Mberaand 24 - NQAARIIT NE ROOG

Ngulook ne Isaak fa Rebeka

¹ Abraham a nogoy’ata lool, too o Yaal oxe a barke’aan no kuu refna.

² Abraham a laya o tag oxe ten moƴ’ina o miñ no mbind um, too a topatooxaa o jeg ole ten ee: «Dooni o ɓay of ɗuga a ñaal es,

³ soo um daaɓooxnoorong no Yaal oxe Roog fee na asamaan, Roog fee no lanq ke yee waaƭanitkiro o ƥees o ngoor onqe o tew no Kaakanaan we genuuma a ndeer den.

⁴ Reti kañ no saax es, no mbaafaap es, o waaƭan a Isaak fee o ƥees o tew.»

⁵ O tag oxe a doonaan ee: «Xeƈa o tew oxe jaɓkee o yooniid fa mi no saax leeke, ndax kaam ɓiskaa o ƥeef no saax laa inooriidoona?»

⁶ Abraham a layaan ee: «Wootooxi ɓis maaga o ƥees!

⁷ O Yaal oxe Roog fee na asamaan suttaxama no mbind faap es fo no mbaafaap es, a layaam fo a taaƥ ee: ‹Saax lene xam ci’in xa taan of!› ten fa xoox um xan a heblanong malaaka um ta adooxanong. Maaga boog, o waaƭanitkaa o ƥees o tew.

⁸ A soƥangaa yee o tew oxe jaɓee o yooniid fa wo, xan o woktoox na taaƥ alene um fi’noorang. Kaa rek, ba o ɓis o ƥees maaga muk.»

⁹ O tag oxe a doona o ɓay um ɗuga a ñaal ale Abraham fee o yaal mbind um, soo a daaɓoox o fi keene.

¹⁰ O tag oxe a xota keeleemb xarɓaxay no keeleemb ke no yaal mbind um, soo a ret no saax laa Mesopotami na teeru faa Nakoor. A ɓislooxa itam halal fa mayu na halal fee no yaal mbind um. A inooxa, a ret.

¹¹ A yisna keeleemb ke tafil teeru fee paam a ngas no kirand ne, na waxtu fee rew we a ƈeewaa.

¹² Cinj kaaga, a laya yee: «O Yaal oxe, Roog fee Abraham fee o yaal mbind es, kaam xeɗang o xetandaam fo ke buguuma xaye too o lal a Abraham fee o yaal mbind es o paaxel of.

¹³ Ga’angi, mexey geenooxa paam a cur foofi le, too roog we no we ngenna na teeru fee xan a ƈeewiid.

¹⁴ Fat o toog oxe um laykaa yee ‹Ngela ci’aam um yer!›, soo ta doonaam ee: ‹Yeri, o ƴutangaa um yerin keeleemb ke wo›, a ref oxe jagandanoona o tag of Isaak! Neene um anditkaa yee lalaa o yaal mbind es o paaxel of.»

¹⁵ Ye ta maadna o layaa, Rebeka a fadiida. Rebeka koy kaa reeƭu o ƥiy Betwel fee o ƥiy Milka fa Nakoor fee o ndeɓ Abraham.

¹⁶ O ndoog onqe kaa mos’u lool, too and’afulee adna. A gara a ƴeewiid na cur foofi le, a ƴeewa nqaw ne ten, soo a dalfoox o nomtooxaa.

¹⁷ Maaga, o tag oxe a ƴufa a xetik fo ten, soo a layin ee: «Ngela ci’aam um yer no nqaw ne wo!»

¹⁸ O toog oxe a doonaan ee: «Yaal mbind, gari yer!» A ñofa o roxodoox, ndax ta ci’in ta yer.

¹⁹ O tew oxe a ci’aan ta yer boo a xeƴ, soo ta layin ee: «Xaƴi um yerin keeleemb ke wo itam.»

²⁰ A dalfooxa o yiƥadoox nqaw ne kam mbalka ne, soo a ƴuf a ƴeewkahinin. Naaga, a ƴeewana keeleemb ke fop.

²¹ O koor oxe kaa ɗeetoogun yaam a jaaxiɗ, a fañ o lay dara boo a ga ndax o Yaal oxe kaa felandoogu a ñaaƈ ale ten ndax nam.

²² Ye keeleemb ke a yerna boo a ƈut, o koor oxe a janga o heɗ wurus olaa o meɗel um a fi’na genwal o sekel fo xa ƈang wurus xa ƭaq axaa o meɗel den a fi’na xa sekel xarɓaxay, a rokan a den o toog oxe.

²³ O koor oxe a layaan ee: «Layangaam o ƥiy no xe refoona. Ndax maa o kiin a fe’na a jega no mbind nuun?»

²⁴ O toog oxe a doonaan ee: «O ƥiy Betwel fee o ƥiy Milka fa Nakoor refum.»

²⁵ A layahinaan ee: «Daaƭ fo fo gooñ fo mayu a njega no mbind naa, too a jega itam maa o kiin a fe’na.»

²⁶ Maaga, o koor oxe a gooknooxa, a gung a lanq mbaambir no Yaal oxe,

²⁷ a lay ee: «O Yaal oxe Roog fee no yaal mbind es Abraham a hela o simatel, ten fee xañeerna o yaal mbind es o paaxel um fo ngor um. Mi fa xoox es sax o Yaal oxe a ɗoxiidaxam boo no mbind ne no fog we no yaal mbind es!»

²⁸ O njaaƈ o ndoog onqaa a ƴufa, a wetandook kaaga waa no mbind ya um.

²⁹ Rebeka koy a jeg’a o camin o ne’e Laban. Laban a sutooxa, a ƴufiid me no koor oxe paam a cur ale.

³⁰ A ga’’a koy o heɗ ole fo xa ƈang axe no ɓay no cigeen um, too a nan’a a ƭelem ake Rebeka ye ta layna yee keene o koor oxaa a layaxam. Laban a gara, a soƥiid o koor oxe reeƭna paam keeleemb ke ten farna fo a cur alaa.

³¹ A layaan ee: «Gariidi wo fee o Yaal oxe a barke’na. Xar taxu sax o moof meeke? Jagandanaaxoong maa fe’oona too keeleemb ke wo sax a njega maa da ndefna.»

³² O koor oxe a gara no mbind naa. Laban a fudna suf ke soo a ci keeleemb ke daaƭ fo fo gooñ. A xafa foofi laa o koor oxe fo we ta yoonitna a ƥogitna a caf den.

³³ Cinj kaaga, a diƈanaan ndax ta ñaam, ndaa o koor oxe a layaan ee: «Ñaamkiim a refangee kaa um lay ke ɓisiidaxama kañ!» Laban a doonaan ee: «Layi boog!»

³⁴ Maaga, o koor oxe a laya yee: «Mi, o tag Abraham refum.

³⁵ O Yaal oxe a barke’a o yaal mbind es, too o kiin o maak oo ndiiki. O Yaal oxe a ci’aan a ked fo xa siir, xaaliis fa wurus, dag fo jeefeer, keeleemb fo xa paam.

³⁶ Saara fee o tew no yaal mbind es, kam nogoy ne ten, a rimana o yaal mbind es o ƥiy o ngoor, soo o yaal mbind es a ci o ƥiy onqe ke ta jegna fop.

³⁷ O yaal mbind es a daaɓooxnooraxam ee: ‹Ba o waaƭanit o ƥees o ngoor onqe o tew no roog we no Kaakanaan we genuuma no saax den,

³⁸ ndaa kañ fat o ret no mbind faap es, no mbaafaap es, o waaƭanit maaga o ƥees o tew.›

³⁹ Layaam o yaal mbind es ee: ‹Xeƈa o tew oxe jaɓkee o yooniid fa mi›,

⁴⁰ soo ta doonaam ee: ‹O Yaal oxe reefuuma o bug ole ten, xan a heblanong malaaka um, soo a feland a ñaaƈ ale wo. Xan o waaƭanit o ƥees o ngoor onqe o tew no mbaafaap es.

⁴¹ Yaa fadoona no mbind faap es doŋ na taxkaa o woktoox na taaƥ ale. A soƥangaa yee ci’irang o ten, xan o woktoox na taaƥ ale um fi’noorang.›

⁴² Xaye, ye fadiiduuma na cur alaa, layaam ee: O Yaal oxe Roog fee no yaal mbind es Abraham, a soƥangaa yee bugaa o feland a ñaaƈ ale mi leeke,

⁴³ mexey geenooxa paam a cur ale, fat o njaaƈ o ndoog onqe na ƴeewiidkaa, soo um layin ee: ‹Ngela ci’aam foofi um yer no nqaw ne wo›, soo ta doonaam ee:

⁴⁴ ‹Yeri, too xam ƴeewan keeleemb ke wo› a ref o tew oxe o Yaal oxe a jilanna o ƥiy o ngoor onqe no yaal mbind es.›

⁴⁵ Ye um helkaa fo lay boo ƴut no yiif es, Rebeka a sutooxiida, a gadoox nqaw um. A gariida na cur alaa soo a ƴeew, um dalfooxin o lay ee: ‹Ngela ci’aam um yer.›

⁴⁶ A ñofa o roxodoox nqaw ne, soo a layaam ee: ‹Yeri, too xam ƴeewan keeleemb ke wo itam da yer!› Mi yoo yeraam, soo ta yerin keeleemb ke mi.

⁴⁷ Laamtaanum ee: ‹O ƥiy an refo?› A doonaxam ee: ‹O ƥiy Betwel fee o ƥiy Milka fa Nakoor.› Maaga, rokanaanum o heɗ ole no ñis fo xa ƈang axe na xa ƥay axe.

⁴⁸ Cinj kaaga, ƴuugaam, gung mbaambir no Yaal oxe, gidim o Yaal oxe Roog fee no yaal mbind es Abraham, ten fee na ɗoxaxam fo ngor ndax um xotan o ƥiy o ngoor onqe no yaal mbind es o ƥiy o ndew onqe no ndeɓ um.

⁴⁹ Ndiiki koy, a soƥangaa yee o paaxel nuun fo ngor nuun owey no yaal mbind es, layaamoo, a refangee naaga itam, layaamoo rek, boo um waag o and no ke damuuna.»

⁵⁰ Laban fa Betwel a ndoona yee: «Keene de no Yaal oxe a hatu, ten taxu i laykirang ii mbaat ha’aa.

⁵¹ Rebeka yoo xeene mbaambir of, xoteen too ret, fat a dolooxanik o ƥiy no yaal mbind of, ne o Yaal oxe a laytuuna.»

⁵² Ye o tag oxe Abraham a nanna kaaga, a gunga a lanq mbaambir no Yaal oxe.

⁵³ O tag oxe a suta pi’te xaaliis fo pi’te wurus fo tikoorik mosu, a ci’in a Rebeka. A ci’a itam o camin um fa ya um ɗaŋ maak.

⁵⁴ Cinj kaaga, o tag oxe fo yoon um a ñaama, a yer, soo a mbe maaga. No feet nqes olaa, o tag oxe a laya yee: «Kaam jaɓ o nomtoox me no yaal mbind es.»

⁵⁵ O camin oxe fa yaay fee a layaan ee: «Fat o toog oxe a yoq fa in o ndik, ngap ñaal xarɓaxay, cinj kaaga, o ret.»

⁵⁶ A doona a den ee: «Ba nu miñandaam a koƥ. Feek kañ o Yaal oxe a felanda a ñaaƈ ale mi, nqaƴyo rek um nomtoox maa no yaal mbind es.»

⁵⁷ Maaga, a laya yee: «Fat i nqoy o toog oxe boo laamtin kañ.»

⁵⁸ A nqoya a Rebeka, soo a laamtin ee: «Ndax bugaa o yoon fo o koor oxene?» A doona yee: «Ii, xam ret!»

⁵⁹ A asoora fa Rebeka fo o tew oxe topatooxooguuna naa ta rime fo o tag oxe Abraham fo yoon um, soo a nqaƴ a den da ndet.

⁶⁰ A salana a Rebeka yee: «O cigeen in, yaasam o ref ya no cuni-cuni, xa taan of a ngarit fañ den took.»

⁶¹ Maaga, Rebeka fo jeefeer we ten a inooxa, a ŋaay no keeleemb ke, ndax da yoon fo o tag oxe. Neene, o tag oxe a xota a Rebeka, soo a ret.

⁶² Isaak koy a nomtoortiid’a na ngas alaa Laxay-Ro’i, soo a genaa no saax laa no ɓemb-roog o ñamaak.

⁶³ No kirand leng, Isaak a sutooxa ndax ta foƭit a caf um na xa qol axe, a yoɗa a kid um rek soo a ga keeleemb kaa na ngaraa.

⁶⁴ Rebeka yoo a yoɗa a kid um soo a ga a Isaak. A dalfooxa o fudoox ngeeleemb ne ten.

⁶⁵ A laamta o tag oxe yee: «An oo koor oxene na ñaaƴaa kam o qol ole, a xetiidaa fa in?» O tag oxe a doonaan ee: «O yaal mbind es oo.» Maaga, o tew oxe a ñofa o xot a naf ale ten, soo a muuroox.

⁶⁶ O tag oxe a wetandooxa a Isaak ke ta fi’ina fop.

⁶⁷ Isaak a ɓisa a Rebeka no ƭiif naa Saara fee ya um. A xota a Rebeka ta refat o teem, too a bug’aan lool. Neene Isaak a yaaloortu a cinj ye ta ñakna a ya um.