Nehemi 9 - NQAARIIT NE ROOG

A baasnax ale no pakaad ke na xeet fee

¹ No ñaal qarɓeen ƭik fo ñaal nahkandeer ne no nqool o leng kut onqe, Ii-isra’el we a mbokatoora, a nderoox xa saaku, a yipoox lanq, ndax da ngoor.

² We mbogna na xeet fee Isra’el a saytoor’a fo wiin jan we fop soo a mbaasnoox pakaad den fo tooñ ke no daan den.

³ A ngeenooxa, a njanganeel no safe le no kebil ke no Yaal oxe Roog den boo baxtu tadik. Cinj kaaga, a mbaasnooxooga pakaad den boo baxtu tadik lakas kaa da ngungna mbaambir no Yaal oxe Roog den.

⁴ Yesuwa, Bani, Kadmi’el, Sebaniya, Buni, Serebiya, Bani fa Kenani a ŋaaya took ndaalaand a teex ne no Leelewi we soo a ƈufginooxaa o Yaal oxe Roog den a maak.

⁵ Cinj kaaga, Leelewi we ndefna Yesuwa, Kadmi’el, Bani, Hasabneya, Serebiya, Hodiya, Sebaniya fa Petahiya a mbalalooxa yee: «Inooxyo, ngidim o Yaal oxe Roog nuun, bo na moos boo moos.» «O Yaal oxe, fat oxuu refna a niw gon of jegu o ndam, o magnel um a hupna o ngidim onquu refna fo a simat aluu refna.

A qeƭ a baasnoor

⁶ Wo doŋ refu o Yaal oxe! Wo fi’u asamaan fee, asamaan fee took-ee-took fo katil ke ten fop, lanq ke fo ke refna teen fop, xa maag axe fo ke da mbofna fop. Wo na ñoownaa ke sakeena fop, too katil ke na asamaan mbaambir of a ngungaa.

⁷ Wo o Yaal oxe Roog, wo jilu a Abram. Suttaano Uur kam Babilon soo ne’in Abraham.

⁸ Ga’aa yee xeeñ um a damooxa na wo, too dalnaa fo ten ngiɓoor, regin ee xan o coox xa taan um saax le no Kaakanaan we, Heeheet we, Aa-amori we, Peeperisi we, Yeeyebus we fo Giigirgasi we. Fadnaa a tegit of, yaam kaa o jof.

⁹ Ga’aa o ñaat ole no daan in kam Misira too nanaa ƈufginax den, na ƥeeraamb alaa na Kal ale no xeet le.

¹⁰ Xawtaa a Firawon fee xa anddiloor fo com’andtu, ten fo dag um fop fa xeet fee no saax um fop, yaam andaa yee a mbesoora fo daan in naa ɗomna. Neene, gon of a joota, ne ta refitna boo xaye.

¹¹ Xaajaa o maag ole mbaambir Ii-isra’el we, da nqaañin a ndak no beeru. We ndaaboogna a den o mat, riñaa a den kam qooƭ ke, ne ɓil a riimtaa kam poofi cegu doole.

¹² No ñaal ne, ɗoxtaa xeet of eel fo suun, soo no yeng ole, aal fiɗel laa na xoolandanaa a den a ƭat ale da ndeefna.

¹³ Fudooxiidaa took o joong olaa Sinayi, layaa fa den taa took asamaan. Daawnaa a den bargal cofu, a cangin a tiindigil, ke dalnoona fo kebil cegee sik.

¹⁴ Andnooraa a den bes fa tedu fee na ñootnax ale wo soo na pexey Moyiis fee o tag of, o coox a den kebil of, ke dalnoona fo a cangin of.

¹⁵ Fudnantiidaa a den mbuuru na asamaan, ye da nqeexeena, balnanit a den foofi no ɓil le, ye da ngoɗomeena. Heblaa a den da njaɓik saax le daaɓoox’oona o coox a den.

¹⁶ Daan in o mat, kaa magnandoox’u, a saƭik a qoox. Nan-gilooxee kebil of,

¹⁷ a mbañ o nananong, a mbeecit comlaand ke fi’anoona a den. Kaa saƭik a qoox soo kam siiknoor den, da njilan a qoox den o aa-adax, ndax da nomtoox no mbaƭ naa den. Wo o mat, Roog faa na waasantaa refo, faa yaajna kam too may yirmande, faa na muñantaa too may fo o mbeq. Waasiro a den,

¹⁸ ke da mbi’anna a qoox den o nqeel wurus o nqawne fop oo, a ndamtin ee: ‹Roog in oxey, sutna a in Misira.› A nqeefaang tigi.

¹⁹ Wo o mat, kam yirmande fa maak fee wo, waasiro a den kam a koƥ-a-ƥor alaa. Eel fo suun le riƈatooxee a den no ñaal ne, ndax ta ɗox a den na ƭat ale, ne’atiim aal fiɗel le no yeng ole, ndax ta xoolandan a den a ƭat den.

²⁰ Ci’aa a den yiif faaxu of, ndax da njeg o and. Xañiro a den maan fee ñoowdandtoogoona a den too ci’aa a den foofi, ndax o ɗax a koɗom den.

²¹ Topatooxaa a den boo xa kiid qarɓeen nahik kam a koƥ-a-ƥor alaa, too ñakee tus. Ñirax den siɗooxee, too a caf den nqimiƈee.

²² Ɓoxotaa a den maat fo qeet, ndax o lasrand a den xa piisel o ŋat. A njanga saax le Siihon fee o maad Hesebon fo le Oog fee o maad Basan.

²³ Mayƭandaa xa taan den, da may boo nen xa qoor axe na asamaan. Roknaa a den kam saax le lay’oona daan den da njangkin.

²⁴ A ndoka soo a njang saax le. Neewandaa mbaambir den we ngenoogna no saax le no Kaakanaan we, soo ɓoxot a den, den fo maad den fo qeet ke no saax le, na xa ƥay den, ndax da mbi a den kuu da mbugna.

²⁵ A njaɓa teeru cegu saŋe fo lanq qaaɗu, a njang pind mayu muut fo paax ƥor, palka paqe, a ƭing taxar biiñ, taxar oliiw fo taxar tiirim pagkatar. A ñaama boo a ngiñ tem, soo a ñoowaa no mbel-fo-neq yaam o paaxel o maak ole wo.

²⁶ Yaqanee koy, da inooxanong, a siiknoor fa wo, a mbes kebil of a cinj, a mbar duleer we wo maƭooxoogna a den, ndax da nomtooxiid me wo. A tooñaang tooñ maak.

²⁷ Maaga, ɓoxotaa a den na xa ƥay no fañ den, da toroxandaa a den. Kam naqad den, a ƈufginooxaang, soo o fod na asamaan, nanaa a den. Kam yirmande fa maak fee wo, lultiidaa a den waawat, soo da mbat a den na xa ƥay no fañ den.

²⁸ Kaa koy, yaa da mbateena mbat rek, a ndefahina no mbi’aa paaxeer mbaambir of. Maaga, waasahinaa a den na xa ƥay no fañ den, da ngal’andaa a den. A ƈufginooxahinaang, soo o fod na asamaan, nanaa a den. Kam yirmande fa maak fee wo, wataa a den a caf a mayu.

²⁹ Maƭooxaa a den, ndax da nomtooxiid no kebil of, ndaa den o mat, a magnandooxooga, a mbañ o ndeef kebil of. A ƭapa bargal ke wo o kiin oxe warna o fadin, ndax ta ñoow. Kaa nquun yaam nanaƭar, a saƭik a qoox, a mbañ o nan-giloox.

³⁰ Muñanaa a den boo xa kiid xa mayu, maƭoorit a den Yiif of, na pexey duleer of, ndaa nan-gilooxee. Maaga, ɓoxotaa a den na xa ƥay no qeet can ke.

³¹ Kaa koy, kam yirmande fa maak fee wo, moocandiro a den too waasiro a den, yaam Roog fa yaaju kam refo too may yirmande.

³² Ndiiki koy, wo Roog in, Roog fa maak fee mayna katil too a saɗarnoox, wo fee na gayaa ngor ne fo ngiɓoor ne, ba o ɗeet nen tig pooreer naqad ke i ngomna fop, in fo maad in, kelfa in fo saasadax in, duleer in fo daan in fa xeet of fop, no kaa xotitna na jamaane faa maad we Asuur a maadooxoogna boo no ñaal nene.

³³ Wo, kaa o jof no fop ke dalna a in, yaam fesoortaa ngor, soo in o mat, i mbi paaxeer.

³⁴ Maad in fo kelfa in, saasadax in fo daan in ndeefee a cangin of too nan-gilooxee kebil of fo a maƭax ake maƭooxoogoona a den.

³⁵ Ke da ndeeƭna no maat den fop oo fo na baneex fa maak fee ci’’oona a den fo kam saax yaaju le naatna ɓoxot’oona a den, ndagooxirang too mbesee a pi a paaxeer ake den a cinj.

³⁶ Xaye, faɗ i ndefu. Kaam ee faɗ i ndefu kam saax le ci’oona daan in, ndax da muudoor ke lanq ke ten a mbatna fo paax ke ten.

³⁷ Xa tim xa paaxaan axeene kaa ndefan maad we andoona yee kaa o neewand a in mbaambir den yaam pakaad in. Kaa da maadooxaa naa felitna a den took in fo took xa siir in, soo i ndef na naqad fa maak.»