Mberaand 6 - NQAARIIT NE ROOG

Njofaƭar ne no kiin

¹ Ye wiin we a siwiidaa took lanq ke, boo a ndimaa xa ƥiy xa tew,

² xa ƥiy xa koor axe Roog a nga’a yee xa ƥiy xa tew axe no wiin we a mosa lool, a ndalfooxa o njil na xa ƥiy xa tew axeene rew, a ngilig a den.

³ Maaga, o Yaal oxe a laya yee: «Yiif es genkee no xoxtaa o kiin kujumaani cay, yaam o kiin njer rek a refu. Ndiiki hapanaanum xa kiid teemeed fo xa kiid qarɓeen ƭik.»

⁴ Na jamaane faaga, wiin fodu ne sabab a ndeeƭa took lanq ke. Ye xa ƥiy xa koor axe Roog a ngiligna xa ƥiy xa tew axe no wiin we boo a ndim fa den xa ƥiy, weene ndeeƭu a salma-koor ake yaa fa yaaga.

⁵ O Yaal oxe a ga’a yee coxod ne no wiin we a magna lool took lanq ke, too ñaal nuu refna a qalaat den paaxeer rek a yuuɓaa na qeeñ den.

⁶ O Yaal oxe a ricooxa ke taxna ta fi o kiin took lanq ke, soo xeeñ um a gooy.

⁷ O Yaal oxe a laya yee: «Xam moocand took lanq ke o kiin oxe sakuuma, ke xotitna no wiin we boo no cegel ke fo ƥood ke fo tiiƭ ke na asamaan, yaam ricooxaam tigi ke taxna um fi a den!»

⁸ Kaa koy, Nowe a daawa yirmande fee no Yaal oxe.

Roog a hebooxa o wuus a Nowe

⁹ Keeke refu a kon ake na xa taan axe Nowe. Nowe kaa reeƭu o kiin o cofu o cegee ŋañel na jamaane um, too a ñaaƴooga fa Roog.

¹⁰ Nowe a rima xa ƥiy xa tadaq, da ndef: Seem fa Xaam fa Yafet.

¹¹ Wiin we kaa laawoox’u mbaambir Roog, lanq ke a may fo a pi a yednu.

¹² Roog a ga’a yee wiin we kaa yaqoox, a laawoox, o kiin oo kiin a xot a ƭat a paaxeer um took lanq ke.

¹³ Maaga, Roog a laya a Nowe yee: «Kaam heboox o moocand fop ke na ñoowaa. Lanq ke kaa may fo ngiin fo’oy yaam den. Xam moocand a den boog fo lanq ke.

¹⁴ Daaƴoodi a kaal fo a patax gofeer. Fat o fi’anin fo ndok fo ndok, laarin kam oo tafil oo, boo foofi waagkee rok teen.

¹⁵ O cigdel ole na kaal ale xan a ref xa noonoong teemeed tadik, o yaajel ole a ref xa noonoong qarɓeen ƥetik, soo geel um a ref xa noonoong qarɓeen tadik.

¹⁶ Fat o bombin, xaƴanin o wooƥ olaa fi’na o noonoong ndeer bomb le fo a kiig ale na xa saax axe. Fat o fi’anin o don-maax olaa garitna no saax o leng. Fat o fi’anin taax-took ƭikandeer fo ndadkandeer.

¹⁷ Mi o mat, xam ɓisiid o jaɓ o maak ole took lanq ke ndax um saŋik fop ke jegna njer too a ñoowaa ɗuga asamaan fee. Fop ke refna took lanq ke xan a mooc.

¹⁸ Kaa koy, xam dalin fa wo ngiɓoor. Fat o rok na kaal ale, wo fo xa ƥeef fo o teef fo rew den.

¹⁹ Fat o rokin kam a kaal ale itam muumeen ƭik no xos oluu na ñoowaa, ngoor fo ndew, ndax da muc fa wo.

²⁰ Ngoor fo ndew no xos oluu refna: Tiiƭ ke, muumeen ke fo ƥood ke no lanq ke, xan a ngar me wo, ndax o mucil a den.

²¹ Wo o mat, waaƭi no fop ke waageena o ñaam, yaxandooxeen paam of ndax keene a ref ñaamel of, wo fa den.»

²² Nowe a fi’ta fop ne Roog a heblit’uuna o ten.