Mberaand 33 - NQAARIIT NE ROOG

Yakoob a xeta fa Esawu

¹ Yakoob a yoɗa a kid um soo a ƴook a Esawu a garaa, a yoonit goor teemeed nahik. A xaaja xa ƥiy axe ten, wene me Leya, wene me Rakel, wene me no jeefeer ɗik we ten.

² A adna jeefeer ɗik we fo xa ƥiy den, Leya fo xa ƥeem a ndeef, soo Rakel fo o ƥeem Yoseef a mbalak.

³ Ten fa xoox um a adooxana a den, a gungaa a lanq boo a caf ɓetaa ƭaq, soo a sogkaa o fadiid paam o maag um.

⁴ Esawu a ƴufa, a xetiid fo ten, a farakooxin no cok, a foonin, soo den ɗik fop da ndef na xa lool.

⁵ Esawu a yoɗa a kid um, soo a ga rew we fo xa caaƈ axe, a laamtin ee: «Weeke yoonna fa wo, aniin oo?» Yakoob a doonaan ee: «Xa caaƈ axe Roog a ci’na o tag of kam yirmande um oo.»

⁶ Jeefeer we fo xa ƥiy den a matiida, soo a ngung a lanq.

⁷ Leya fo xa ƥeem a matiida itam, soo a ngung a lanq, cinj kaaga Yoseef fa Rakel a matiid, a ngung a lanq.

⁸ Esawu a laamtaan ee: «Xar jagandano xa siir axene fop xettuuma?» Yakoob a doonaan ee: «Ndax um daaw yirmande no yaal es.»

⁹ Esawu a layaan ee: «O ndeɓ es, xenaam me refuuma. Geeki ke jegoona!»

¹⁰ Maaga, Yakoob a doonaan ee: «Ha’aa, kaam xeɗang a soƥangaa kañ ee daawaam yirmande of, jaɓi ci’it neeke um cooxang, yaam ten taxu um ɗeet mukit of, ne mukit Roog a ɗeetteel, too jaɓaxamo.

¹¹ Jangi boog ci’it ne um cooxang, feek Roog a mayƭandaxam fa barke, too jegaam fop ke soxla’uuma.» A fañaan o waas, boo neen Esawu a jaɓu.

¹² Esawu a layaan ee: «Fat i ndet, xam adooxanong.»

¹³ Yakoob a doonaan ee: «O yaal es, andi yee xa caaƈ axe mayee doole, too kaa jolna keene jegaam paal, pambe fo naak kaa na numnaa. A serange a ñaaƈ no ñaal leng kut, xan o siir ole fop a loroox.

¹⁴ Fat o yaal es a adooxaam, ndax um reefan o siir ole, ñaaƴaa o ndang, yoon fo xa caaƈ axe boo yaa um fadiidkaa me no yaal es kam Seyiir.»

¹⁵ Esawu a layaan ee: «Kaam bug o xaƴong boog fo a qaaj a leng no wiin we mi.» Yakoob a doonaan ee: «Um daawangaa yirmande no yaal es rek a deya.»

¹⁶ A koom-fa-koom, Esawu a nomtooxa, a xot a ƭat ale Seyiir.

¹⁷ Yakoob o mat a reta Sukot. A maxana a xoox um mbind, soo a ɗiifan o siir ole ten. Ten taxu o mbiñ onqaaga a ne’el Sukot.

Yakoob a dala paam Sikeem

¹⁸ Ye ta inoorna Padan-Araam boo a gat, Yakoob a fadiida fa jam na teeru fee Sikeem kam saax laa Kanaan, soo a dal paam teeru faa.

¹⁹ A jikta na xa ƥiy axe Hamoor fee faap Sikeem o ɗeg lanq ole ta sip’ina ƭiif um, a jiktin xa monjong teemeed xaaliis.

²⁰ A maxa taaga o sadaxand, soo a ne’in El-Elohe-Isra’el.