Mberaand 25 - NQAARIIT NE ROOG

Xa taan xa lakas axe Abraham fo fa nqon fee ten

¹ Abraham a gilig’ahina o tew o ne’e Ketura.

² A rima fo ten xa ƥiy xa koor da ndef: Simran, Yoksan, Medan, Majan, Yisbak fa Suwax.

³ Yoksan refu faap Saba fa Dedaan. Xa taan axe Dedaan ndefu: Aa-asuur we, Leeletum we fo Leelewum we.

⁴ Xa ƥiy axe Majan ndefu: Eefa, Efer, Henok, Abida fa Elda. Weene ndefu xa taan axe Ketura.

⁵ Abraham a ci’a a Isaak ke ta jeg’ina fop.

⁶ Abraham a cooxa xa ƥiy axe no keƈ-a-salma ke ten ci’it, too ye ta maadna o ñoowaa, a ɓisa a den maa goƭna a Isaak fee o ƥeem farna fo batand no saax le no batand.

⁷ Abraham a ñoowa fop oo fop xa kiid teemeed fo xa kiid qarɓeen ɓetuu ƭik fo xa kiid xa ƥetaq.

⁸ Abraham a xona a cinj ye ta jegna nogoy mbelu fo o xuuɗ-o-ñis. Cinj kaaga, a daba daan um.

⁹ Isaak fa Isma’el we xa ƥeem a ngasaan no luf naa refna Makpeela kam o qol olaa jasnoorna fa Mamre, too Efron fee o ƥiy Soxar o Heeheet oxe a jeg’un.

¹⁰ O qol oleene, Abraham jikit’un no Heeheet we, maaga a gase, ten fa Saara fee o teem.

¹¹ A cinj fa nqon fee Abraham, Roog a barke’a a Isaak fee o ƥeem gen’atna paam a ngas alaa Laxay-Ro’i.

¹² Weeke ndefu xa taan axe Isma’el fee o ƥiy Abraham fa Agaar fee o Miimisira xe reeƭna o ceefeer Saara.

¹³ Keeke ndefu a kon ake na xa ƥiy axe Isma’el a reefandel no ne da maagatiritna: Nebayot, Kedaar, Adbeel,

¹⁴ Mibsam, Misma, Duma, Maasa,

¹⁵ Hadad, Teema, Yetuur, Nafis fa Kedma.

¹⁶ Weene ndefu xa ƥiy xarɓaxay fo xa ƥiy xa ƭaq axe Isma’el, ndeeƭna kelfa ke no ƥasil xarɓaxay fo ƥasil ƭik ke ndal’ina no caate den fo na xa taland den.

¹⁷ Isma’el a ñoowa fop oo fop xa kiid teemeed fo xa kiid qarɓeen tadik fo xa kiid ɓetaa ƭaq. Cinj kaaga, a daba daan um.

¹⁸ We mbaqaqoorna na Isma’el a ngena me xotitna Hawila boo no saax laa Suur jasnoorna fa Misira yaa o retaa Asuur. Isma’el a ñoowooga no njofooraƭar fo fog um.

YAKOOB ( 25—36 ) Esawu fa Yakoob

¹⁹ Keeke refu a kon ake na xa taan axe Isaak fee o ƥiy Abraham. Abraham rimu a Isaak.

²⁰ Isaak a jeg’a xa kiid qarɓeen nahik ye ta giligna a Rebeka fee o ƥiy Betwel o Aa-araam oxe gen’ina Padan-Araam, too a ref o cigeen Laban o Aa-araam oxe.

²¹ Isaak a xeɗooxana o teem me no Yaal oxe yaam ne ta reeƭna o timar. O Yaal oxe a jaɓa a qeƭ um, soo Rebeka a rok o fud.

²² Xa ƥiy axe a ñoxorooga kam o fud ole ten, soo ta lay ee: «Xar na sagiidaxam?» A dalfooxa o laamtik o Yaal oxe.

²³ O Yaal oxe a layaan ee: «Qeet ƭik ndefu no fud of. Xan qeet ƭik ke a nqaajoor yaa da sutoorkaa na wo. Fa leng no qeet keene xan moƴ o jeg doole fa lakas fee, too oxe na eetkeel o rim xan a ɓoxotoox no ƭikandeer oxe.»

²⁴ Yaa a pe um a mbadna, a and’ata yee siid a saqu.

²⁵ O eetaand oxe garna kaa fom’u, cer ke a may wiil nen sabadoor mbi’te a ƥiñ. A ne’aan Esawu.

²⁶ Cinj kaaga, o ƭikandeer oxe a gara, o ɓay ole ten a dam o faaɗ ole Esawu, oxaaga a ne’el Yakoob. Isaak a jeg’a xa kiid qarɓeen ɓetuu fa leng ye da ndimeena.

²⁷ Xa koor axe a maak’a. Esawu a reeƭa o ƭana tigi kam a koƥ ale, Yakoob o mat a ref o kiin o ƥuuɓu, a yoqaa kam ƭiif ke.

²⁸ Isaak kaa fex’u a Esawu, yaam ne ta ñaamoogna puufuɗag ke, Rebeka koy a fex a Yakoob.

²⁹ Bes, Yakoob a jawooga o cosoñ, Esawu a inoortiid na xa qol axaa, a xij lool.

³⁰ Esawu a laya a Yakoob ee: «Kaam xeɗang o ci’aam no cosoñ o mbomu nqe wo um ñaam, yaam kaam xij lool.» Ten taxu Esawu a lastiteel Edoom.

³¹ Yakoob a layaan ee: «Jikooxaam xaye a las taaw ale wo!»

³² Esawu a doonaan ee: «Kaam xonaa fo nqeex waay, xar a las taaw a ɗaxkaxam?»

³³ Maaga, Yakoob a layaan ee: «Daaɓooxeen kañ!» Esawu a daaɓooxaan soo a jikoox a Yakoob a las taaw ale ten.

³⁴ Naaga, Yakoob a cooxa a Esawu mbuuru fo o cosoñ onqe jegna a ñaaw. A ñaama, a yer, soo a xot a ƭat um. Neene Esawu a xeeftu a las taaw ale ten.