Mberaand 48 - NQAARIIT NE ROOG

Yakoob a barke’a xa ƥiy axe Yoseef

¹ Yaa kaaga a faafna, Yoseef a yegniide yee: «Faap of kaa jir.» Yoseef a xota xa ƥiy xa koor xa ƭaq axe ten ndefna Manaase fa Efrayim, soo a ret.

² Yakoob a yegne yee Yoseef fee o ƥeem a ɗeetiidaan. Isra’el a saƭakinooxa boo a moof o ndeƈin no njong um.

³ Yakoob a laya a Yoseef ee: «Roog o Cegu katil oxe a feeñoor’axam Luus no saax laa Kanaan, soo a barke’aam.

⁴ Kaa lay’aam ee: ‹Xam ci’ong xa taan xa mayu, ndax um fi’ong o ref o taan xeet fa maak. Saax leeke, xam ci’in xa taan of da njegkin boo faw.›

⁵ Ndiiki koy, xa ƥeef xa ƭaq axe ndimteena Misira ye um helkaa fo gar meen, mi na jegkaa a den. Efrayim fa Manaase xan a ndef xa ƥees nen a Ruben fa Simewon.

⁶ Xa ƥiy axe o jegkaa a cinj den o mat xan a ndef xa ƥeef. No lam den xan da ne’el na kon no maag den.

⁷ Ye inooruuma Padan, Rakel a xonta Kanaan na kid es, a soƥ i mbaambnoox a Efrata. Gasaanum maaga Betleheem, refna ref na ƭat ale Efrata.»

⁸ Isra’el a ga’a xa ƥiy axe Yoseef, soo a laamit ee: «Aniin oo wene koy?»

⁹ Yoseef a doonaan ee: «Xa ƥees axe Roog a ci’axama meeke yoo.» Isra’el a layaan ee: «Matandiidaam a den ngela, boo um barke a den.»

¹⁰ A kid ake Yakoob kaa niifaar’atu yaam nogoy ne, waag’atee a ka. Yoseef a matandiida a den me ten, soo a foon a den, a farakoox a den.

¹¹ Isra’el a laya a Yoseef ee: «Foog’atiim muk ee xam ga’ong, ndaa ga’aano, Roog a fi’a bo um ga sax xa ƥeef.»

¹² Yoseef a inta a den no kuɓay ke faap um, soo a gung a lanq.

¹³ Cinj kaaga, Yoseef a xota a den, den ɗik fop. A dama a Efrayim no ɓay o ñamaak, a farnin no ɓay o janoon ole Isra’el, soo Manaase ta damin no ɓay o janoon, a farnin no ɓay o ñamaak ole faap um.

¹⁴ Isra’el a letna o ɓay um o ñamaak a doonin took xoox le Efrayim fee o ndeɓ, soo o ɓay um o janoon, ta doonin took xoox le Manaase. A and’a a paax koy ke ta fi’oogna fo xa ƥay axe ten, ke Manaase a reeƭna taaw fop oo.

¹⁵ A barke’a a Yoseef ee: «Yaasam Roog fee Abraham fa Isaak, we daan es a ñaaƴoogna mbaambir um, yaasam Roog fee na gayaxam no kaa xotitna no ñaal naa rimeema boo xaye,

¹⁶ yaasam malaaka fee wataxama no paaxeer kuu refna a barke xa koor axene! Fat da lastiteel gon es fo a kon ake no daan es Abraham fa Isaak. Yaasam da njeg xa taan xa mayu muu refna kam saax le.»

¹⁷ Yoseef a ga’a yee faap um kaa doon’u o ɓay um o ñamaak took xoox le Efrayim, too kaaga fel’iran. A dama o ɓay ole faap um ndax ta ɓakandin took xoox le Manaase.

¹⁸ A laya a faap um ee: «Baa, refee neene de, yaam oxene refu taaw fee. Dooni o ɓay of o ñamaak took xoox um.»

¹⁹ Faap um a faña soo a layin ee: «Andaam kaaga de, o ƥees! Andaanum, ten itam xan a ref o taan xeet fa maak, a saqit. Kaa koy, o ndeɓ um na hupkan, too xan xa taan um a mayƭand qeet ke fop.»

²⁰ A barke’a a den no ñaal naaga, a lay ee: «Na wo Isra’el a barke’itkaa yee: ‹Yaasam Roog a mayƭandong nen a Efrayim fa Manaase.› » Neene mat a fi’tu boo Efrayim a hupat a Manaase.

²¹ Isra’el a laya a Yoseef ee: «Andaam ee ndiiki um xon. Kaa koy, xan Roog a ref fa nuun, too xan a nomit a nuun no saax le no daan nuun.

²² Mi koy, ci’aaxoong a las alaa hupna ale no fog faap of, ale jaɓtuuma no Aa-amori we fo laƥ es fo a qali es.»