Mberaand 28 - NQAARIIT NE ROOG

¹ Isaak a xoya a Yakoob, a barke’in, a asoortin ee: «Ba o xotit o tew no roog we no Kaakanaan we.

² Inooxi ret Padan-Araam no mbind Betwel fee faap ya of, o waaƭit o tew a ndeer xa ƥiy xa tew axe Laban fee o camin ya of.

³ Yaasam Roog o Cegu katil oxe a barke’ong, a saqtinong, a mayƭandong, ndax o refat o taan no qeet mayu.

⁴ Yaasam Roog a ci’ong barke fee Abraham, wo fo xa taan of, ndax o jegik saax le refoona o gataakoon, too ta ci’in a Abraham.»

⁵ Isaak a hebla a Yakoob, soo ta ret Padan-Araam maa Laban fee o ƥiy Betwel, o Aa-araam oxe, refna ref o camin Rebeka fee ya Yakoob fa Esawu.

⁶ Esawu a ga’a yee Isaak kaa barke’’u a Yakoob, soo a heblin Padan-Araam, ta waaƭtik maaga o tew. Ye ta barke’uuna a heblaan ee: «Ba o waaƭit o tew a ndeer roog we no Kaakanaan we.»

⁷ A ga’a itam ee Yakoob a nanana a faap um fa ya um, soo a ret Padan-Araam.

⁸ Neene, Esawu a and’ata yee roog Kaakanaan we mbel’ee a Isaak fee faap um.

⁹ Naaga, Esawu a reta maa Isma’el. A gilgita maaga, fogreerna fo rew we ta jeg’ina, a Mahalaat fee o ƥiy Isma’el fee o ƥiy Abraham, too a ref itam o cigeen Nebayot.

O ƭaaɗ ole Yakoob

¹⁰ Yakoob a inoora Beer-Seeba, a waasooxan a Xaraan.

¹¹ A fadiida o mbiñ, a fe maaga, yaam njeeƈ ne kaa mud’u. A xota maaga ɓil, a hakandooxin, a wondoox o mbiñ onqaaga.

¹² A ɗaaɗa, a ga a seel alaa sipeena a lanq soo cat lakas ne a duqaa asamaan. Malaaka ke Roog kaa ŋaayoogu teen, a mbudooxaa.

¹³ O Yaal oxe koy, kaa geenoox’u paam um, soo a layaa yee: «Mi refu o Yaal oxe Roog fee no taan of Abraham, Roog fee Isaak. Lanq ke wondooxoona, xam ci’ong a den, wo fo xa taan of.

¹⁴ Xa taan of xan a mayit nen pep lanq. Xan a ndal no ke xotitna no batand boo no mudand, fo no ke xotitna no ɓemb-roog o janoon boo no ɓemb-roog o ñamaak. Qeet ke no lanq ke fop no xaa faqaqoorna na wo a mbarke’itkeel.

¹⁵ Mi fa xoox es, mexey fa wo. Xam saytooxong muu refoona, too xam nomtiidong o mbiñ onqene. Xaƴkiroong muk a refangee kaa um fadin ke layuuma.»

¹⁶ Yakoob a yokoorta no ƭaan ole ten, soo a lay ee: «Andaam kañ ee o Yaal oxe xey o mbiñ onqene too and’inum sax!»

¹⁷ A diida lool, too a lay ee: «Ndaw ne o mbiñ onqene a saɗarnooxitna! Refee lakas colu Mbind ne Roog, o don-maax ole na asamaan!»

¹⁸ Yakoob a inooxa ƥiiɓ teel, a jang ɓil le ta hakandoox’ina, a sipin ta ref betandoor, soo a yip took fee diwliin.

¹⁹ A ne’a o mbiñ onqaaga Betel, ndaa Luus a ne’’e eetaand.

²⁰ Yakoob a fi’a a tegit ee: «Roog a refangaa fa mi, a saytooxaxam na ñaaƈ es aleeke, a ci’aam ñoowir fo ñirax,

²¹ um nomtooxangaa no mbind faap es fa jam, o Yaal oxe na refkaa Roog es.

²² Ɓil wetandoor leeke sipuuma na refkaa mbind Roog ne. Xam coox o Yaal oxe a seek xarɓaxayandeer ale no fop ke ta ci’kaxam.»