Mberaand 35 - NQAARIIT NE ROOG

Yakoob a inoora Sikeem a ret Betel

¹ Roog a laya a Yakoob ee: «Inooxi! Reti Betel, o moof maaga. Fat o maxan maaga o sadaxand a Roog fee feeñoox’oonga ye o ƴufaa o maag of.»

² Yakoob a laya ƥasil um fo waa ndeeƭna fo ten fop ee: «Mbatinyo roog can ke a ndeer nuun, nqoolandoox soo supit tikoorik.

³ Xan i inoox, ndet Betel. Xam maxan maaga o sadaxand a Roog fee ƴufig’axama a koom alaa fa naqad es too a reeƭu fa mi na ñaaƈ ale mi.»

⁴ A cooxa a Yakoob roog can ke da saq’ina fop fo xa loŋ-loŋ axe den. Yakoob a gasa a den ɗuga ngariñ naa reeƭna paam Sikeem.

⁵ Cinj kaaga, a ndeta. Roog kaa saɗarin’u we no teeru ke mbidna a den, too o leng reefee xa ƥiy xa koor axe Yakoob.

⁶ Yakoob fo yoon um fop a mbadiida Luus fee na xoyeel a xoy Betel kam saax laa Kanaan.

⁷ A maxa o sadaxand, soo a ne o mbiñ onqaaga El-Betel, yaam maaga Roog a feeñoor’un ye ta ƴufaa o maag um.

⁸ Debora fee topatooxoogna a Rebeka naa ta rime a ñaka, soo a gasel paam Betel ɗuga ngariñ naa xoyoogateena Ngariñ ne na xa lool axe.

⁹ Roog a feeñooxahina a Yakoob ye ta nomtoortiidaa Padan-Araam, soo a barke’in.

¹⁰ Roog a layaan ee: «Yakoob ne’ee! Ne’kataandee Yakoob ndaa Isra’el.» Neene, a ne’aan Isra’el.

¹¹ Roog a layaan ee: «Mi refu Roog o Cegu katil oxe. Xam ci’ong xa ƥiy fo xa taan xa mayu. Saax fa xeet fa muum sax xan a mbaqaqoor na wo, maad a sutoor na wo.

¹² Xam ci’ong saax le ci’uuma a Abraham fa Isaak, too xam ci’in xa taan of.»

¹³ Cinj kaaga, a yoɗoorta no mbiñ onqe ta laytoogna fa Yakoob.

¹⁴ Yakoob a sipa maaga ɓil wetandoor, a yip took fee biiñ fa diwliin.

¹⁵ Yakoob a ne’a o mbiñ onqe Roog a layit’ina fo ten Betel.

O rimel ole Bensame fo fa nqon fee Rakel

¹⁶ Yakoob fo ƥasil um a inoora Betel, a ndet. Ne da maad’ina o ngoƭaa a Efrata, Rakel a ñoota o ƥiy o ngoor. Ñoot ne ten a yoonit’a coono ƭomu.

¹⁷ Ye ta refna fo xa ƭomel axe no gaaj le, o tew o kaagaajin oxe a layaan ee: «Ba o saɗar, yaam jegahinaa o ƥiy o ngoor.»

¹⁸ Kaa koy, ne oxeene a xonoogna, a ref no laaŋaan, a ne’aan Ben-Oni, ndaa faap um a ne’aan Bensame.

¹⁹ Rakel a xona, soo a gasel paam a ƭat ale Efrata, refna ref Betleheem.

²⁰ Yakoob a sipa betandoor na mboy alaa Rakel. Kaaga refu betandoor ke na mboy alaa Rakel too oxe maadaa boo xaye.

²¹ Isra’el a reta a sip ƭiif um kaltaa Migdal-Edeer.

²² Ye Isra’el a genna no jegel olaaga, Ruben a reta, a wondoox fa Bilha fee ngeƈ-a-salma ne faap um. Faap um a yega kaaga. Xa ƥiy axe Yakoob xarɓaxay fo ɗik a ndeeƭu.

²³ Xa ƥiy axe Leya ndeeƭu: Ruben refna taaw fee Yakoob, Simewon, Lewi, Yudaa, Isakaar fa Sabulon,

²⁴ xa piy axe Rakel a ndef: Yoseef fa Bensame.

²⁵ Xa ƥiy axe Bilha fee o ceefeer Rakel ndefu: Dan fa Neftali,

²⁶ xa ƥiy axe Silpa fee o ceefeer Leya a ndef: Gaad fa Aseer. Weene ndefu xa ƥiy axe Yakoob ndimteena Padan-Araam.

²⁷ Yakoob a fadiida maa Isaak fee faap um, maaga Mamre kam Kiryat-Arba, refna ref Hebron me Abraham fa Isaak a ndeeƭna xa kataakoon.

²⁸ Isaak a ñoowa fop oo fop xa kiid teemeed fo xa kiid qarɓeen ɓetuu tadik.

²⁹ A xona a cinj ye ta nogoyna tigi, a dab daan um, soo Esawu fa Yakoob we xa ƥeem a ngasin.