Mberaand 42 - NQAARIIT NE ROOG

Yakoob a lula xa ƥeem Misira

¹ Yakoob a yega yee bele a jega Misira. A laya xa ƥeem axe yee: «Xar taxu nu ƭeetraa neeke?

² Nanaam ee bele a jega no saax laa Misira. Ndetyo njikik maaga ñoowir ndax nqeex ne warkee a in.»

³ Fog faap xarɓaxay we Yoseef a ndeta Misira, ndax da njikik bele.

⁴ Yakoob waas’ee a Bensame fee o ndeɓ Yoseef ta yoon fa den, yaam ndik taamaala a soƥin teen.

⁵ Xa ƥiy axe Isra’el fop a njikiida bele nen lakas we ngaroogna, yaam biim le a fad’a boo no saax laa Kanaan.

Yoseef a xijla maag we ten

⁶ Yoseef kelfa a reeƭu kam saax laa. We no saax laa fop ten jikooxoogu a den bele. Fog faap we ten a ngara, a ngung a lanq mbaambir Yoseef.

⁷ Yoseef a ga’a fog faap we ten, a andid a den, soo a juumaaroox a den, a ŋal a den ee: «Mam nu inooru?» A ndoonaan ee: «No saax laa Kanaan i inooru, njikiid kaa i ñoowitna.»

⁸ Yoseef a andda fog faap we ten, ndaa den o mat anddiran.

⁹ Yoseef a wetandooxa xa ƭaaɗ axe ten no kaa farna na den, soo a lay a den ee: «Hoohorax nu ndefu, o and me saax le a yooɓeena o gefit doŋ ɓisiidu a nuun!»

¹⁰ A ndoonaan ee: «Ha’aa de yaal mbind! In we dag of, kaa i ngar njikiid bele.

¹¹ In fop, faap fa leng kut rimu a in, ndigil kak i layaa, in we dag of, i ndefee hoohorax.»

¹² A laya a den ee: «Refee ndigil tus! O ngoroox boo and me saax le a yooɓeena o gefit doŋ taxu nu ngar.»

¹³ A ndoonaan ee: «In we dag of, xarɓaxay fo ɗik i ndefu waa mbogna a faap fa leng kut no saax laa Kanaan. Oxe moƴna ref o ndeɓ koy, oxaay fa faap in xaye, too a jega oxaa maadateerna.»

¹⁴ Yoseef a laya a den ee: «Kaam lay a nuun xatoor ee hoohorax nu ndefu.

¹⁵ Um ñak a Firawon fee, xan i ƭeet ndax ndigil nu layaa ndax nam. Nu sutooxkee mene, a refangee kaa o ndeɓ nuun a gariid.

¹⁶ Fat o leng na nuun a xotkin. Nuun we yoqna, nu mbegel kaso. Um ñak a Firawon fee, xan fa lay nuun a ɓaalel. Xam and ndax ndigil nu layaa, ndax hoohorax nu ndefu.»

¹⁷ Yoseef a wegnoora a den boo ñaal tadik.

¹⁸ No ñaal ndadkandeer naa, Yoseef a laya a den ee: «Mbi’yo kene, too xan nu ñoow, yaam saɗaraam a Roog!

¹⁹ A soƥangaa yee ke nu layaa oxey na nuun, fat o leng na nuun a yoq kam kaso fee, soo nu ndet ƥis bele fee ndax nu ñoownik ƥasil nuun.

²⁰ Fat nu ƥisiidaam o ndeɓ nuun o ngoor onqaaga, ndax fa lay nuun a fetoox, neene nu nqonkee.» A mbi’a naaga.

²¹ A layra a ndeer den ee: «Ga’na rek, kene kaa dal a in yaam ke i mbi’na o pog faap oxe in. I nga’a naqad um ye ta xeɗooxaa a in, ndaa i mbug’iran o nan-giloox! Ten taxu xaye in wey na naqad.»

²² Ruben a laya a den ee: «Ndax lay’iim a nuun ee ba nu mbi o goor olene paaxeer? Kaa nu mbañ’aam o nan-giloox. Ndiiki koy, fo’oy um a yena took in.»

²³ Den koy, and’ee yee Yoseef a nanra fa den, yaam ne ta jiriiñooroogna o laalapatax ndax ta lay fa den.

²⁴ Yoseef a riƈatooxa a den ndax ta lool. Cinj kaaga, Yoseef a nomtooxiida, a lay fa den. A dama a Simewon, a jengtin na kid den.

Xa ƥiy axe Yakoob a nomtooxa Kanaan

²⁵ Yoseef a hebla yee xa saaku xe den a soɗel bele boo a may, xaaliis fee no xuu refna a nomtel no saaku um, soo da cooxel kaa da yaxandooxanna a ƭat ale. Kaaga a fi’e.

²⁶ A sufayo bele fee took xa paam den, soo a ndet.

²⁷ O leng na den a wokta o saaku um, ndax ta yipan o faam um ta ñaam no mbiñ onqaa da mbe’na, a ga xaaliis fee ten reeƭna no don ole no saaku le.

²⁸ A laya yoon um ee: «Xaaliis fee mi kaa nomtiidel, oxey no saaku le mi» Maaga a njaaxɗa, a ndiid, soo a layraa a ndeer den ee: «Xar Roog a fi’u a in?»

²⁹ A ngata me Yakoob fee faap den kam saax laa Kanaan, soo a mbetandooxin fop ke dal’ina a den ee:

³⁰ «O koor oxaa refna o yaal saax laa kaa ŋal’u a in, soo a jamb a in hoohorax.

³¹ I layaan ee: ‹No ndigil, i ndefee hoohorax.

³² A qoox xarɓaxay fo a qoox a ƭak faap in a jegu, a jega koy oxaa maadateerna, fo xe moƴna neew, oxaaga xaay fa faap in xaye no saax laa Kanaan!›

³³ Oxe refna o yaal saax laa koy a laya in ee: ‹Neeke um anditkaa yee ndigil nu layaa: Nqaƴyo me mi o leng na nuun, nu mbaaƭ kaa nu ñoownitna ƥasil nuun soo ndet. Fat nu ƥisiidaam o ndeɓ nuun onqaaga.

³⁴ Neene, xam and ee nu ndefee hoohorax too ndigil nu layaa. Xam nomit a nuun o pog nuun, too xan nu mbaagat o ñaaƴaa muu felna a nuun kam saax le o cok nuun took.› »

³⁵ Ye da yiƥadooxna xa saaku xe den, oxuu refna a ga’a xaaliis um no saaku le. A nga’aan, den fa faap den, soo a ndiid.

³⁶ Yakoob fee faap den a laya a den ee: «Kaa nu ñaknooraxam, xa ƥees! Ee! Yoseef a mooca, Simewon ga’ataand, soo nu ndek mbugahin o ƥis a Bensame! Coono keene fop took es a mbodu!»

³⁷ Ruben a laya a faap um ee: «Dooni a Bensame na xa ƥay es too xam nomtiidong o ten. Um nomtiidangirang o ten, fat o war xa ƥees xa ƭaq axe.»

³⁸ Yakoob a doonaan ee: «O ƥees yoonkee fa nuun, yaam o maag um a xona, ta yoqat koƭong. Tig a damangaan na ñaaƈ ale, a woora yee naqad tigi um ɓiskaa jaaniif.»