Mberaand 37 - NQAARIIT NE ROOG

YOSEEF ( 37—50 ) Xa ƭaaɗ axe Yoseef

¹ Yakoob a dala kam saax le Kanaan me faap um a reeƭna o gataakoon.

² Keeke ndefu a kon ake na xa ƥiy axe Yakoob. Ye Yoseef a jegna xa kiid xarɓaxay fo xa kiid ɓetaa ƭaq a gayooga fo fog faap we ten. A deƥandoonga fo xa ƥiy axe Bilha fo xa ƥiy axe Silpa ndeeƭna rew faap um. Yoseef kaa wetandooxoogu a faap den paaxeer ke da mbi’oogna.

³ Isra’el koy, Yoseef a moƴ’u o fex ee xa ƥiy xa lakas axe ten, yaam ne ta jeg’uuna kam nogoy ne ten. A jikana a Yoseef sabadoor naa mosna tigi.

⁴ Maag we ten a nga’a yee faap den ten a moƴ’u o fex ee den fop, soo da mbofanin o njaaku kam. Mbaag’ee muk o lay fo ten pelu.

⁵ Yoseef a ɗaaɗa tig, a wetandooxin fog faap we ten, soo da moƴatin o sib.

⁶ Kaa lay’u a den ee:

⁷ «Nan-gilooxyo ke ɗaaɗuuma. Kaam ɗaaɗ i ndet no qol, ngumaa a kusax. Maaga, gusax le mi a inooxa, a geenoox, soo a kusax ake nuun a ndeerin, a ngungaa mbaambir um.»

⁸ Maag we ten a layaan ee: «Kaa o bug o lay boog ee xan o ref o maad in! Ndi kaa o foog ee xan o ref o yaal in!» A moƴ’ataan o sib yaam xa ƭaaɗ axe fo fa lay fee ten.

⁹ A ɗaaɗahina o ƭaaɗ o lakas, a wetandooxin fog faap we ten ee: «Kaam ɗaaɗahin ga njeeƈ ne fo o nqool onqe fo xa qoor xarɓaxay fo o xoor o leng a ngungaa mbaambir es.»

¹⁰ A wetandooxaan a faap um fo fog faap we ten. Faap um a xasanaan, a layin ee: «Xar o ƭaaɗ oleene a tektu? Ndax kaa i ngarkaa, mi fa ya of fo maag of, ngungaa a lanq mbaambir of?»

¹¹ Ciis maak a dama fog faap we ten, ndaa faap um o mat a geeka xa ƭaaɗ axeene no yiif um.

Maag we Yoseef a njikooxaan

¹² Fog faap we Yoseef a ndeta no jegel olaa Sikeem, a molik.

¹³ Bes, Isra’el a laya a Yoseef ee: «Mee ndax fog faap we wo Sikeem a molku! Gari, bo um lulong maa den!» A doonaan ee: «Iyo!»

¹⁴ Isra’el a layaan ee: «Reti ɗeetik fog faap we wo ndax njiree fo ndax tig damee ged laa. Cinj kaaga, o gar layaam.» Neene a lultun ta inoor na yulanq alaa Hebron, soo Yoseef a ret Sikeem.

¹⁵ Ye ta joqooyooxaa kam a koƥ ale, o koor a xeta fo ten, a laamtin ee: «Ndi xar o waaƭaa?»

¹⁶ Yoseef a doonaan ee: «Fog faap we mi um waaƭaa, ngela lalaam me da ngayaa!»

¹⁷ O koor oxe a layaan ee: «A inoora mene too nanaam da layaa yee ‹Fat i ndet Dotan!› » Yoseef a reefa xa caf axe no fog faap we ten, soo a soƥ a den Dotan.

¹⁸ A ƈookta a Yoseef koƭu, too ye ta helkaa fo fadiid me den a ngiɓanaan o ngir ndax da mbarin.

¹⁹ A layra a ndeer den ee: «O ƭaaɗaaɗ oxe xey a garaa!

²⁰ Ndiiki koy, fat i mbarin ndeɓin kam a leng na kamb akene. I ndetangaa, i lay ee ƥaaɓaan damun, bo i nga ke xa ƭaaɗ axe ten a ƭaxkan.»

²¹ Ruben a nana kaaga, soo a bug o watin na xa ƥay den took o lay a den ee: «Ba i mbarin!

²² Ndeɓeenoo kañ kam gamb jegee foofi lene refna kam a koƥ-a-ƥor ale, mbañ o mbarin.» Kaa lay’u a den neene, ndax ta waag o watin soo a nomtiidin a faap um.

²³ Ye Yoseef a fadiidna me no fog faap we ten, a ndamaan, a mbol sabadoor mosu ne ta rokoox’ina.

²⁴ A ndamaan, a ndeɓin kam gamb jegee foofi laa. Gamb laaga saq’ee dara too jeg’ee foofi.

²⁵ Cinj kaaga, a ndeera, a ñaamaa. Ye da yoɗna a kid den, a nga’a o lox keeleemb no Ii-isma’el waa inoorna Galaad. Keeleemb ke den kaa suf’u qeeñe-xeeñe fo teex ƭuumooxel fa miir faa da njikookaa Misira.

²⁶ Maaga, Yudaa a laya fog faap we ten ee: «Xar i nqotitkaa no war o ndeɓ in soo ƭasin fo’oy um?

²⁷ Ngaryo i njikooxin Ii-isma’el we, ndaa ba i mbartin xa ƥay in, yaam o ndeɓ in a refu, i mbog fo’oy fo leng kut ole!» Fog faap we ten a nan-gilooxaan, too a njaɓa ke ta layna.

²⁸ Yaa jula Maamajan we a njooniidaa, fog faap we Yoseef a sutta a Yoseef no gamb laa, a njikoortin Ii-isma’el we xa monjong qarɓeen ƭik xaaliis, soo weene a ƥisin Misira.

²⁹ Ruben a nomtooxiida no gamb laa, soo a ga ee Yoseef reeƭatee taaga. A dalfooxa o faar toki um yaam naqad,

³⁰ a nomtoox maa no fog faap we ten, a lay a den ee: «O goor ole refatee maaga. Mi koy, mam um jofkaa?»

³¹ Maaga, a njanga sabadoor ne Yoseef, a nqiris suk fambe, soo a ƭuum fo’oy le no sabadoor ne.

³² Cinj kaaga, a lultayo a faap den sabadoor ne yee: «Keeke, kaa i nga’in na koƥ ale. Ɗeeti boo and ndax sabadoor no ƥeef oo ndax nam?»

³³ Yakoob a anddaan, soo a lay ee: «Sabadoor no ƥees o mat oo! Ƥaaɓaan waru a Yoseef, a listin.»

³⁴ Yakoob a dalfooxa o faar toki um, a deroox o saaku, soo a ñaawooxaa boo ñaal mayu.

³⁵ Xa ƥiy xa koor axe fo xa tew axe ten fop a ngara ndax da yaalin, ndaa a faña o yaalel. Kaa layoogu yee: «Kaam bugko ñaawooxaa o ƥees boo yaa um xonkaa, soƥkin jaaniif.» A refa no loolaa o ƥeem rek.

³⁶ Maamajan we a ƥisa a Yoseef Misira, soo a njikooxin a Potifaar fee o leng no kelfa ke Firawon too a ref o aa-adax oxe no yeeyetax we.