexe fokataa a nuun fa Foybe fee o cigeen in no ngim onqe, too a ref o tiidimle no mbokatax ne no gimu we kam teeru fee Kenkere.

² Fat nu ndalnin a paax no gon le no Yaal oxe, mbi’tin ne ta warna o refit a ndeer waa mbogna na xeet fee Roog. Ndimle’eenoo no ke refna soxla um fop farna fa nuun. Wiin mayu a nqotta o ndimle na Foybe feene, moƴtaa sax mi feeke.

³ Fat nu simnanaam a Pirisil fa Akilaas ndefna yoon es no calel ke Kiristaa Yeesu.

⁴ Weene a liil’a o ñis den no xoƥ nquƭ, ndax da mucil ole mi. Refee yee mi feeke soom na gidmaa a den, ndaa pokatax ke no gimu we ndefeerna Yaawuur fop sax kaa ngidmaa a den.

⁵ Fat nu simnanaam itam gimu we na mbokatooraa kam mbind den, simin a Epaynet fee fexuuma, refna oxe eetna o gim na Kiristaa kam o jegel ole Asi.

⁶ Simnanaamoo a Mari fee jalna boo a tas yaam nuun,

⁷ simin a Andoronikos fa Yuñaas we fogtuuma xeet, too a ndeeƭu fa mi kam kaso, a ndef waa apootar we a niwna. Den sax eetaxam o ngim na Kiristaa.

⁸ Fat nu simnanaam a Ampilyaatos fee fexuuma no Yaal oxe,

⁹ simin a Urben o yoon es no calel ke Kiristaa fa Estakis fee fexuuma.

¹⁰ Simnanaamoo a Apeel fee lalitna o ngim um na Kiristaa, simin ƥasil ne refna no mbind Aristobil,

¹¹ simin a Herojon fee fogtuuma xeet fo ƥasil ne refna no mbind Narkis, too a ngim no Yaal oxe.

¹² Fat nu simin a Tirifen fa Tirifos ndefna rew waa na njalanaa o Yaal oxe. Weeciim itam a Persiid fee fexuuma, o tew oxeene jalanna o Yaal oxe mayu.

¹³ Fat nu simin a Rifis refna o caajal o peeñu no Yaal oxe fa ya um fee refna ref yaay na mi itam.

¹⁴ Fat nu simin a Asinkirit fa Felegon fa Hermes fa Patorobas fa Herma fo o fog o lakas ole refna fa den,

¹⁵ simin a Filolog fa Sili fa Neere fo o cigeen um fa Olimpa fo fop we mbogna na xeet fee Roog, too a ngen fa den.

¹⁶ Naangyo o simniraa a ndeer nuun, mboonraa fo o mbeq. Pokatax ke no we ngimna na Kiristaa fop, owe simnaa a nuun.

A maƭax a palakaand ale Pool

¹⁷ Fog we, kaam xeɗaa a nuun nu mbootoox we na sakaa fo mbokatax fo sayooxu. Kaa mo’nooraa gimu we, yaam kaa mbañ faƥit a cangin ale nu ndaawneena. Fat nu ngoƭaa a den.

¹⁸ Yaam wiin nandu neene, refee yee Kiristaa fee o Yaal in a ndagooxaa, ndaa xa pud den sax sax a ndagooxaa. Kaa ƈiƴtitaa a yiif no gimu we fa lay fa mbelu fa naanaxir.

¹⁹ Kaa koy, fop a anda ne nu nananitna Yegil mbaax ne. Kaam felakinoortaa a nuun, ndaa itam bugaam nu njeg o and olaa nu mbi’taa paax, njeg itam o qoolel, mbootoox paaxeer.

²⁰ Roog fee na ci’taa jam, xan a duguñ a Saytaane ɗuga a caf nuun no miñeer. Yaasam yirmande fee no Yaal in Yeesu a ref fa nuun.

²¹ Timote fee o yoon es no calel ke oxe simnaa a nuun. Lukiyus fa Yaason fa Sosipateer we fogtuuma xeet, owe simnaa a nuun itam.

²² Mi Tertiyus fee bindanna a Pool o leetar oleeke, mexe lultaa a nuun simin es no gon no Yaal oxe itam.

²³ Gayus fee dalnaxama, me gimu we fop a mbokatooraa, oxe simnaa a nuun. Eraste o keegeek xaaliis oxe na teeru fee fo o pog in Kuwartos itam, owe simnaa a nuun. [

²⁴ Yaasam yirmande fee no Yaal in Yeesu Kiristaa a ref fa nuun, nuun fop! Amiini.]

A simat a palakaand ale

²⁵ Fat i simat a Roog boog! O ten jegu sañ-sañ faa ta saƭkinitna a nuun kam o ngim onqe na pexey Yegil mbaax ne um yegnitaa. Yegil mbaax neene um waare’aa koy, kaa jagin na Yeesu Kiristaa. Roog a feeñla a in yuuƥ kunpa’u ne ten ɗasin’eena yaaga.

²⁶ Ndiiki, kaa feeñlel kam a safe ke no duleer we, ne Roog fee na refkaa boo faw a heblituuna. Keene koy kaa andnoorel qeet ke fop, ndax da ngim, too a nanan.

²⁷ Yaasam Roog fee jegna o and, ten soom, a ɓoxotel o ndam boo faw na pexey Yeesu Kiristaa! Amiini.