O leetar ole Pool a bindna GIMU WE NGENNA ROM 11 - NQAARIIT NE ROOG

Roog deɓee xeet fee Isra’el

¹ Kaam laamtaa boog, ndax Roog a deɓ’a xeet um? Ha’aa o mat, yaam mi fa xoox es sax, o Ii-isra’el refum, ref o ndaan Abraham, fog no kurcala le Bensame.

² Roog deɓee xeet um feene ta jilna yaaga. Mee ndax nu anda a paax ke a Pind a Tedu ke a layna, na betandax ale me o tuleer Eliya a ɗomatoortoogna a Isra’el mbaambir Roog,

³ ye ta layna yee: «O Yaal oxe, a mbara duleer we wo, a njiƭit xa sadaxand axe wo. Mi doŋ yoqatu, too kaa mbaaƭaa naa da mbartaxama sax.»

⁴ Kaa koy, xar Roog a doonun? Kaa tee: «Geekanaam a xoox es wiin cuni ɓetuu ƭik waa ngooknooxeerna mbaambir Baal.»

⁵ Neene itam, boo xaye a jega yoqatin we Roog a jilna na yirmande um.

⁶ Kaa jil a den na yirmande um, too refee yaam a pi den. A jilit’angaa a den a pi den, yaaga yirmande fee Roog refkoogee yirmande fa ndigil.

⁷ Xar na laykeel koy? Kene na laykeel: Xeet fee Isra’el ndaawee ke da mbaaƭoogna. Yoqatin we Roog a jilna soom ndaawun. Lakas we o mat, a qeeñ den kaa saƭik’u, soo o and ole a mo a den mir.

⁸ A Pind a Tedu ke a lay’a kaa jofna teen ee: «Kaa Roog a dirin a yiif den, a fuulin a kid den boo nga’ee, a sux nof den boo nanee. Keene koy, kaa maadaa boo no ñaal ne xaye.»

⁹ Dawid itam a lay’a yee: «Yaasam o rox den a ref mbog naa na damaa a den, ndax da yen, boo a qaw ale a dal took den.

¹⁰ Yaasam a kid den a niifaar, o ga den a sooƴ, tiiñ den a nqali boo xoo.»

¹¹ Kaam laamtaa boog, ye Ii-isra’el we a tolofna, ndax kaa da yen, a mbañat o inoox boo faw? Muk! Kaa koy, njom ne den taxu a muc ale a cooxel we ndefeerna Yaawuur, boo a tax Yaawuur we a siisaa weene.

¹² Ii, boo njom ne den a refanna adna fa muum o njiriiñ no kaa jofna na Roog, soo a neewand ale da neewandeena a refan we ndefeerna Yaawuur o njiriiñ, kaam ee nam o njiriiñ onqeene a fodkaa yaa da nomtooxna na Roog?

A muc no we ndefeerna Yaawuur

¹³ Mexey layan a nuun, nuun we ndefeerna Yaawuur ee: Roog kaa fi’aam o apootar, a doonaam a ndeer no we ndefeerna Yaawuur. Ten taxu um felakinooxaa no calel es,

¹⁴ ndax ciis a ɓood na qeeñ no we fogtuuma xeet fa leng, boo leng-leng na den a mbaag o muc.

¹⁵ Yaam ye Roog a deɓna Yaawuur we, a weta o gom, ndax qeet lakas ke na adna fee fop a njofoor fo ten. A gisatinangaa a den koy, xar na xewkaa? Ndax refkee a qontax ale no xon we?

¹⁶ Boo andoona yee, o ɗeg o eetaand mbuuru a ɓoxote a Roog, ke na yoqaa no mbuuru ne fop, Roog jegun itam. Neene itam, a paƴ ndaxar a ƥoxotange a Roog, a naaq ake ndeyaand o ne.

¹⁷ Xeet fee Isra’el kaa nand fo ndaxar oliiw nduufe, a naaq a leng a leng a ƭegel teen. Wo fee refeerna o Yaawuur koy, kaa o nand nen a naaq ndaxar oliiw malu, soo dugandel na seek na naaq a ƭege keene. Ndiiki koy, woxe jiriiñooraa a paƴ ale na ñoownaa ndaxar oliiw nduufe ne.

¹⁸ Ten taxu wariro o xeef a naaq ake ƭegeena. Xar taxu o fakooxaa boog? Refee yee wo na dif’aa a paƴ ale, ndaa o ten o mat na dif’ang.

¹⁹ Xeƈa xan o layaam ee: Mee ndax a naaq akeene kaa ƭeg’el, ndax um dugandel na seek den!

²⁰ Keene ndigil kak oo de! Kaa a naaq ake a ƭeg’el yaam o ñak o ngim den, soo wo o mat o dugandel na seek den yaam o ngim of. Kaa koy, ba o laasoox na dara. Kaa o war o saɗar kañ,

²¹ yaam boo Roog a wuuseerna Yaawuur we ndefna a naaq ŋaƈit ake, yaaga wuuskirang wo o mat oo.

²² Ɗeetaqini kat ne Roog a feeñlitna o paaxel um fo o ñangel um. Kaa ñang no we yenna, soo na wo koy, ta letnong o paaxel um. Fat o gen no paaxel um oleene boog, ndax ɗegkaandee tapit nen a naaq.

²³ Neene itam boo Yaawuur we a ngenateerna no ngimaƭar den, xan Roog a dugandatin a den me da ƭegit’eena, yaam Roog a jega sañ-sañ o dugandatin a den.

²⁴ Ii, wo fee refeerna o Yaawuur, ndax ref a naaq oliiw malu, ɗegel soo dugandel no oliiw nduufe ne, andaa xil ee refee kaa wiin we a merna o mbi’aa. Yaawuur we ndefu a naaq ŋaƈit ake no oliiw nduufe ne. Ten taxu, den o mat moƴu o yooɓ o ndugandel no ndaxar ne da ƭegit’eena.

A muc a palakaand ale na xeet fee Isra’el

²⁵ Fog we, kene koy kaa ref kunpa faa buguuma o andnoor a nuun, ndax nu ƭeetkee a qoox nuun nen waa njegna o and. Kunpa feene refu yee: Kaa o saƭik xoox oleene a maƥ a qaaj na xeet fee Isra’el boo yaa a muc ale a daawkaa qeet lakas ke fop.

²⁶ Neene o mat Isra’el fop a muclitkeel, ne ta layteena kam a Pind a Tedu ke yee: «O Baawat oxe xan a inoor Siyoŋ, too xan a ñuf nanaƭar ne na xa taan axe Yakoob.

²⁷ Keene na refkaa ngiɓoor es fa den, yaa um foritkaa pakaad den.»

²⁸ Ne Yaawuur we a mbañna Yegil mbaax ne koy, fañ Roog a ndefatu, ta ref na nuun paax, nuun we ndefeerna Yaawuur. Kaa koy, ne Roog a jilna a den, a maada o fexaa a den boo xaye yaam daan we den,

²⁹ yaam Roog refee ci’it a jaɓ, too ricooxkee o xoy ole ten.

³⁰ Yaaga, kaa nu mbañ’u o nanan a Roog. Kaa koy, nanaƭar ne no Yaawuur we a taxa nu ndaawat yirmande fee Roog ndiiki.

³¹ Den itam, kaa lang no nanaƭar ndiiki. Kaa koy, yirmande fee Roog nu ndaawna, xan a tax da ndaaw yirmande fee ten itam.

³² Neene, Roog kaa fi wiin we fop faɗ no nanaƭar ne, ndax ta lal a den yirmande um, den fop.

O paaxel ole Roog jegeerna ngakand

³³ An waagu waag o xoolin ne yirmande fee Roog a magnitna fo ne o and ole ten fo o jeg-yiif ole ten a nqooɗitna? Kaam ee, an waagu o and yuuƥ ke Roog? Ndi an waagu o tekit o jaf um?

³⁴ Ne a Pind a Tedu ke a laytuuna yee: «An andu a qalaat no Yaal oxe? An waagu o ref o aa-as um?

³⁵ An refu oxe eetuuna o ci tig, boo a yaakaaraa o daawit no ten ndabid?»

³⁶ Yaam fop no ten a inooru, a sakoor no ten soo a refanin. Roog feene a hela o ɓoxotel o ndam boo faw! Amiini.