Mberaand 34 - NQAARIIT NE ROOG

Simewon fa Lewi a ndabdinooxana o cigeen den

¹ Bes, Dinaa fee o ƥiy o ndew onqe Leya a jegna fa Yakoob, a sutooxa ndax ta ɗeetik roog we no saax le.

² Sikeem fee o ƥiy Hamoor o Hiihiwi xe maadooxanoogna saax laa a ga’aan, a gifin, soo a yoon fo ten took o gignin.

³ A damooxa na Dinaa fee o ƥiy o ndew onqe Yakoob, a saq no ten mbug ƭomu. A dalfooxa o waaƭaa fo xa ƭelem xa pelu maa ta jegitna o njaaƈ onqe.

⁴ A laya a Hamoor fee faap um ee: «Ñaaƴanaam o toog oxene o tew!»

⁵ Kaa koy, Yakoob a yeg’a yee Dinaa fee o ƥeem o ndew kaa yentel. Feek koy xa ƥiy xa koor axe ten kaa ndeeƭu no qol fo cegel ke, lay’ee dara boo neen a ngatu.

⁶ Hamoor fee faap Sikeem a reta maa Yakoob ndax ta lay fo ten.

⁷ O ndeendeer onqe koy, xa ƥiy xa koor axe Yakoob a ngata, soo a yeg ke xew’ina. Goor waaga a ndalfooxa o yeg wen le na qoox den, soo a mbuux boo a mbuɓaa yaam Sikeem kaa fi’’u kaa waagaandeena o jaɓ ye ta giginna o ƥiy o ndew onqe Yakoob kam Isra’el. Keene kaa ref tig qoolaƭaru.

⁸ Hamoor a laya a den ee: «Sikeem fee o ƥees de a yenta o ƥiy o ndew onqe nuun. Kaa koy, kaam xeɗaa, a jofooxangaa a nuun, ci’eenoo o ten o tew!

⁹ Nu mbaaga o ngiɓoor fa in na pexey ndolnir, nu ci a in xa ƥiy xa tew axe nuun, soo ngilig na xa ƥiy xa tew axe in.

¹⁰ Xan nu ngen fa in, saax le a refan a nuun. Moofyo ndax nu njal soo njeg xa qol.»

¹¹ Sikeem oo a laya a faap Dinaa fo jamin we ten ee: «Kaam xeɗaa yirmande nuun rek, too kuu nu laacaxama, yaaga xam cooxin a nuun.

¹² Seraamoo labid maak fo ci’it mayu, too xam cooxit ke nu laykaa. Kaa rek, fat nu ci’aam o ten o tew.»

¹³ Xa ƥiy axe Yakoob a ndoona a Sikeem fa Hamoor fee faap um fo o ƴiƴ, yaam Sikeem kaa yenit’u a Dinaa fee o cigeen den.

¹⁴ A ndoona a den ee: «Keene waagooxee na in. I ci’kee o cigeen in o koor o qucooxeer, yaam gaci fa maak oo na in.

¹⁵ I mbaagee o njaɓan a nuun keene, a refangee boog kaa nu mbi nen a in, nqucoox, goor we a ndeer nuun fop a nqucoox.

¹⁶ Maaga de, xan i ci a nuun xa ƥiy xa tew axe in, nu ngilig a den, soo i ngilig na xa ƥiy xa tew axe nuun. Xan i ngen meeke soo ndefat a ndef xeet fa leng kut.

¹⁷ Kaa koy, nu njaɓangee o nqucoox, xan i njang o ƥiy o ndew onqe in, soo nqot a ƭat in.»

¹⁸ Hamoor fa Sikeem fee o ƥeem a njaɓa fa lay faaga da layeena.

¹⁹ Sikeem koy, miñand’ee tige, yaam kaa bug’u o ƥiy o ndew onqe Yakoob lool. Ten moƴ’e koy o niw no we no mbind faap um fop.

²⁰ Hamoor fa Sikeem fee o ƥeem a ndeta no ndokand naa na teeru fee, a lay kene goor waa na teeru faa:

²¹ «Wiin wene paax ƥor a nqalaataa na in. Fat da yoq no saax le boog, a ñaaƴnaa ke da mbugna. Saax le a yaaja lool na den, xan i ngilgaa na xa ƥiy xa tew axe den, soo ci’aa a den xa ƥiy xa tew axe in a tolax.

²² Kaa koy, wiin weeke njaɓkee o ngen fa in, ndax i ndef xeet fa leng kut a refangee kaa goor we in fop a nqucoox, ne da nqucooxna den fa qoox den.

²³ Xa siir den fo o jeg den fo cegel den fop, ndax ndefankee a in? Fat i njaɓ rek ke da ne’aa, ndax da moof fa in.»

²⁴ Fop we ngar’ina no ndokand ne na teeru fee a nan-gilooxa a Hamoor fa Sikeem fee o ƥeem, soo goor waa fop a nqucoox.

²⁵ No ñaal ndadkandeer naa, a soƥ da nqijat, xa ƥiy xa ƭaq axe Yakoob, ndefna Simewon fa Lewi we jamin Dinaa, a nqota o kiin oo kiin laƥ um. A yena took teeru fee, mboog’ina yee no woor a ndefu, soo a mbar goor waa fop.

²⁶ A mbara itam a Hamoor fo o ƥeem Sikeem. A nqota a Dinaa no mbind Sikeem, soo a ndet.

²⁷ Xa ƥiy xa koor axe Yakoob a njanga tikoorik ke no we nqonna, a njangal teeru faa yaam o cigeen den kaa doon’el gaci.

²⁸ A njanga a ked ake fo xa siir axe den, boo na xa paam axe den, ke reeƭna kam teeru fee fo ke reeƭna kam a koƥ ale.

²⁹ A njanga kalal ke den fop, xa caaƈ axe den fo rew we den fo itam ke reeƭna kam pind ke den.

³⁰ Maaga, Yakoob a laya a Simewon fa Lewi yee: «Nu ƥekaxam na qalam fo mbuuxir, ndeer es fo we ngenna no saax le no Kaakanaan we fo Peeperisi we. Mi fa xoox es, wiin mayeer jegum. Xan a mbokatooranaam, a mbaraam soo um saŋkoox fo ƥasil es.»

³¹ A ndoonaan ee: «Ndax o cigeen in kaa fi’keel nen a caga?»