Nahum 1 - NQAARIIT NE ROOG

¹ Ke na dalkaa teeru fee Niniif. Safe lene kaa fof ke feeñleena a Nahum fee gen’ina Elkos.

O Yaal oxe kaa fuuxanaa fañ um

² O Yaal oxe kaa ref Roog fa naalu faa na rabdinooxaa. O Yaal oxe kaa rabdinooxaa, a fuux boo a buɓaa. Kaa rabdinooxaa took no fañ we ten, a fuuxanaa we mbinqqoorna fo ten.

³ O Yaal oxe kaa muñantaa, doole um a magin, ndaa ñakkee o xaw oxe tooñna. O Yaal oxe kaa ñaaƴaa kam a saaqul ale, a ƭat um a ref kam a und ale, a eel ake a ndef fo ut ole a caf um a yetnaa.

⁴ Kaa ŋalaa o maag ole soo a weernin, a ŋiisin xa quluɓ axe fop, Basan fa Karmel a mbeenjeenj, soo piɗ ke Libaŋ a leeƥ.

⁵ Xa coong axe kaa sendaa mbaambir um, a ñaang ake a sooyaa. Kaa yo’naa lanq ke, adna fa muum fo we ngenna teen fop.

⁶ Ndi an waagu geenoox, yaa ta fuuxna? An waagu waag o foñ fuux ɗomu le ten? Ngañak ne ten kaa biltooxaa nen fiɗel, soo a ƥil ake a qaacooxaa mbaambir um.

⁷ O Yaal oxe a faaxa. Kaa ref ndaɗand yaa fa naqad, a topatooxaa we ngoolooxuuna.

⁸ Kaa koy, xan a saŋkit we mbinqqoorna fo ten o jaɓ ole, a daab fañ we ten boo da nqaad jaaniif.

Ke jaginna na Yudaa fa Niniif

⁹ Xar nu nqalaataa no Yaal oxe? Ten na moocandaa fañ we! Naqad fee dalkee a nuun a caf a ƭak!

¹⁰ A soƥangaa sax ee kaa ndef kol kaa saaƭoorna, a nquƥaa saƥ, xan a ndox riw nen daaƭ laa naagna ŋayam.

¹¹ Na wo Niniif, oxe yuuɓanna o Yaal oxe paaxeer a sutooru, oxe saq’ina yuuƥ caree tus.

¹² Keeke o Yaal oxe a layu wiin we Yudaa: «Ke fañ nuun a mbodna ceŋ too a may fop oo, xan a nduuƴel soo a mooc. Neewandaam a nuun, ndaa fi’katinum.

¹³ Ndiiki koy, xam ɓol kadoor ke da ngadinna a nuun, ɗeg a cengir ake nuun.»

¹⁴ Nuun wiin we Niniif, keeke refu ke o Yaal oxe a heblitna na nuun: «Nu njegkatee xa taan axaa na lawandaa a kon nuun. Xam watnit no mbind ne no roog ke nuun xa taaƴ xa sexe xe fo nitaal cawne ke. Gasaam poy nuun boo ƴut, yaam nu njaree tus.»