Nehemi 4 - NQAARIIT NE ROOG

¹ Ye Sanbalat, Tobiya, Araab we, Aa-amon we fo Aa-Asdod we a yegna yee a qendand ale no saŋe ke Yeerusaleem a ñaaƴa too xa kef axe we suxeel, a mbuuxa boo a mbuɓaa.

² Den fop a yekoora no songiid a Yeerusaleem, a njaxasin.

³ Maaga, i nqeɗa a Roog in soo ndalin a yetax ñaal fo o yeng, ndax i nqoxit a qoox in na den.

⁴ Yaag oo toox de, Yuuyudaa we kaa layoogu yee: «O ndoole reefatee we saqna a toq ale, too kefatin ke a maya lool. I mbaagkee muk o maxatin saŋe ne.»

⁵ Fañ we in o mat kaa layoogu yee: «Yegkee too nga’kee dara boo yaa i naangkaa juux a ndeer den. Xan i mbar a den soo nqaƴnoor calel ke.»

Nehemi kaa fapaa jaajal we

⁶ Yaawuur we ngen’ina paam fañ we a ngara, a maƭoox a in a caf xarɓaxay. Kaa layoogu yee: «Owe songtiidaa a in o saax oo saax!»

⁷ Maaga, payandaam xeet fee ɗuga fo mbiñ ne laqa saŋe ne, maa naagna halit, reefandin na qaw den, da ƥonoox laƥ, a salma fo a qali.

⁸ Ye horooxuuma fop, inooxaam, lay maak we, kelfa ke fo fop we maad’uuna yee: «Ba nu saɗar fañ nuun! Mbetandooxyo o Yaal oxe maginna, a saɗarnoox too nu ñoxoran fog nuun, xa ƥiy nuun xa koor fo xa tew, rew nuun fo pind nuun.»

⁹ Ye fañ we in a yegna yee i maƭooxe, Roog a kasaara’na yuuƥ ne den, too in fop i nomtooxa no saŋe ne, oxuu refna no calel um.

¹⁰ Kaa koy, no kaa xotitna no ñaal naaga, genwal fee no wiin es soom njaloogatu, soo genwal fa lakas fee a saq a salma ke, pegoor ke, a qali ke fo toki celem ke. Kelfa ke kaa yetooxoogu wiin we Yudaa fop.

¹¹ We maxoogna saŋe ne fo we ngadooxoogna mbaat da sufaa a toq ake, ɓay leng a njaltoogu soo o lakas ole a pokoox ƥonax.

¹² Oxuu refna no maamax we kaa liiƈoox’u laƥ um, a jalaa. O luuluuƥ oxe kaa dendoogu fa mi.

¹³ Layaam maak we, kelfa ke fo fop we maad’uuna yee: «Calel ke a magna, a yaaj, too kaa i pictoor no saŋe ne, ngoƭatir.

¹⁴ Mbokatooriidyo me in, no mbiñ onqe nu nanitkaa a luuƥ ale. Xan Roog in a ñoxoran a in.»

¹⁵ Neene i njaltoogatu xotitna no mbuyukuun ne boo na kid-a-caɓru kaa, genwal fee na in a pokoox a salma.

¹⁶ Na jamaane faaga, layahinaam xeet fee yee: «Fat o koor oo koor fo o tag um a mbe’aa kam Yeerusaleem. Neene, xan i yetooxaa no yeng ole, soo no ñaal ne i suur no calel.»

¹⁷ Mi fa xoox es, fog es, dag es fo goor yeeyetax we na yoonaxam i mbolkee toki in. Oxuu refna ƥonax um doŋ a saq’u fa foofi.