Mberaand 38 - NQAARIIT NE ROOG

Yudaa fa Tamaar

¹ Na jamaane faaga, Yudaa a inoora me no fog faap um, a ret a genik maa no koor o ne’e Hiira no saax laa Adulaam.

² Maaga, a ga’a o ƥiy o ndew no koor o Kaakanaan o ne’e Suwa. A gilgaan, soo a yoon fo ten.

³ Naaga, o tew oxe a roka o fud, a ñoot o ƥiy o ngoor, soo a ne’in Eer.

⁴ O tew oxe a rokahina o fud, a ñoot o ƥiy o ngoor, soo a ne’in Onan.

⁵ A jeg’ahina o ƥiy o ngoor, a ne’in Seelax. Yudaa oxe gen’a Kesib ye oxeene a rimeena.

⁶ Yaa Eer fee refna taaw Yudaa a fadna o jeg o tew, Yudaa a waaƭanaan o tew o ne’e Tamaar.

⁷ Eer fee refna taaw Yudaa koy kaa soxod’u lool na kid no Yaal oxe. Ten taxu, o Yaal oxe a waraan.

⁸ Yudaa a laya a Onan ee: «Lami o tew no maag of, ndax o sakan o maag of xa taan.»

⁹ Onan a anda yee xa ƥiy axe na ndimkeel ƭeetkaand nen xa ƥeem. Ten taxu a ɓaxooga koogoor um a lanq a mbanuu ta yoonna fo o tew oxe no maag um, ndax rimankee o maag um xa ƥiy.

¹⁰ Ke ta fi’oogna a feƭar’a o Yaal oxe, soo ta warin, ten itam.

¹¹ Maaga, Yudaa a laya a Tamaar fee o seemir um ee: «Reti ñaawoortik no mbind faap of boo yaa Seelax fee o ƥees a maakna.» Kaa lay’u neene, yaam ee ndik Seelax a xon nen o maag um. Tamaar oo a reta, a moof no mbind faap um.

¹² Ñaal mayu a mbaafa. O ƥiy o ndew onqe Suwa refna o tew oxe Yudaa a xona. Yaa Yudaa a moofna boo ñaaw um a faaf, a reta Timna, a yoon fa xaariit um Hiira o Aa-adulaam oxe, da ndet maa no waa nduusoogna paal ke ten.

¹³ Tamaar a yegne o ten ee: «O seemir of o koor a gara Timna ndax ta ruus paal ke ten.»

¹⁴ Maaga, Tamaar a dalfooxa o wol toki ñaawoor ke ten, a muuroox a muxil, a ñiroox soo a moof no ndokand ne Enayiim na ƭat ale Timna. O nanangaan koy, kaa ga’’u yee Seelax a maaka, too ci’aand o ten, a dolooxankin.

¹⁵ Yudaa a ga’a a Tamaar, soo a foog ee a caga yoo yaam ne ta muur’ina tagid um.

¹⁶ A matiidaan paam a ƭat ale, soo a layin ee: «Ngela ci’aam um yoon fa wo!» yaam andid’ee yee o seemir um oo. O tew oxe a doonaan ee: «Xar o cooxkaxam ndax o yoon fa mi?»

¹⁷ Yudaa a doonaan ee: «Um fadangaa no ged laa mi xam lultiidong fambe.» O tew oxe a layin ee: «Xan o cooxaam ngaasnit boo yaa lultiidanoona.»

¹⁸ A laamta o tew oxe yee: «Ngaasnit num um cooxkang?» A doonaan ee: «O heɗ o ñaasir ole wo fo o ƥaak um fo o loq ole wo saqoona no ɓay of.» A cooxaan a den, soo a yoon fo ten. Maaga, o tew oxe a inoora o fud.

¹⁹ O tew oxe a inooxa, a ret. A watna muurax ne, soo a rokooxatin toki no ñaaw ke ten.

²⁰ Yudaa a lula a xaariit fee ten o Aa-adulaam oxe ta ɓisiid fambe le ndax ta xot ngaasnit ne me no tew oxe, kaa koy xaariit fee ga’ee o tew oxe.

²¹ A laamta wiin we maaga yee: «Taa a caga le reeƭna Enayiim paam a ƭat ale?» A ndoonaan ee: «A caga leng refee mene!»

²² A nomtooxa maa Yudaa, a layin ee: «Ga’inum, too sax wiin we maaga kaa layaam ee a caga leng refee mene.»

²³ Maaga, Yudaa a doonaan ee: «Fat a jang ke ta saqna, baa ɓanjnoor a in. Fi’aam ke waraxama, yaam ɓisnooraanum fambe le too ga’aand.»

²⁴ Ngap a qool a tadak cinj kaaga, Yudaa a yegniide yee: «Tamaar fee o seemir of o tew kaa rok no caaxaan boo a xotit teen o fud!» Yudaa a heblita yee fat a sutel tafil, a doxel.

²⁵ Ye Tamaar a sutiideel tafil, a lulta o layanel o seemir um o koor ee: «O koor oxe jegna tikoorik kene fi’axam ke reftuuma. Ngela fexeyi and oxe jegna o heɗ o ñaasir ole fo o ƥaak ole fo loq ole.»

²⁶ Yudaa a andda tikoorik kaa, soo a lay ee: «O tew oxene moƴaxam o jof! Kaa fi kene yaam ne ci’eeranuuma ta dolooxanik a Seelax fee o ƥees.» Yudaa mosatee koy o yoon fo ten.

²⁷ Yaa ñoot naa a fadna, a ga’a yee siid a saqu.

²⁸ Ye ta ñootaa, a jeg’a oxaa sutiidna o ɓay um, o tew o kaagaajin oxe a damaan, a hum teen o ƥaak o taalde’u yee: «Oxene eetu o sutooxiid.»

²⁹ Kaa koy, a qicatina o ɓay ole, soo o lakas oxe a sutooxiid. Maaga, o tew o kaagaajin oxe a laya yee: «Wo sexanu a xoox of o gur.» Yaam kaaga a ne’aan Peres.

³⁰ Cinj kaaga, o yoon um a sutooxiida, a saq o ƥaak o taalde’u no ɓay um. A ne’aan Serax.