Mberaand 8 - NQAARIIT NE ROOG

¹ Roog a wetandooxa a Nowe fo muumeen ke fo cegel ke ndeeƭna fo ten na kaal ale fop. Roog a wuuɗa nqeñ took lanq ke soo poofi ke a mbaajoox.

² A cur ake no poofi ke na juwaam fee fo pand ke na asamaan a ndalfooxa o sux, soo a teƥ ale a simid.

³ Poofi ke a qicooxa no lanq ke o ndang o ndang soo a mbañooxaa. Cinj ñaal teemeed fo ñaal qarɓeen ƥetik, a ndefa no mbañooxaa.

⁴ No ñaal xarɓaxay fo ñaal ɓetuu ƭikandeer ne no nqool o ɓetuu ƭikandeer onqe, a kaal ale a geenooxa took xa coong axe Araraat.

⁵ Poofi ke a ndefa no mbañooxaa rek boo no nqool o xarɓaxayandeer onqe. No ñaal eetaand ne no nqool onqaaga xa cul axe na xa coong axe a mbeeña.

⁶ Cinj ñaal qarɓeen nahik, Nowe a weta o falangteer ole ta fi’an’ina a kaal ale.

⁷ A xaƴa a tooq, ta retaa a garaa boo neen poofi ke a ŋiisu took lanq ke.

⁸ A xaƴa itam a nuukuur ale boo a ɗeet ndax poofi ke a mbañooxa took lanq ke.

⁹ Kaa koy, a nuukuur ale jeg’ee maa ta dongna, too a nomtooxiida na kaal ale, yaam foofi le kaa maad’u took lanq ke fop. Nowe a letna o ɓay um a xotin, soo a ɓekin kam a kaal ale, ta ref fo ten.

¹⁰ A cungahina ñaal ɓetuu ƭik lakas, soo a ɓaat o xaƴ a nuukuur ale ta sutoox a kaal ale.

¹¹ A nuukuur ale a nomtooxiida me ten no kirand naa, a siiñ a naf ndaxar oliiw. Neene, Nowe a anda yee poofi ke a mbañooxa took lanq ke.

¹² A ɓaata o muñ ñaal ɓetuu ƭik lakas. Cinj kaaga, ta xaƴ a nuukuur ale. Kaa koy, a nuukuur ale nomtooxiidatee me ten.

¹³ No hiid teemeed ɓetuu fo lengandeer ole, no ñaal eetaand ne no nqool o eetaand onqe, poofi ke a ŋiisa took lanq ke. Nowe a watna bomb le na kaal ale, a ɗeet soo a ga ee lanq ke a ƥuusa.

¹⁴ No nqool o ƭikandeer onqe, no ñaal qarɓeen ƭik fo ñaal ɓetuu ƭikandeer ne no nqool onqaaga, lanq ke a mbeera koroŋ.

¹⁵ Maaga, Roog a laya a Nowe yee:

¹⁶ «Sutooxi a kaal ale, wo fo o teef fo xa ƥeef fo rew den.

¹⁷ Suti xa qos muumeen axe ndefna fa wo fop, tiiƭ ke fo muumeen ke fo ƥood ke. Fat da pictoor no lanq ke, a ndimik, a mayƭandik adna fee.»

¹⁸ Naaga, Nowe a sutooxa, ten fo xa ƥeem fo o teem fo rew na xa ƥeem.

¹⁹ Muumeen ke fop fo ƥood ke fop fo tiiƭ ke fop fo ke na yo’nooxaa took lanq ke, o xos oluu refna teen a sutooxa a kaal ale.

²⁰ Nowe a maxana o Yaal oxe o sadaxand, a xot no muumeen qoolu ke fop fo no tiiƭ qoolu ke soo a ɓoxot sadax toxel took o sadaxand ole.

²¹ O Yaal oxe a yega tuñ pelu soo a lay no xeeñ um ee: «Salooxkatiim lanq ke muk yaam o kiin, ke xeeñ um a yuuɓaa paaxeer fop oo no ke xotitna no ndeƥandoong um, too saŋikkatiim ke na ñoowaa fop ne fi’it’anuuma.

²² Feek lanq ke we maadaa, a tuup fo a saxad, a ƥuuɓ fo a sumaan, ñaal fo o yeng ñakkatee muk.»