Mberaand 31 - NQAARIIT NE ROOG

¹ Bes, Yakoob a nana xa ƥiy axe Laban a nqasooxaa yee: «Yakoob a janga fop ke faap in a jeg’ina, too fo keene a fokatanooxtu halal fene fop.»

² Yakoob a ga’a yee a tagid ale Laban nandatee nen eetaand kaa.

³ Maaga, o Yaal oxe a laya a Yakoob ee: «Nomtooxi no saax laa faap ofiin, no mbaafaap of, too xam ref fa wo.»

⁴ Yakoob a xoyna a Rakel fa Leya we ndeeƭna no qol paam a ked ake ten.

⁵ A laya a den ee: «Kaam ɗeetloox ee a tagid faap nuun letatee na mi nen eetaand. Kaa koy, Roog fee na faap es a reeƭa fa mi.

⁶ Nuun fa qoox nuun, nu andooda yee jalanaam a faap nuun tigi.

⁷ Kaa rek, faap nuun kaa ŋastaxam yaam a supta ndabid es boo a caf xarɓaxay, ndaa koy Roog ci’iran ta fi’aam paaxeer.

⁸ Ye ta layaxama yee ceel ke na ndefkaa ndabid es, cegel ke ceel ƥor a ndimoogu, ta supit, a layaam ee ke njegna a nox rek na ndefkaa ndabid es, cegel ke a ndimataa kaa njegna a nox.

⁹ Roog kaa jaɓ o siir ole faap nuun soo a cooxaam o ten.

¹⁰ No camaane ke cegel ke a ŋaayooxaa, ɗaaɗaam o ga a suk ake na ŋaayaa tew ke, a njeel, akene a njeg a nox, akaana a ƥalig.

¹¹ Malaaka fee Roog a layaxam no ƭaaɗ ee: ‹Yakoob!› Um jaaɓin ee: ‹Oow!›

¹² A layaxam ee: ‹Yoɗi a kid of too ɗeet, a suk ake na ŋaayaa tew ke fop kaa njeel, akene a njeg a nox, akaana a ƥalig, yaam ga’aam fop ke Laban a fi’oonga.

¹³ Mi refu Roog fee feeñoor’oonga Betel, maa sip’oona ɓil wetandoor, yip took fee diwliin, too regoor’u fa mi maaga. Ndiiki koy, inooxi o sutoox saax leeke, nomtoox no saax o rimel of.› »

¹⁴ Rakel fa Leya a ndoonaan ee: «Ndax kaa i njegat a las no lam ne no mbind faap in?

¹⁵ Ndax kaa ɗeetatee a in nen xa kataakoon, feek kaa jikoox a in, boo a ñaam xaaliis fee.

¹⁶ Halal fee Roog a jaɓitna na faap in fop, in njegatun, in fo xa ƥiy in. Ndiiki daal, fi’i fop ke Roog a hebloonga.»

¹⁷ Yakoob a inooxa, a ŋaayin xa ƥiy axe ten fo rew we ten no keeleemb ke.

¹⁸ A ɓisa o siir ole ten fop fa halal fee ten fop ta jegit’ina Padan-Araam. A xaada no mbind Isaak fee faap um no saax laa Kanaan.

¹⁹ Laban koy kaa ruusik’u paal ke ten, Yakoobiin a ndef no mbind ne a ngebooxaa. Rakel a guuɗa teex ke faap um.

²⁰ Yakoob o mat, a naxa a Laban o Aa-araam oxe, a fañin o lay ee kaa ƴufaa.

²¹ A ƴufa fo ke ta jeg’ina fop. A reta, a joot o xuluɓ ole Ofrat, soo a sag farna fo xa coong axaa Galaad.

²² No ñaal ndadkandeer naa, Laban a yegne yee Yakoob a ƴufa.

²³ Laban a fokata fog we ten, soo a daab a Yakoob. A ñaaƴayo ñaal ɓetuu ƭik, soo a ndaawtin na xa coong axaa Galaad.

²⁴ Kaa koy, Roog a feeñooxa a Laban o Aa-araam oxe no ƭaaɗ, a layin ee: «Wootooxi o lay a Yakoob tig!»

²⁵ Laban boog a daawa a Yakoob. Yakoob kaa sip’u ƭiif um no joong olaa, Laban fo fog um itam a sip ƭiif den no joong olaa Galaad.

²⁶ Maaga, Laban a laya a Yakoob ee: «Xar fi’axamo kene? Xar taxu o naxaam, soo ɓis xa ƥiy xa tew axe mi nen waa ndamteena na xire?

²⁷ Ndi xar taxu sax o ɓeedoox soo ƴuf, naxaam, fañaam o asoox? Xaƴkoogaaxoong o ret fo o ɗaay, o gimanel, yo’nanel a ñal, xilmbanel.

²⁸ Ci’iraamo sax um asoor fo xa ƥees fo xa taan es! No jaf leeke mat nen o ƭof xalaatto tigi.

²⁹ Jegaam sañ-sañ o fi a nuun a pi laƥ, ndaa Roog fee na faap ofiin a layaxam faak ee: ‹Wootooxi o lay a Yakoob tig!›

³⁰ Ndiiki koy, feek xesaa boo ret yaam o diilooxaa mbind faap of, xar taxu o guuɗ teex ke mi?»

³¹ Yakoob a doona a Laban ee: «Kaam saɗaroogu no yiif es ee xan o jaɓ xa ƥeef xa tew axe.

³² Kaa koy, no xe o ga’itkaa teex ke wo, xan a ñak o ñis um. Ɗeeti boog mbaambir no fog in weeke ke refna o jeg of me in, o jangin.» Yakoob koy and’ee yee Rakel guuɗu a den.

³³ Laban a roka no ƭiif naa Yakoob, no naa Leya, no naa no jeefeer ɗik we too ga’ee tig. A sutoora no ƭiif ne Leya, a rok no ne Rakel.

³⁴ Rakel kaa jang’u teex ke, a fi a den ɗuga qerxa ne ta ŋaaytaa ngeeleemb um, soo a moof took fee. Laban a joktooxa ƭiif naa fop too ga’ee tig.

³⁵ Rakel a laya a faap um ee: «Baa, ba o fuuxanaam de, yaam waagiim o inoox meeke refuuma, kaam ga’aa o mbaax.» Faap um a waaƭa ndaa ga’ee tig.

³⁶ Maaga, Yakoob a dalfooxa o fuux ƭomu, soo a ref no xasraa fa Laban. A layaan ee: «Xar refu njofaƭar es ndi bakaad fum fi’um boo a tax o ŋaalooxanaxam neeke?

³⁷ Ye joktooxoona tikoorik ke fop, xar ga’o no tikoorik ke no mbind es fop? Laliidaam o ten meeke mbaambir fog es fo fog of, da ndef seede!

³⁸ Xa kiid qarɓeen ƭik axey axaa refuuma no mbind of, paal ke wo fo pambe ke wo mosee o mboos, too ñaamiim muk suk mbaal no ged le wo.

³⁹ Mosiroong o ɓisiid njegel naa mbuufuɗag a damna. Mi o mat gadoox’u keene fop. Ñaal fo yeng, kuu guuɗeena o rabdinooxaam o ten.

⁴⁰ Um ref meeke, a ñaalangaa um ref muud njeeƈ ne, a yengangaa a ƥuuɓ ale a waraxam, waagiim muk o sag a ngid es.

⁴¹ Keene um reftin boo xa kiid qarɓeen ƭik no mbind of. Jalanaaxoong xa kiid xarɓaxay fo xa kiid xa nahaq yaam xa ƥiy xa tew axe wo, jalanong xa kiid ɓetaa fo leng, ndax um daaw a las es no cegel ke, too ndabid es, suptaano boo a caf xarɓaxay.

⁴² Boo Roog fee no taan es, Roog fee Abraham refna ref fee Isaak a faɗooxaa, a farit’eeraxama, raxkoogaxamo xa ƥay xa ƥor. Roog kaa ga coono es fo jale es, ten taxu ta maƭooxong no yeng ole faafna.»

⁴³ Laban a doona a Yakoob ee: «Rew wene xa ƥees oo, mboƥ ne a ndef xa taan es, o siir ole a ref o siir es, too kene o ga’aa mene fop mi jegun. Xar waagum o fi’an xaye xa ƥiy xa tew axe mi mbaat xa ƥiy axe da ndimna.

⁴⁴ Gari i ngiɓoor, too keene fat a ref o seede xaye a ndeer es fa wo.»

⁴⁵ Yakoob a janga ɓil, a sipin, ta ref betandoor.

⁴⁶ Yakoob a laya fog we ten ee: «Ngisiidyo a ƥil!» A janga a ƥil ake, a fi a den juum, soo da ñaamit maaga took juum laa.

⁴⁷ Laban a ne’a o mbiñ onqaaga Yegar-Sahaduta, soo Yakoob a ne’in Galed.

⁴⁸ Laban a laya yee: «Fat juum leeke a ref xaye o seede a ndeer es fa wo.» Ten taxu maaga a ne’el Galed.

⁴⁹ A xoyoogahine itam Mispa, yaam ne Laban a lay’ina yee: «Yaasam o Yaal oxe a yetooxong, a yetooxaam, i nga’ratangee.

⁵⁰ O toroxandangaa xa ƥiy xa tew axe mi mbaat o waaƭ rew lakas colu weeke, refkee yee o kiin na hate’kaa a in ndaa andi a paax ee Roog na refkaa o seede a ndeer es fa wo!»

⁵¹ Laban a layahina a Yakoob ee: «Ga’aa juum leeke fo ɓil wetandoor leeke sipuuma a ndeer es fa wo.

⁵² Juum leeke o seede yoo, betandoor keeke a ref seede ee jolkiro a den garanaxam mbaat um jol a den garanang took paaxeer.

⁵³ Yaasam Roog fee Abraham fa Nakoor a ref o seede a ndeer in.» Maaga, Yakoob a daaɓooxa na Roog fee sendnoor’ina a Isaak fee faap um.

⁵⁴ Yakoob a ɓoxotta sadax took o joong olaa, soo a xur fog we ten ndax da ñaam. A ñaama, soo a mbe took o joong olaa.