Nehemi 8 - NQAARIIT NE ROOG

¹ Maaga, xeet fee fop a mbokatoora, a ndef o leng, kam Yeerusaleem, na baayo faa jasnoorna fo Ndokand ne no poofi ke. A laya a Esdaraas fee o caajangin oxaa andna a paax kebil ke, ta ɓisiid safe le no kebil ke Moyiis o Yaal oxe a dalnan’ina Ii-isra’el we.

² Esdaraas fee o saasadax a ɓisiida kebil ke mbaambir mbokatax ne ndeeƭna goor fo rew fo fop we andna ke da nanoogna. Keene oxe reeƭa no ñaal eetaand ne no nqool o ɓetuu ƭikandeer onqe.

³ A jangooga no safe le no kaa xotitna no nqes ne boo na waxtu njeeƈ ndeer xoox, na baayo faa jasnoorna fo Ndokand ne no poofi ke, mbaambir goor fo rew fo fop we andna ke layeena. Fop a nan-gilooxooga a paax a cang ale no safe le no kebil ke.

⁴ Esdaraas fee o caajangin oxaa andna kebil ke kaa geenoox’u took ndaalaand a teex ne sipan’eena keene. Na ñamaak um a jeg’a a Matitiya, Sema, Anaya, Uriya, Hilkiya fa Maseya, soo na janoon um ta jeg a Pedaya, Misa’el, Malkiya, Hasum, Hasbadana, Sakari fa Mesulam.

⁵ Esdaraas a weta safe le boo fop a nga’an, yaam ne ta fod’ina maa moƴna o goƭ xeet fee fop took, too maaga fop a inooxa.

⁶ Esdaraas a gidma o Yaal oxe Roog fa maak fee, soo xeet fee fop a yoɗ xa ƥay, a ndoon ee: «Amiini! Yaasam ta jegit neene!» Cinj kaaga, a ƈuuga, a ngung a lanq mbaambir no Yaal oxe, ndax da mbaɗooxin.

⁷ Ye xeet fee a inooxatinna, Yesuwa, Bani, Serebiya, Yamin, Akub, Sabetay, Hodiya, Maseya, Kelita, Asariya, Yosabad, Hanan fa Pelaya, we Leelewi, a tektooga a den kebil ke.

⁸ Kaa njangoogu kam safe le no kebil ke Roog, a njaqtirandan xa ƭeg xa ƭeg soo a nqooldandan, ndax oxuu refna a waag o and ke da njangna.

⁹ Xeet fee fop kaa looloogu, ye da nanna fa lay fee no kebil ke. Maaga, Nehemi fee gofornoor, Esdaraas fee o saasadax, too a ref itam o caajangin oxaa andna kebil ke fo Leelewi we njangnoogna xeet fee a laya a den fop ee: «Bes fene kaa kesanel o Yaal oxe Roog nuun! Ba nu naqadiloox too ba nu lool!»

¹⁰ Esdaraas a ɓaata teen ee: «Nqaadyo, ñaamik ñaamel pelu, yer a yer a pelu too naqan we njegeerna dara kaa da njawna, yaam bes fene kaa kesanel o Yaal in. Ba nu ngooy, ndaa mbelakinooxyo, yaam o Yaal oxe refu doole in.»

¹¹ Leelewi we itam a mba’wooga xeet fee, a layaa yee: «Tiimyo, yaam bes fene kaa kesanel a Roog! Ba nu ngooy boog!»

¹² Maaga, xeet fee fop a ndeta, ndax da ñaam, a yer, a naqan we njeg’eerna dara soo a mbelakinoox a paax, yaam a and’ata ke da lay’eena.

A toofand ale na Xew fee no ƭiif ke

¹³ No ñaal ƭikandeer ne, yaal ƥasil ke na xeet fee fop, saasadax we fo Leelewi we a mbokatoora maa Esdaraas fee o caajangin oxaa andna kebil ke, ndax da moƴ o nan-giloox a cangin ale no kebil ke.

¹⁴ A soƥa ta bindel kam kebil ke Roog a dalin’ina na pexey Moyiis ee Ii-isra’el we a mbara o ngen kam ƭiif, yaa fo a toofand ale na xew fee no nqool ɓetuu ƭikandeer onqe.

¹⁵ A mbara o yegnit soo a lambin kam teeru ke den fop fo kam Yeerusaleem ee: «Ndetyo no joong olaa, mbaaƭiid a naaq taxar oliiw-mbind, a naaq taxar oliiw-a-koƥ, a naaq mirti, a naaq keec fo a naaq taxar niɓu, ndax nu mbi ƭiif, ne ta hebliteena.»

¹⁶ Maaga, xeet fee a ndeta, a mbaaƭiid a naaq, a mbi’an a qoox den ƭiif, oxuu refna no dung-took ole no mbind um, na xa maax axe den, na xa maax axe no Mbind Roog ne, na baayo fee jasnoorna fo Ndokand ne no poofi ke fo fee jasnoorna fo ne Efrayim.

¹⁷ Mbokatax ne no we nomtoortiid’ina no mbaƭ naa fop a mbi’a ƭiif soo a ngen teen. No kaa xotitna na jamaane Yosuwe fee o ƥiy Nun boo no ñaal naaga, Ii-isra’el we ndoofandoogatee xew feene. Ndiiki koy, o mbelekinax o maak a jega.

¹⁸ No ñaal oo ñaal, no ke xotitna no ñaal eetaand ne boo no ñaal mbalakaand ne, Esdaraas a jangooga kam safe le no kebil ke Roog. Xew fee a roofande boo ñaal ɓetuu ƭik, soo no ñaal ɓetuu ndadkandeer ne ta wegtel mbokatax, ne ta dalniteena.