Mberaand 39 - NQAARIIT NE ROOG

Yoseef maa Potifaar o Miimisira xe

¹ Ii-isma’el we njik’ina a Yoseef a ƥisaan Misira, soo Potifaar fee o leng no kelfa ke no maad oxe too a ref o aa-adax no yeeyetax we no mbind Firawon fee a jikit a Yoseef no Ii-isma’el we ƥisiid’uuna Misira.

² O Yaal oxe a reeƭa fa Yoseef boo no kuu ta rok’ina rek a suur teen. Yoseef no mbind no yaal mbind um oxe jik’uuna a genoogu.

³ O yaal mbind um a ga’a yee o Yaal oxe xey fa Yoseef, boo no kuu oxeene a ɓek’ina o ɓay um rek, o Yaal oxe a barke’in.

⁴ Neene, Yoseef a daaw’a yirmande no yaal mbind um fi’uuna ta jalanan, a dalnin no mbind um, a doxnin o jeg um fop.

⁵ No kaa xotitna yaa Potifaar a dalnuuna no mbind um, a doxnin o jeg um fop, o Yaal oxe a barke’a mbind Potifaar yaam Yoseef. Barke fee no Yaal oxe a reeƭa no fop ke Potifaar a jegna, ta ref no mbind ne, ta ref na xa qol axe.

⁶ Kaa xaƴ’u na xa ƥay Yoseef fop ke ta jeg’ina, too ten fa xoox um topatooxoogatee dara lakas a refangee ñaamel um. Yoseef koy o fes o mosu a reeƭu.

Yoseef fo o tew oxe no yaal mbind um

⁷ Ye keene fop a xewna, o tew oxe Potifaar a ɗeetooga a Yoseef boo a layin ee: «Gari wondoox fa mi.»

⁸ Yoseef a faña, a doon o tew oxe no yaal mbind um ee: «Ga’i, o yaal mbind es andaniraam dara kam mbind ne, kaa jolna keene o jeg um fop ta doonin no ɓay es.

⁹ Ten fa xoox um sax hupatiraam no mbind nene, too fañtiraam dara bo ta yoqaa wo, yaam o teem refo. Nam waagum boog o fi’it paaxeer nandu neene, soo tooñ a Roog?»

¹⁰ Ke o tew oxe a layoogna fa Yoseef ñaal nuu refna fop oo, a faña o wondoox fo ten.

¹¹ Bes, Yoseef a roka kam mbind ne, ndax ta jal calel um, too o lakas reeƭee maaga no wiin we no mbind ne.

¹² O tew oxe a gara, a dam a Yoseef no ndoki, a layin ee: «Gari wondoox fa mi!» Yoseef a xaƴaan fo ndoki naa, soo a ƴuf, a sutoox tafil.

¹³ Ye o tew oxe a ga’na yee kaa xaƴ’un fo ndoki ne, soo a ƴuf, a sutoox tafil,

¹⁴ a reta a xoyik wiin we no mbind ne, a lay a den ee: «Nga’angyo, kaa ta ɓisiid a in o Hebre xene, ndax ta ŋasit a in. O koor oxe kaa gariid ndax ta gignaam soo um faɗoox.

¹⁵ Ye ta nanna um faɗoox, a ƴufa, a sutoox tafil, a xaƴaam meen fo ndoki ne ten.»

¹⁶ Naaga, a doona ndoki ne Yoseef paam um boo neen o kor um a gatu no mbind naa.

¹⁷ Maaga, o tew oxe a layaan ee: «O paɗ o Hebre xe ɓisiidoona a in kaa gar’u ndax ta gignaam.

¹⁸ Neene, ye ƴufginooxuuma faɗoox, a dalfooxa o ƴuf tafil, a xaƴaam fo ndoki ne ten.»

¹⁹ O yaal mbind oxe Yoseef a nana fa lay fee no tew oxe ten ee: «Keene o paɗ oxe wo a fi’u!» A dalfooxa o fuux boo a buɓaa.

²⁰ A dama a Yoseef, a wegin kam kaso faa andoona yee maaga we o maad oxe a wegin’ina a ndeeƭu.

Yoseef kam kaso fee

²¹ Naaga boog, Yoseef a reeƭa kam kaso faa. O Yaal oxe a reeƭa fa Yoseef, a lalin o paaxel um. A ci’aan ta daaw yirmande no aa-adax oxe no yeeyetax we na kaso fee.

²² O aa-adax oxe na kaso fee a doxna a Yoseef lakas waa mbeg’eena fop, too ten topatooxoogatu fop.

²³ O aa-adax oxe na kaso fee waaƭoogatee kaa Yoseef a fi’na fo kaa ta fi’eerna, yaam o Yaal oxe kaa reeƭu fo ten. O Yaal oxe kaa faaxnoogu fop ke Yoseef a fi’oogna.