Nehemi 6 - NQAARIIT NE ROOG

Fañ we kaa njeemaa o saɗarin a Nehemi

¹ Sanbalat, Tobiya, Geesem fee o Araab fo fañ in lakas we a yega yee saŋe ne maxatin’uuma jegatee xa ƥaƈit xa leng. Kaa koy, boo na waxtu faaga, wad’afuliim begax ke no tokand ke.

² Maaga, Sanbalat fa Geesem a lultiidaxam ee: «Gari, ndax i nga’ir kam Kefirim, na yulanq alaa Ono.» Kaa nqalaatoogu o mbi’aam paaxeer.

³ Lulaam wiin maa den, ndax da lay a den ee: «Maadaam o jegaa calel mayu kaa waruuma o fadin. Waagiim o gar maaga, yaam calel ke xan a ngeenoox, um xaƴangaa a den, xetik fa nuun.»

⁴ A lultaxam boo a caf a nahak nduleer leng kut ne, too jaf luu refna doonaam a den leng kut ke.

⁵ No jaf ɓetkandeer laa, Sanbalat a lultiidaxam o tag um oxaa saqna o leetar o wegaand.

⁶ Kaa bindel teen ee: «Ŋur-ŋur fee xe kur a ndeer qeet ke mbidna a in, too Geesem itam a layaxam ee wo fo Yaawuur we kaa nu yuuɓaa siiknoor. Ten taxu o maxatinaa saŋe ne. Kaa layeel itam ee kaa o bug o refat o maad den

⁷ too dalnaa duleer sax, ndax da yegnit kam Yeerusaleem ee wo refatu o maad Yudaa. Ndiiki koy, xan keene a rok no yul nof no maad oxe. Gari boog i njoktoor.»

⁸ Lultaam o doonanel o ten ee: «Ke layoona jegee! Keene fop xa peranqol of oo.»

⁹ Den fop koy, a njeemooga o ndiidland a in, a layaa yee: «Xan xa ƥay den a ƥoloox, too calel ke mbi’kataand.» «O Yaal oxe, saƭakinaam no far es!»

¹⁰ Retaam maa Semaya fee o ƥiy Delaya too a ref o ndaan Mehetaabeel waageerna o gar, yaam o fiiq. Semaya a layaxam ee: «Fat i nqetik no Mbind Roog naa, ndok no Mbind tedu naa, mbeg begax ke a paax, yaam xan fañ of a mbariidong, no yeng ole a mbariidkang.»

¹¹ Doonaanum ee: «Xan o koor o podne mi a moof a ƴufaa? O koor o nandu nen a mi, ndax a waaga o rok no sadaxand ole soo a maad o ñoowaa? Ha’aa, rokkiim maaga!»

¹² Maaga, andaam a paax ee Roog luliran, ndaa Tobiya fa Sanbalat ndabid’un, ndax ta jo’taam keene.

¹³ Kaa mbesoor’u neene, ndax um saɗar, reef o as ole Semaya soo bakaad. Maaga, a mbaagkooga o yaq gon es soo a ƥekaam gaci.

¹⁴ «Roog es, wetandooxi ke Tobiya fa Sanbalat a mbi’na fo itam Nowadiya fee o tuleer o tew oxe fo duleer lakas we njeemoogaxama o ndiidland.»

¹⁵ Saŋe ne a maxe no ñaal qarɓeen ƥetik fo ñaal ƭik, a muukel no ñaal qarɓeen ƭik fo ñaal ƥetkandeer no nqool Eluul.

¹⁶ Ye fañ we in fop a yeguuna, qeet ke mbidna a in a njega caƭar, a ngooy tigi. A nga’a yee maq ne no bug ole Roog in a fadnoorit’u.

¹⁷ Na jamaane faaga itam, maak we Yudaa a mbindrooga fa Tobiya xa leetar xa tuqrandu.

¹⁸ O nanangaa keene koy, jaaku no Yuuyudaa we kaa ngiɓoor’u fa Tobiya, yaam ne ta reeƭna o seemir Sekaniya fee o ƥiy Arax, a doon teen Yohanan fee o ƥeem a gilig o ƥiy Mesulam fee refna ref o ƥiy Berekiya.

¹⁹ Wiin weene koy, kaa tagasoogun sax mbaambir es, a njo’tan fa lay es. Tobiya a reta sax boo a xuflaxam fo xa leetar.