Nehemi 2 - NQAARIIT NE ROOG

Nehemi a ci’e o nomtoox Yeerusaleem

¹ No hiid qarɓeen ƭikandeer ole no maat Artaserkesees, no nqool Nisan, xotaam biiñ fee reeƭna mbaambir o maad oxe, ndax um cooxin teen. Ne mos’eeruuma o gooy muk mbaambir um,

² o maad oxe a laamtaxam ee: «Xar taxu o gooy? Yaag oo toox de jiriro. Kam fa mbagu doŋ a waagu ref.» Maaga, diidaam ƭomu,

³ ndaa layaanum ee: «Yaasam o maad oxe a ñoowaa boo faw! Xar taxu gooykiim, too teeru fee daan es a ngaseena a yaqel soo begax ke ten a ndoxel riw?»

⁴ O maad oxe a laamtaxam ee: «Xar bugo bug um fi’anong?» Ndak fo ndak, xeɗaam a Roog fee na asamaan

⁵ soo doon o maad oxe yee: «Daali maad, a soƥangaa yee a jofooxaang, too o tag of a felaang, ci’aam um ret Yudaa, na teeru faa daan es a ngaseena, ndax um maxatinin.»

⁶ Maaga, o maad oxe andoona yee lingeer fee kaa moof’u paam um, a laamtaxam ee: «O ngap o mbodnum o jegkaa na ñaaƈ ale wo fo mban o gatkaa?» O maad oxe a jaɓa o xaƴaam um ret, soo um layin o ngap onqe um jegkaa.

⁷ Layahinaam o maad oxe yee: «Daali maad, a soƥangaa yee a jofooxaang, fat um cooxel xa leetar axaa um lalkaa gofornoor ke na xa cegel axe no mudand ne no xuluɓ ole Ofrat, ndax da nqaƴaam um suur boo yaa um fadkaa Yudaa.

⁸ Fat um cooxel itam o leetar olaa um ɓoxotkaa a Asaf fee na yetooxaa suungaan le no maad oxe, ndax ta cooxaam a teex akaa na njalitkeel no ndokand ne no saŋe ne paam Mbind Roog ne, no saŋe ne na teeru fee fo no mbind ne um genkaa.» O maad oxe a cooxaxam xa leetar axeene, yaam o paaxel ole Roog es a reeƭa fa mi.

⁹ Maaga, retaam maa no gofornoor ke no jegel olaa no mudand ne no xuluɓ ole Ofrat soo ɓoxot a den xa leetar axe no maad oxe. O maad oxe a yoonandit’axam aa-adax no xiixire fo ŋaaŋaay pis.

¹⁰ Ye Sanbalat fee o Hoohoroni fa Tobiya fee o Aa-amon jaloogna no maat ne a yeguuna, sawar’ee tus no ke o kiin a garna, ndax ta jal kaa faaxna no Ii-isra’el we.

Nehemi xe horooxaa ne saŋe ne a nandna

¹¹ Ye fadiiduuma Yeerusaleem, moofaam maaga ñaal tadik.

¹² Cinj kaaga, sutooxaam o yeng, mi fo goor leng-leng, ndaa wetandoox’iim o leng ke Roog es a ɓek’ina no yiif es, ndax um fi’anin a Yeerusaleem. Saq’iim njegel lakas a refangee ne um ŋaayaa.

¹³ No yeng olaaga reefaam no Ndokand naa na yulanq ale, jagin na cur alaa ɓaanoor fo no Ndokand naa no suqi ke. Kaam horooxoogu saŋe ke Yeerusaleem njeg’ina xa kef fo begax ke ten ndox’ina riw.

¹⁴ Suuraam boo no Ndokand naa na cur ale fo no Mbalka naa no maad oxe, too njegel ne ŋaay’uuma jeg’atee maa ta suuritna.

¹⁵ Maaga, ɓeraam kam o yeng ole, reef na yulanq ale Kederon soo ref no horooxaa saŋe ne. Cinj kaaga, nomtooxiidaam, gattiid no Ndokand naa na yulanq ale.

¹⁶ Kelfa ke na teeru fee and’ee me ret’uuma, ne’atiim ke fi’ooguuma. Boo na waxtu faaga, wetandoox’iim dara Yaawuur we mbaat sax saasadax we mbaat garmi ke mbaat kelfa ke mbaat lakas waa saqna o far.

¹⁷ Maaga, layaam a den ee: «Nu nga’a naqad fee i ndefitna de! Yeerusaleem a gefe tuƈ, soo begax ke ten a ndoxel riw. Acayo i maxatin saŋe ke ten, too yaaga i niwaƭarkataand.»

¹⁸ Wetandooxaam a den ne o paaxel ole Roog es a reeƭit’ina fa mi fo ke o maad oxe a lay’axama. Maaga, a mbalalooxa yee: «Acayo i maxatin saŋe ke!» A ndalfooxa o njagandoox fo njambaar, ndax da mbadin a pi a mosu leene.

¹⁹ Ye Sanbalat fee o Hoohoroni fa Tobiya fee o Aa-amon jaloogna no maat ne, fa Geesem fee o Araab, a yeguuna, a ndefa no nqaadnooxaa a in, a nqeef a in soo a layaa yee: «Xar nu mbi’aa? Ndax kaa nu siiknooraa fo o maad oxe?»

²⁰ Doonaam a den ee: «Xan Roog fee na asamaan a fi boo fop in a ñaaƴ. In we dag um, xan i inoox, max, ndaa nuun o mat, nu njegee a las mbaat wargal kam Yeerusaleem, too o leng wetandooxkee a nuun teen.»