Mberaand 9 - NQAARIIT NE ROOG

Ke Roog a regna a Nowe

¹ Roog a barke’a a Nowe fo xa ƥeem, a lay a den ee: «Ndimikyo, mayƭandik lanq ke.

² Muumeen ke na koƥ ale fop fo tiiƭ ke na asamaan fop fo ke na ɓoodaa a lanq fop fo liƥ ke no maag ole fop xan a ndiidaa a nuun, a saɗar a nuun.

³ Ke na yo’nooxaa fop too a ñoowaa fat a refik ñaamel nuun. Ci’aanum a nuun ne fi’tanuuma no duufe le.

⁴ Kaa koy, nu ñaamkee med, a tegeƴ fo fo’oy um, yaam fo’oy saqu o ñoow.

⁵ Fat nu yeg fo and koy ee muumeen fuu warna o kiin, o ñis um a rabditkaa ole no kiin oxeene. O kiin oxuu warna o kiin o lakas itam, o ñis um a rabditkaa ole no kiin oxeene.

⁶ O kiin oxuu ɓaxna fo’oy no kend um, xan o lakas a ɓax fo’oy um, yaam Roog kaa sak o kiin ta ref nitaal um.

⁷ Nuun o mat, ndimikyo, mayƭandik lanq ke.»

⁸ Roog a layahina a Nowe fo xa ƥeem ee:

⁹ «Mi koy, xam dalin fa nuun ngiɓoor, dalnin fo xa taan nuun

¹⁰ fo pindel ke ndefna fa nuun a ñoowaa, xotitna no tiiƭ ke boo no cegel ke fo muumeen ke fop took lanq ke fo fop ke sutoorna na kaal ale, muumeen ke no lanq ke fop.

¹¹ Dalnaam ngiɓoor es fa nuun. Njer nuu refna saŋkitkataand poofi ke no jaɓ ole, too o jaɓ jegkatee ndax ta yaq lanq ke.»

¹² Roog a laya yee: «Keeke refu o anddiloor ole no ngiɓoor ne dalnuuma a ndeer es fa nuun fo pindel ke na ñoowaa fop ndefna fa nuun yaam suk ke na ngaraa:

¹³ Mexe doonaa a ñang-ee-ñang es na eel ake, ta ref o anddiloor ngiɓoor ne ndeer es fo lanq ke.

¹⁴ Yaa um fokatkaa a eel ake da yooroox lanq ke, xan a ñang-ee-ñang ale a feeñ na eel ake.

¹⁵ Maaga, xam wetandoox ngiɓoor es fa nuun fo pindel ke na ñoowaa fop, too poofi ke mbi’katee o jaɓ muk ndax da saŋik fop ke njegna njer.

¹⁶ A ñang-ee-ñang ale xan a feeñ na eel ake, um ɗeetan ndax um wetandoox ngiɓoor ne na refkaa boo faw a ndeer Roog fo pindel ke na ñoowaa fop took lanq ke.»

¹⁷ Roog a laya a Nowe yee: «Keene refu o anddiloor ole no ngiɓoor ne dalnuuma a ndeer es fo fop ke njegna njer too a ref took lanq ke.»

Xa ƥiy xa tadaq axe Nowe

¹⁸ Xa ƥiy axe Nowe sutoor’ina na kaal ale ndeeƭu Seem fa Xaam fa Yafet. Xaam reeƭu faap Kanaan.

¹⁹ Xa ƥiy xa tadaq axeene na Nowe axu qeet ke na adna fee fop.

²⁰ Nowe a refa no xooxaa lanq ke, soo a jimb a ƭing taxar biiñ.

²¹ A yera biiñ boo a way, soo a yoq o ƥor kam ƭiif um.

²² Xaam fee faap Kanaan a ga’a o ƥor ole faap um a yoqna, soo a ret tafil a laykin fog faap we ten.

²³ Maaga, Seem fa Yafet a nqota sabadoor, a mbi’in na kand den, a ñaaƴtaa o jiijing soo a ndokin a faap den. Kaa nquun’u boo nga’ee o ƥor ole faap den a yoq’ina.

²⁴ Yaa Nowe a salidna no way le ten, a yega ke mbat-fo-ɗeen ne ten a fi’’uuna.

²⁵ Maaga, a laya yee: «Kanaan a salooxe, fat a ref no maag we ten o paɗ oxe moƴna o hees!»

²⁶ A layahina yee: «O Yaal oxe Roog fee Seem a hela o simatel. Yaasam Kanaan a ref o paɗ Seem!

²⁷ Yaasam Roog a xayand o jeg Yafet! Yaasam ta gen no ƭiif ke Seem, soo Kanaan a ref o paɗ den!»

²⁸ Ye o jaɓ ole a faafna, Nowe a ñoowahina xa kiid teemeed tadik fo xa kiid qarɓeen ƥetik.

²⁹ Nowe a ñoowa fop oo fop xa kiid teemeed ɓetuu nahik fo xa kiid qarɓeen ƥetik, soo a xonkaa.