Mberaand 2 - NQAARIIT NE ROOG

¹ Neene asamaan fo lanq fo ke refna teen fop a njegtu.

² Roog a paanga calel um soo a ñootnoox no ñaal ɓetuu ƭikandeer ne.

³ Roog a barke’a ñaal ɓetuu ƭikandeer ne, soo a kesin ta ref bes fa tedu, yaam no ñaal neene a ñootnoox’u no calel ke na sak ale.

A ƭing ale Edeen

⁴ Keeke doonoox’u ye lanq ke fa asamaan fee a sakeena. Ye o Yaal oxe Roog a sakna asamaan fo lanq boo a ƴut,

⁵ o mbafid onqe moƴna o neew sax reeƭee took lanq ke, daaƭ leng sax’afulee teen, yaam o Yaal oxe Roog deɓ’afulee too o kiin o leng jeg’afulee ndax ta xoox lanq ke.

⁶ Kaa koy, a buy kaa yoɗoortoogu no lanq ke, boo yaa fop a xuƥna sap.

⁷ Naaga, o Yaal oxe Roog a xota no fo ut ole no lanq ke, a muul o kiin soo a wuuɗ o ñoow na xa ñis um. O kiin oxe a dalfooxa o jeg o laaw olaa na fiɗaa.

⁸ Cinj kaaga, o Yaal oxe Roog a jimba a ƭing kam Edeen, farna fo batand, soo a ɓek taaga o koor oxe ta muul’ina.

⁹ O Yaal oxe Roog a saxna maaga xa qos taxar fop, da njeg a safaan, a mbel o ñaamel, ndaxar ne no ñoow ole fo ndaxar ne na andnooraa paax fo paaxeer a ndef a ndeer ale.

¹⁰ O xuluɓ a sutoora Edeen, a sooraa a ƭing ale. Maaga, a xaajooxa a fi a kal a nahak.

¹¹ A kal a eetaand ale ne’e Pison, Ten widu saax le Hawila fop me wurus fee a jegna,

¹² too ta ref wurus fa nqoolu qac fa cuuraay fa mbaax faa ne’eena bedelyum fo a ƥil a cafeñu kaa ne’eena onik.

¹³ A kal a ƭikandeer ale ne’e Giihon. Ten wid’u saax laa Kuus fop.

¹⁴ A kal a tadkandeer ale ne’e Tigere, ten sagu no batand naa Asuur. A kal a nahkandeer ale koy refu Ofrat.

¹⁵ O Yaal oxe Roog a janga o koor oxe, a ɓekin kam a ƭing alaa Edeen, ndax ta xooxan, a yetan.

¹⁶ O Yaal oxe Roog a hebla o koor oxe yee: «Waagaa o moɗ xa tim axe no taxar ke na ƭing ale fop,

¹⁷ bo ta yoqaa ndaxar ne na andnooraa paax fo paaxeer, yaam a mbanuu moɗoona xa tim axe ten, xan o xon.»

¹⁸ Cinj kaaga, o Yaal oxe Roog a laya yee: «O koor oxene a yoq koƭong-a-koƭongin faaxee. Kaam jaɓin o fi’an oxaa nandna fo ten, a dimle’an.»

¹⁹ O Yaal oxe Roog a muulit’a muumeen-a-koƥ ke fo tiiƭ ke na asamaan fop no lanq ke. Cinj kaaga, a ɓakandiida a den me no koor oxe, ndax ta and ne o koor oxe a ne’kaa a den. Oxuu refna teen, gon le o koor oxe a ferankan a ne’keel.

²⁰ Neene, o koor oxe a ferana muumeen ke fop a kon fo tiiƭ ke na asamaan fo ƥaaɓaan ke na koƥ ale fop. Kaa koy, no keene fop ga’ee teen oxaa nandna fo ten, a waagin o dimle.

²¹ Maaga, o Yaal oxe Roog a rokaan ƭaanar tee hanq a ɗaan. Ye ta ɗaanna, a watna o laf o leng na xa laf axe no koor oxe, soo a muɓrand o saax ole bo ta nomtoox ne ta reeƭna.

²² A janga o laf oleene ta xotit’ina no koor oxe, a muultin o tew. Cinj kaaga, ta ɓisiidin farna fo koor oxe.

²³ Maaga, o koor oxe a laya yee: «No jaf leeke de, ga’aam oxe hatna na xa kiiƈ es, a saq njer leng kut ne saquuma. O tew a ne’keel, yaam no koor a hatu.»

²⁴ Ten taxu o koor a xaƴaa a faap um fa ya um, a hiɓoor fo o teem, soo da ndefat njer leng kut

²⁵ O koor oxe fo o teem o ƥor a yoq’u, too sed’eeyo teen dara.