O leetar ole Pool a bindna GIMU WE NGENNA ROM 14 - NQAARIIT NE ROOG

Ba o hate o pog of!

¹ Naangyo o ndalnaa oxe o ngim um a neewna, too ba nu ñimatir fo ten a qalaat um.

² A jega oxaa na xalaataa yee: «Waagaam o ñaam ñaamel kuu ndefna.» Oxe o ngim um a neewna koy, a xalaataa yee: «Saɗiim o ñaam a tegeƴ, tuufe-duufe soom um ñaamaa.»

³ Oxe waagna o ñaam fop koy, baa xeef oxe na ñaamaa ñaamel leng-leng. Oxeene itam, waree o jambaa oxe waagna o ñaam ñaamel kuu ndefna, yaam Roog a jaɓa oxeene kiin.

⁴ An refo boo hate’aa o tag no lakas? Mee ndax a jofa a jofeer, a ƭat no yaal mbind um oo. Too sax xan oxeene a jof, yaam o Yaal oxe a jega doole faa ta geenooruuna.

⁵ A jega itam waa na njilaa pes, ee yaam pes keene moƴu njeg o njiriiñ pes lakas ke. Wene koy a layaa yee pes ke fop leng kut a ndefu. Kaam ee fat oxuu refna a dalin yiif um no ke ta fi’aa.

⁶ Oxe na jilaa bes ee yaam kaa jeg o njiriiñ, kaa simattan o Yaal oxe. Oxe waagna o ñaam kuu refna itam, kaa simattan o Yaal oxe, too a gidmaa teen a Roog. Oxe saɗeerna o ñaam kuu refna kaa simattan o Yaal oxe, too a gidman itam.

⁷ O leng na in ñoowanee a xoox um soom, too o leng na in xonanee a xoox um soom.

⁸ I naangangaa o ñoowaa kañ, o Yaal oxe i ñoowanaa, too i nqonangaa itam, o Yaal oxe i nqonanu. Neene itam, i ndefangaa no ñoow mbaat na fa nqon, o Yaal oxe i ndefanu.

⁹ Yaam Kiristaa a xona, a xontoox, ndax ta refan we na ñoowaa fo we nqonna o Yaal den.

¹⁰ Wo o mat, xar taxu koy o hate’aa o pog of? Kaam ee xar taxu o xeefaa o pog of? Mee ndax xan i mbokatoor in fop mbaambir Roog, ndax ta hate a in?

¹¹ A laye na Pind a Tedu ke yee: «Mi o Yaal oxe, ne ta wooritna yee mexe ñoowaa, neene a woortu itam ee xan wiin we fop a ngooknoox mbaambir es, too oxuu refna xan a xaanaa o ndam es, mi Roog.»

¹² Maaga, o kiin oo kiin na in xan a jangtoox a Roog ke ta mosna o fi fop.

Ba o maafnoor o pog of!

¹³ Ba i ngate’rat a ndeer in! Fat nu mbosoox o mbañ o mbi dara kaa waagna o tax o pog nuun a tolof mbaat ta yen na bakaad.

¹⁴ Andaam ee jegee ñaamel kaa na ndiimbeel, yaam o Yaal oxe Yeesu a andnooraxam keene. Kaa koy, boo o kiin a ɓekna no yiif um ee ñaamel kene tiimbel oo, kaaga tiimbel a ndefataa no ten.

¹⁵ Boo ɓisiidoona o kentand of coono yaam ñaamel kaa o ñaamaa, yaaga fesooratiro nen oxaa jegna o mbeq. Ten taxu ba o mo’noor o pog of yaam ke o ñaamaa, yaam Kiristaa a xonanaan itam.

¹⁶ Ke faaxna na nuun waree o ref o wooƥ olaa taxna lakas we a mbenaa a nuun.

¹⁷ Fog no Maat ne Roog niinee dara fo ke na ñaameel mbaat ta yereel. Maat ne Roog refu jeg o cofel fo o ɗaay fa jam mbaambir Roog na pexey Yiif Tedu le.

¹⁸ Oxe na dagoortaa a Kiristaa neene, refu oxe felna a Roog fo xe jofooxna wiin we.

¹⁹ Yaaga boog, fat i naaɓaa ke na ɓisiidaa jam, too a jokaa o ngim a ndeer in.

²⁰ Baa ke o ñaamaa a ref muk ke na sañtaa calel ke Roog. No ndigil, ñaamel leng refee tiimb, ndaa tig paaxeer oo yaa ke o ñaamaa a maafnooraa o pog of na bakaad.

²¹ Ke faaxna refu o tuub a tegeƴ fo a yer a qaaɗu, waas fop ke waagna o maafnoor o pog of na bakaad.

²² Ke refna o ngim of no keene koy, naaganeen a xoox of ñuk mbaambir Roog. O kiin oxe andoona yee siisooxee na xoox um, yaa ta fosooxna o fi tig, a ɗaaya.

²³ Kaa koy, oxe na jaageejaa yaa ta bugna o ñaam tig, xan Roog a xawin cinj a ñaam aleene, yaam ne ta fi’teeruuna fo o ngim. A pi aluu yooneerna fo o ngim, bakaad oo.