Mise 2 - NQAARIIT NE ROOG

Roog xan a xaw we na toroxandaa rool we

¹ Sabab took no we na yuuɓaa paaxeer, a ƭaapaa njofaƭar, yaa da mbondooxna o yeng sax! Njeeƈ ne xaa wataa, da mbadnin, yaam a mbaagin.

² Kaa yaawaa xa qol soo a njaɓ a den, a yaaw pind soo a ndoon teen o ɓay. Kaa toroxandaa o kiin fo mbind um, o kiin fo lanq ke ta lamna.

³ Ten taxu keeke o Yaal oxe a layu: «Nga’yo, mexe yuuɓanaa fiifi paaxeer nandu ne nuun taamaala. Nu ndaɗkee a qaw aleene, too nu ñaaƴkatee xa cok nuun took, yaam waxtu o njakad oo.»

⁴ A koom xan nu naxoorteel, ngimaneel a kim a ƭomatax alene yee: «I ngefe tuƈ! Saax le na xeet es a cooxe lakas. A jaɓe na mi, fañ we a nqaajrandel lanq in.»

⁵ Ten taxu o leng na nuun daawkee a las no lanq ke xeet fee no Yaal oxe a ƭegirkaa.

We na ñimnaa yegnit ne no tuleer oxe

⁶ A jega waa na layaxam ee: «Ba o lay xa ƥaral! Baa padafuleer nandu neene a yegnitel! Gaci faaga dalkee a in muk!

⁷ Ndax mbind Yakoob kaa salooxel? Ndax o Yaal oxe kaa jegatee o muñ? Ndax neene a fesooraa? Ndax fa lay um felee no we na ñaaƴtaa o cofel?»

⁸ Kaa koy, o Yaal oxe a doona a nuun ee: «Kaa nu mbañraa fa xeet es, mbolaa sabadoor no xe refna no yaadax xalaateerna o ñoxorel muk.

⁹ Kaa nu ndaxtaa rew we na xeet es no pind ke da mbexna, suqtaa na xa caaƈ axe den ke barke’tuuma a den.

¹⁰ Inooxyo, ndet, yaam meeke refatee o ñootnooxand! Xan nu njeg xa ƭomel tigi, yaam ne nu nqoolaƭarandna a qoox nuun!»

¹¹ A jeg’angaa oxaa na yegnitaa xa koɓong, a maaɓaa a nuun ee: «Biiñ fo a yer a qaaɗu xan a naang gañ», oxeene waagkoogu refan xeet fene o tuleer.

Xan Roog a nomit a Isra’el ne ta reeƭna

¹² O Yaal oxe kaa tee: «Nuun xa taan axe Yakoob, a woora yee xam fokat a nuun, nuun we yoqna na Isra’el, um koltirand a nuun, korolit a nuun nen paal kam ged, too xan saax nuun a may fo combol no wiin sawaru nen o suufand olaa mayna gañ fo paal fo pambe.»

¹³ Oxe na halkaa a ƭat ale xan a adooxan a den. Xan a sex o gur, a ndeef no ndokand ne, a sutoox. O maad den xan a fodan a den mbaambir, o Yaal oxe xan a adooxan a den.