Nehemi 13 - NQAARIIT NE ROOG

A supit a pogreer ake Nehemi a garitna

¹ Na jamaane faaga, safe le Moyiis a jangooge mbaambir xeet fee, too a ga’e teen maa ta bindeena yee Aa-amon we fo Moomowaab we mbaree muk o ndok no mbokatax ne no we na mbaɗooxaa a Roog,

² yaam ne da nqetooxiid’eerna Ii-isra’el we fo ñaamel fa foofi. Moomowaab we a ndabid’a sax a Balam, ndax ta saloox Ii-isra’el we. Kaa koy, Roog in a supta a salax aleene barke.

³ Ye Ii-isra’el we a nanna kebil neene, a suta a ndeer den xa kataakoon axe fop.

⁴ Kaa adooxna kaaga, Eliyasib fee o saasadax gadin’e a topatax ale no fo ndok-o-mbulanq ne no Mbind ne Roog in. Ne ta reeƭna o pog Tobiya ŋaƈit,

⁵ a beran’aan a ndok a maak alaa geektoogeena yaaga sadax tuufe-duufe ke, cuuraay fee, ƥaxañ ke, a seek xarɓaxayandeer ale na bele fee, na biiñ fa nqas fee fo na diwliin fee, reeƭna ke heblan’eena Leelewi we, giigim we no Mbind Roog ne fo yeeyetax we na xa ton-maax axe no Mbind Roog ne, fa sadax fee jagandaneena saasadax we.

⁶ Ye keene fop a xewaa, reeƭiim Yeerusaleem, yaam kaam nomtoox’u maa Artaserkesees fee o maad oxe Babilon no hiid qarɓeen tadik fo o hiid o ɗikandeer ole no maat um. Cinj o ngap koy, daawtaam no maad oxe

⁷ kebil o nomtooxiid Yeerusaleem. Maaga, ga’aam paaxeer ke Eliyasib a fi’’ina, ye ta beran’ina a Tobiya a ndok na xa maax axe no Mbind Roog ne.

⁸ Fuuxaam teen lool soo foor tafil a ndok ale tig oo tig ke Tobiya fop.

⁹ Cinj kaaga, heblitaam tok ke a ƥogdel soo um simit ƥaxañ ke no Mbind Roog ne, sadax ke fa cuuraay fee a nomtiidel teen.

¹⁰ Yegaam itam ee a las ake no Leelewi we cooxtoogataand, boo a tax Leelewi we fo giigim we no Mbind Roog ne saq’ina a paɗax ale a ƈuf, oxuu refna no qol um.

¹¹ Xasanaam kelfa ke, laamit a den ee: «Xar taxu Mbind Roog ne a yaacaaneel?» Cinj kaaga, fokataam Leelewi we fo giigim we no Mbind Roog ne soo nomit a den no far den.

¹² Maaga, Yaawuur we fop a ƥisiida a seek xarɓaxayandeer ale na bele fee, na biiñ fa nqas fee fo na diwliin fee kam fo ndok-o-mbulanq ne.

¹³ Gadnaam a yetax ale no fo ndok-o-mbulanq ne a Selemiya fee o saasadax oxe, Saadok fee o piibind oxe fa Pedaya o Leelewi xe soo fokat fa den a Hanan fee o ƥiy Saakur too a ref o ndaan Mataniya, ta dimle’aa a den. Den fop koy kaa ƭeetoogel nen waa ngore’na. A ngadin’e o nqaajrandaa sadax ke a ndeer no fog den.

¹⁴ «Roog es, wetandooxaam yaam keene fop! Ba o weecit ngor ne jalantuuma Mbind Roog ne fo a paɗax ale ten.»

¹⁵ Na jamaane fa leng kut faaga, ga’aam kam Yudaa wiin waa nduutoogna xa tim taxar biiñ kam xa nirand na bes fee na ñootnax ale, waa na ƥisaa a keeg, a sufaa sax biiñ, xa tim taxar biiñ, xa tun fo tig lakas kuu refna took xa paam, a ƥisaa a den Yeerusaleem na bes fee na ñootnax ale. Raagooxaam a den no ñaal naa da njikooxoogna cula den.

¹⁶ A jeg’a itam Tiitiir waa ngenoogna Yeerusaleem. Kaa ƥisiidoogu liƥ fo cula kuu ndefna, a njikooxaa a den Yuuyudaa we fo kam Yeerusaleem na bes fee na ñootnax ale.

¹⁷ Xasanaam garmi ke Yudaa, lay a den ee: «Xar paaxeer kene nu mbi’aa a refu, maasandaa bes fee na ñootnax ale?

¹⁸ Ndax daan nuun mbesoor’ee neene? Ten taxu Roog in a doon a in fa teeru feene taamaala fene fop. Nuun koy, kaa nu ƥaataa fuux le Roog no Ii-isra’el we, yaa nu maasandaa bes fee na ñootnax ale.»

¹⁹ Cinj kaaga, heblitaam ndax tokand ke Yeerusaleem a mbegeel, yaa a kid a njaɓraa, boo bes fee na ñootnax ale a helko fo rokaa, too baa mbetatel a refangee bes fee na ñootnax ale kaa faaf. Doonaam leng-leng no dag es no tokand ke, ndax njula leng rokiidkee na bes fee na ñootnax ale.

²⁰ Jula we fo jiijikax we no cula kuu ndefna a mbe’a jaf leng boo na ƭak sax tafil saŋe ne Yeerusaleem.

²¹ Raagooxaam a den ee: «Xar taxu nu mbe’aa me jasnoorna fo saŋe ne? Nu ƥaatangaan xam damnoor a nuun.» No kaa xotitna maaga ngaroogatee na bes fee na ñootnax ale.

²² Heblaam itam Leelewi we da ƥogdoox soo a yetooxiid tokand ke, ndax da tedland bes fee na ñootnax ale. «Roog es, wetandooxaam yaam keene itam too yirmaam yaam o paaxel o maak of!»

²³ Na jamaane fa leng kut faaga, ga’aam itam Yaawuur waa ngilig’ina rew Aa-asdod, Aa-amon fo Moomowaab.

²⁴ Genwal fee na xa ƥiy axe den a Aa-asdod a layoogu, lakas a layaa lak xeet fa lakas, ndaa o leng na den waag’ee o lay lak fee no Yaawuur we.

²⁵ Xasanaam a den soo saloox a den. Xawaam leng-leng na den soo ɓuut wiil den. Cinj kaaga, daaɓooxnooraam a den no gon Roog da mbañ o ci’tat xa ƥiy den a tolax me no goor jan we mbaat da ngilgan xa ƥiy xa koor axe den mbaat a qoox den rew jan.

²⁶ Laamtaam a den ee: «Ndax refee yee neene Salomo fee o maad Isra’el a bakaadit’u? Jeg’ee o maad oxaa nandna fo ten a ndeer qeet lakas ke fop. Roog um kaa fex’un soo a dalnin o maad Isra’el fop. Yaag oo toox de, ten fa xoox um sax, rew jan we a mbakaadnoor’aan.

²⁷ Ndax i mbarata o nan ta layeel na nuun ee nu mbi’a ngore’aƭar maak na Roog in, yaa nu ngilgaa rew jan.»

²⁸ O leng na xa ƥiy axe Yehoyada, a ref o ndaan Eliyasib fee o saasadax o maak, kaa reeƭu o seemir Sanbalat fee o Hoohoroni. Ten taxu um raxin ta goƭaam.

²⁹ «Roog es, ba o weec muk ne da niwaƭaritna calel no saasadax ke fo ngiɓoor ne wo fo saasadax we fo Leelewi we.»

³⁰ Neene ɓogditum xeet fee no kuu hatna a ngenareem soo ñoowdandatin ke saasadax we fo Leelewi we a mbar’ina o ngay, oxuu refna no far um.

³¹ Dalnatinaam itam sadax ke na xa cuuƭ axe mbareena o ƥisiid no fo ngap ne simteena fo fee no ke eetna o foor no duufe le. «Roog es, wetandooxaam fo o paaxel.»