Mberaand 7 - NQAARIIT NE ROOG

Nowe a roka na kaal ale

¹ O Yaal oxe a laya a Nowe yee: «Roki na kaal ale, wo fo ƥasil of fop yaam ga’aam ee kaa o jof mbaambir es a ndeer suk neeke.

² No muumeen ke naangaandeena o ndiimbaa fop, xoti teen koor ɓetuu ƭik fo tew den, no ke na ndiimbeel koy, o xot teen ngoor fo ndew no xos oluu refna.

³ Tiiƭ ke na asamaan itam, xoti no xos oluu refna ngoor fo ndew boo ɓetuu ƭik ndax o xos den a ñoowaa took lanq ke.

⁴ Ndeer mene fo ñaal ɓetuu ƭik xam deɓiid took lanq ke boo ñaal qarɓeen nahik fo xa yeng den. Neene, xam moocand ke sakuuma fop took lanq ke.»

⁵ Nowe a fi’ta fop ne o Yaal oxe a heblit’uuna o ten.

O jaɓ o maak ole

⁶ Nowe xe jeg’a xa kiid teemeed ɓetuu fa leng no hiid ole o jaɓ o maak olaa a garna took lanq ke.

⁷ Nowe fo o teem fo xa ƥeem fo rew den a ndoka na kaal ale ndax da muc no poofi ke no jaɓ ole.

⁸ A ndeer muumeen ke naangaandeena o ndiimbaa fo ke na ndiimbeel, tiiƭ ke fo ƥood ke fop,

⁹ ngoor fo ndew no xos oluu refna a ndoka na kaal ale fa Nowe, ne Roog a heblit’uuna o ten.

¹⁰ Cinj ñaal ɓetuu ƭik, poofi ke no jaɓ ole a ngara took lanq ke.

¹¹ No hiid teemeed ɓetuu fa lengandeer ole no ñoow Nowe, no ñaal xarɓaxay fo ñaal ɓetuu ƭikandeer ne no nqool o ƭikandeer onqe, poofi ke na juwaam fee a ndalfooxa mbaɓir, pand ke na asamaan a mbetoox.

¹² A refa no deɓaa took lanq ke boo ñaal qarɓeen nahik fo xa yeng den.

¹³ Ñaal naaga sax sax, Nowe fa Seem, Xaam fa Yafet we xa ƥeem fo o tew oxe Nowe fo rew na xa ƥeem a ndoku na kaal ale,

¹⁴ den fo xa qos muumeen axe fop: Cegel ke, o xos oluu refna teen fo xa qos ƥood axe na ƥoodaa took lanq ke fop, tiiƭ ke fop fo xa qos den fo fop ke jegna a nafir too a yetaa.

¹⁵ Kuu na ñoowaa, ngoor fo ndew, a ndoka na kaal ale paam Nowe.

¹⁶ Ngoor fo ndew no ke saqna njer, a ñoowaa fop, a ndoka na kaal ale, ne Roog a heblit’uuna a Nowe. Cinj kaaga, o Yaal oxe a wega begax ne na kaal ale.

¹⁷ A teƥ ale no jaɓ ole a reta boo no ñaal qarɓeen nahik. Poofi ke a ŋaaya, soo a yoɗ a kaal ale ta rayaa.

¹⁸ Poofi ke a moƴa o may tigi took lanq ke, soo a kaal ale a rayaa took poofi ke.

¹⁹ Poofi ke kaa moƴ’u moƴ o mayaa took lanq ke, xa coong xa cigdu xe ɗuga asamaan fee kaa ƭuud’el.

²⁰ Poofi ke a muura xa coong axe boo a njolit a den took ngap xa noonoong xarɓaxay fo xa noonoong xa ƥetaq.

²¹ Ke ñoowoogna took lanq ke fop a saŋkooxa, ta ref tiiƭ ke boo no cegel ke fo muumeen ke fo fop ke na yo’nooxaa took lanq ke fo pindeef ke fop.

²² Ke jegna o ñis fop too a haaƭoogu took lanq beeru ke a xona.

²³ Roog a moocanda pindel ke ndeeƭna took lanq ke fop. Fop a moocande no lanq ke, Nowe fo we ndeeƭna fo ten na kaal ale soom yoq’u.

Nowe a sutooxa a kaal ale

²⁴ Poofi mayu ke a ndeeƭa took lanq ke boo ñaal teemeed fo ñaal qarɓeen ƥetik.